2024 2023 2022 Flere år...
20-07-2013
Ann Andreassen aamma Tobias Grønvold Uummannami sølviusumik Nersornaaserneqarput
Inatsisartut Siulittaasuata Lars-Emil Johansenip Uummannap ulloq 20. juli 2013 illoqarfittut ukiunik 250-inngortorsiorluni nalliuttorsiornerani peqataanerminut atatillugu Ann Andreassen aammalu Tobias Grønvold Uummannami nalliuttorsiualaarnermi sølviusumik Nersornaaserpai.
Nersornaat sølviusoq Ann Andreassenimut (1960)
Inatsisartut Siulittaasoqarfiata Ann Andreassen sølviusumik Nersornaaserpaa piffissami sivisuumi annertuumillu nersortarialimmik Uummannami meeqqat angerlarsimaffianni meeqqanut tassani najugaqartunut pingaarutilimmik kialaartumillu ataatsimoorfiusumi sivisuumik tunniusimallunilu ningiutut sulisimanera tunngavilersuutigalugu.
Siulittaasup Ann Andreassenimut oqaaseqarnermini ilaatigut makku´erseqqissarpai:
"Ann Andreassen Uummannami Meeqqat Angerlarsimaffianni meeqqanut najugaqartunut misigisanik misigissutsinillu pitsaasunik qasusuilluni pilersitsisarnikkut suliaqarsimavoq aammalu najukkami, nuna tamakkerlugu, nunat tamalaat akornanni aammalu kulturit inuiaqatigiillu uagutsinnut nallersuunneqarsinnasut akimorlugit inuiaqatigiit inerikkiartornerannut ineriartornerannullu tunngavissiisimalluni.
1987-imili Uummannami meeqqat angerlarsimaffianni, ukiut ingerlaneranni meerarpassuarnut inuusuttorpassuarnullu tamakkulumi ilaqutaannut nuannaarutaasumik iluaqutaasumillu ingerlalluartunngortillugu ineriartortitanni ningiunngorputit.
Inuuvutit nuannaartuullutit tamannalu inunnut suliannut ilanngutsitannut tuniluuttarluni. Pingaartumik nutaaliorumatunerit isumassarsiullaqqissuunerillu piorsarsimassutsimik paasinninnerup ineriartortinneqarneranut ilassuteqartuupput inunnut amerlasuunut nuannaarutaasumik.
Sumiiffiup pisassarititai kalaallillu qangaaniit kulturiat aallaavigalugit pingaartumik Uumannamit Kalaallillu Nunaannit "aallartitaalluartuuvutit"."
Nersornaat sølviusoq Tobias Grønvoldimut (1938)
Inatsisartut Siulittaasoqarfiata Tobias Grønvold sølviusumik
Nersornaaserpaa piffissami sivisuumi tunniusimalluni siullermikm
GTO-usimasumi kingusinnerusukkullu Nuna Tekimi aammalu Uummannami
politiinut taartaasutut kingullermillu Uummannami Meeqqat
Angerlarsimaffianni ikiortitut
sulisimanera tunngavilersuutigalugu.
Siulittaasup Tobias Grønvoldimut oqaaseqarnermini ilaatigut makku erseqqissarpai:
"Maluginiarneqarpoq naak ukioqqortusigaluarlutit suli sulisartutit aammalu illit nuliallu nammineq piumassusersi malillugu meeqqat inuusuttullu Uummannami meeqqat angerlarsimaffianni najugaqartut meeqqat angerlarsimaffiata illutaa qimallugu pitsaasumik toqqissisimanartumillu misigisaqartinnissaannik sunngiffissinni suli suliaqarassi.
Naak ukioqqortusigaluarlutit suli sulinerpit saniatigut illit nuliallu sumiiffimmi takornariartitsinermut immikkut tapeeqataasarpusi unnuisitsisarlusi, kaffisoriartortitsisarlusi, kalaallit atisatoqaannik takutitsisarlusi aammalu Uummannap oqaluttuassartaa oqaluttuarisarlugu, ilimagaaralu najukkami ulluinnarni pisut nammineq isimik takullugit takornariat misigisartik tamanna puigunngisaannassagaat."
Lars-Emil Johansen
Inatsisartut Siulittaasuat
Annertunerusumik paasisaqarusukkaanni Inatsisartut Siulittaasuat Lars-Emil Johansen mobil +299 55 19 15 saaffigineqarsinnaavoq.
Assit: Else Olsvig.
