2024 2023 2022 Flere år...
23-01-2014
Aalisarneq pillugu inatsisip allanngortinnissaanut isummersoqatigiinnerunissamik aalajangiineq Aalisarnermut ataatsimiititaliap iluarisimaarpaa
Naalakkersuisut inatsimmik allannguinissamik pilersaaruteqarneranni sapaatit akunnerini kingullerni aalisarneq pillugu inatsit soqutigineqarsimaqisoq Inatsisartut Aalisarnermut, Piniarnermut Nunalerinermullu ataatsimiititaliaata maluginiarpaa. Tamatumunnga atatillugu Aalisarnermut ataatsimiititaliaq ima oqaaseqaateqarusuppoq:
Aalisarneq pillugu inatsisip allanngortinneqarnissaanut siunnersuut tallimanngornermi 6. december 2013 tusarniaassutigalugu nassiussuunneqarpoq, tunniussinissamullu piffissaliunneqarluni ataasinngorneq 6. januar 2014.
Siunnersuut iliuusissanik Kalaallit Nunaanni aalisarnerup ilusaanik ingerlanneqarneranilu periaatsinik pinngitsoorani allanngortitsisussanik ilaqarpoq.
Siunnersuutip taama sivikitsigisumik piffissaliilluni tusarniaassutigalugu nassiussuunneqarnera Ataatsimiititaliap eqqarsarnartoqartippaa, ilaatigummi nalliuttorsuit innimigineqarnissaat eqqarsaatigineqarsimanngilarluunniit, sualummik allannguutissatut siunnersuutip imarisaasa ilai aalisarnermik inuussutissarsiuteqarnermut annertoqisumik sunniuteqarsinnaammata.
Inuussutissarsiornermik ingerlatsisut arlallit siunnersuutip misissornissaanut isummersorfiginissaanullu piffissaqarnerunissamik kaammattuuteqarput.
Taamaattumik Ataatsimiititaliap naammagisimaarlugu maluginiarpaa, Naalakkersuisut inuussutissarsiuteqarnermik ingerlatsisunik isummersoqateqarnerup sivitsorneqarnissaanik maanna aalajangersimagunarmata. Taamaalilluni tusakkat malillugit aalisarneq pillugu isumasioqatigiinnissami upernaap ilaa ingerlanneqartussatut ilimasaarutigineqartumi aalisarneq pillugu inatsit taassumalu allannguutissai samminiarneqarput.
Aalisarneq pillugu inatsimmut allannguutissatut siunnersuutip saqqummiunneqannginnerani ingerlatsisut attuumassutillit tamarmik oqariartuuteqarnissamut periarfissaqarnissaat pingaaruteqartuuvoq.
Peqatigitillugu ilisimasaqarluartunik suleqatigiinnik pilersitsinissamik Ataatsimiititaliap Naalakkersuisut kaammattorumavai, taakkulu sinerissap qanittuani aalisarnermik nioqqutissiornermillu ingerlatsisut avissaartinneqarnissaannut siunnersuutip sunniutissai misissussavaat, taamatuttaarlu aalisarnermut Kalaallit Nunaallu ataatsimut isigalugu aningaasarsiornikkut sunniutaasussat misissussallugit.
Ataatsimiititaliap paasissutissat pisariaqartitani ajoraluartumik tusagassiorfitsigut akuttunngitsumik pissarsiarisarmagit, Ataatsimiititaliap aamma Naalakkersuisunut eqqaamaqqussavaa aalisarneq pillugu Naalakkersuisut isumaliutaat iliuuseriniagaallu Ataatsimiititaliap akuutinneqarnissaminut pisariaqartimmagit.
Taamaattorli Ataatsimiititaliaq neriuppoq, Ataatsimiititaliap aamma Aalisarnermut, Piniarnermut Nunalerinermullu Naalakkersuisunngortussap akornanni suleqatigiinneq angusaqarfiunerusoq inerititaqarfiusiorlu pilersinneqarsinnaassasoq.
Nikolaj Jeremiassen
Inatsisartut Aalisarnermut, Piniarnermut Nunalerinermullu
ataatsimiititaliaata siulittaasua
Paasisaqarnerorusunnermi Ataatsimiititaliap siulittaasua
Nikolaj Jeremiassen attavigineqarsinnaavoq mobil +299 53 32
63.