2024 2023 2022 Flere år...
29-08-2013
Ulloq 28. august 2013 Jokkmokkimi Sverigemi Saamit Inatsisartuisa ukiunik 20-inngortorsiorneranni Inatsisartut Siulittaasuat peqataavoq
Saamit inatsisartuinit nutaamik qinigaasunit qaaqquneqarlunga 2013-imi Saamit inatsisartuisa ataatsimiinnerata ammarneqarneranut kiisalu Saamit Inatsisartuisa ukiunik 20-inngortorsiorluni nalliuttorsiornerata persuarsiorfiusumik malunnartinniarneqarneranut nunanit avannarlernit qaaqqusat allat Sverigellu kunngia Carl Gustavip peqatigalugit peqataavunga.
Taamatuttaaq periarfissinneqarsimavunga ammaanersiornermi Saamit inatsisartuisa oqaluttarfianniit Inatsisartunit inuulluaqqussutip apuunnissaanut.
Sverigep kunngia Carl Gustav ammaanersiornermut akunnerup affaanik kinguaattoorluni takkuppoq, aatsaallu takkummaat Saamit inatsisartuisa ataatsimiinnerata ammarnersiorneqarnera aallartilluni.
Saamit inatsisartuisa ataatsimiinnerata ammarneqarnera Jokkmokkimi tatsip sinaani tupersuarmi saamit qangaanilli toqqisut ilusilikkami nutaaliaasumi noqarutit ataanni ingerlanneqarpoq.
Sverigemi Saamit inatsisartui naalagaaffimmi oqartussat suliassaataannik isumaginnittuujutigalutik Saamit sinnerlugit qinikkatut aamma inissimapput. 2013-imi maajimi Saamit inatsisartuinut nutaamik qinersisoqarpoq, taamaalilluni ataatsimiinneq manna aamma inissititerfiulluni. Persuarsiorfiusumik ulloq ammaanersiorfik aallarnerlugu Saamit inatsisartuinut nutaanut inissititertussanut nutaamik qinigaasut tamarmik inuusuttunit marlunnit aqqisigut taallugit nikuisinneqartarput taannaanertillu uppernarsarlugu. Qangali ileqqoq tamanna misigalugu assut soqutiginartoq.
Tamatuma kingorna assigiinngitsunik oqalugiartoqarlunilu nipilersortunik akunniliisoqartarpoq. Nammineq Inatsisartut sinnerlugit oqaaseqarninni nunat inoqqaavisa pisinnaatitaaffii siuarsarniarlugit ataatsimut suleqatigiilluta suliniarnerput, minnerunngitsumik Naalagaaffiit Peqatigiit iluanni, erseqqissarpara. Tamatumani pisinnaatitaaffitik illersorniarlugit pitsanngorsarniarlugillu Saamit inatsisartui suliniuteqartuarput, peqatigitillugulu saamit nunaanni pisuussutinik iluaquteqarniarnissaq aamma soqutigineqaleriartuinnarluni. Taamaattumik aamma Saamit inatsisartui tamannarpiaq pissutigalugu Saamit inatsisartuinut ilaasortanut qaaqqusanullu savinissamik piiaaffissatut pilersaarutigineqartumut aqqusinermik assersuisunut alakkaatitsipput saviminissamik piiaaviliorniarnermut akerliussutsimik takutitsisunut tapersersuinertik ersersinniarlugu.
Ulloq pisortatigoortumik nerersuaaqatigiinnermik nipilersornermik aliikkusersuinertalimmik naggaserneqarpoq.
Lars-Emil Johansen
Inatsisartut Siulittaasuat
Paasissutissat sukumiinerusut Inatsisartut Siulittaasuat angallattagaq +299 55 19 15 attaveqarfigalugu pissarsiarineqarsinnaapput.
