Nutaarsiassat

24-01-2014

Nunat Avannarliit Siunnersuisoqatigiiffiata 2014-imi ataatsimiittarnissani aallarnerpai!

Nunat Avannarliit Siunnersuisoqatigiiffiata ukiumut suliassai Per Berthelsenip aamma Juliane Henningsenip ulloq 21. aamma 22. januar 2014-imi aallarnerpaat. Ataatsimiinnerit Københavnimi ingerlanneqarput danskillu aallartitaannit aaqqissuunneqarlutik. Per Berthelsen Avatangiisinut Pinngortitamilu Pisuussutinut Ataatsimiititaliamut ilaasortanngorpoq Juliane Henningsenilu Kultureqarnermut Ilinniartitaanermullu Ataatsimiititaliamut ilaasortanngorluni.

Avatangiisinut Pinngortitamilu Pisuussutinut Ataatsimiititaliaq

Atortulersuutit RAS-inik taaneqartartut (erngup salinneqartarneranik atortulersuutit) atorlugit nunami sullivimmi tasinngortaliani aalisagaateqarneq  pillugu ilaasortamit siunnersuutip suliarineqarnerata ilaatut suliassaqarfimmi teknikikkut avatangiisitigullu siuariaatit pillugit saqqummiisussat arlallit Avatangiisinut Pinngortitamilu Pisuussutinut Ataatsimiititaliap aggersarpai.  Immami uumatitsivinnut nalinginnaasunut sanilliullugu atortut taakku teknikikkut avatangiisitigullu periarfissaqarluarput. Nerisassanik tunisassiornermi periutsimik taamaattumik pilersitsinerup ingerlatsinerullu aningaasaqarnikkut pitsaasumik pilersitsivigineqarnissaa unammiligassat annersaraat. Imaani uumassusilinnit assigiinngitsuneersut (pingaartumik qaleruallit aalisakkallu) atorlugit nerisassanik tunisassiorneq ineriartupiloorfiuvoq. Tamatumani nunarsuarmi tamarmi innuttaasut amerliartortut nerisassanik pisariaqartitsinerat annertusiartortoq matussuserneqarsinnaaqqullugu. Aalisagaateqarnermi qalerualiuteqarnermilu (pingaartumik uillunik) inuussutissarsiutitigut periarfissat Kalaallit Nunaanni aamma eqqumaffiginissaat pingaaruteqartoq  Per Berthelsen isumaqarpoq. Aningaasaqarneq imminut napatittoq pilersinneqarsinnaappat taamatut aalisagaateqarnermi kinnerup nassatarisaanik kvælstofip pilersinneqartup avatangiisinut isumannaatsumik isumagineqarnissaa qulakkeerneqarsinnaappat taamatut imaani uumassusillit taakku inuussutissarsiutigineqarsinnaanissaat periarfissaqarsinnaavoq.
 
Atuisut nammineq piumassusertik naapertorlugu suliniutaat "Stop Spild Af Mad" (nerisassanik maangaannartitsineq unitsilli) 2013-imi Oslomi ataatsimiinnermi Nunat Avannarliit Siunnersuisoqatigiiffiata Avatangiisinut tunngasumik Nersornaasiuttagaanik pissarsitinneqarpoq, suliniaqatigiiffiullu siuttua pilersitsisualu Selina Juul ataatsimiititaliap ataatsimiinnermini naapippaa, taassumalu inuussutissarsiortuni niuerfinnilu taamatullu inuinnaat nerisassanik eqqaaginnartarnerat annikillisinniarlugu suliniaqatigiiffik qanoq qasuttuilluni sulisarnersoq uummaarissumik soqutiginnissuseqarluartumillu oqaluttuaraa. Pisuussutitsinnik pitsaanerpaamik atuinissaq anguniarneqarpoq inuillu ataasiakkaat iliuusii tamarmik iluaqutaaxsut Selina Juulip oqaatigaa. 

Kultureqarnermut Ilinniartitaanermullu Ataatsimiititaliaq

University of the Arctic ataatsimiititaliap ataatsimiinnerani tullermi oqaluuserisassanngortinneqassasoq Juliane Henningsenip ataatsimiititaliamut ilaasortanut kaammattuutigaa, taamaalilluni Nunat Avannarliit Siunnersuisoqatigiiffiat University of the Arcticimut - imaluunniit Uarctimik nalinginnaasumik taaneqartartumut - tapeeqataasinnaanersoq - taamaassappallu qanoq tamanna pissanersoq - ataatsimiititaliamit oqaluuserineqarsinnaaqqullugu. UArctic assersuutigalugu Ilisimatusarfittut illutaqarluni universitetiunngilaq, nunanili tamalaani universitetit, ilinniarnertuunngorniarfiit allallu Issittumi ilinniartitaanermik ilisimatusarnermillu siuarsaanissamik kissaateqartut aammalu Issittumi ilinniartitsinikkut ilisimatusarnikkullu avatangiisinik nukittuunik pilersitsinissamik siunertaqartut akornanni attaveqarfiulluni. Kaammattuut ataatsimiititaliamut ilaasortanit tigulluarneqarpoq aammalu ataatsimiititaliap Islandimi ataatsimiinnissaani oqaluuserineqassalluni.

Meeqqat inuusuttullu silami sammisassanik sammisaqarnerulersinniarlugit nunat avannarliit suleqatigiinnissaat pillugu siunnersuummik ataatsimiititaliap suliaqarnissaani atugassatut Jan Eriksen, Friluftliv Danmarkimi pisortaasoq Nordisk Friluftliv pillugu saqqummiinissamut ataatsimiititaliamit aggersarneqarpoq. Pinngortitamik atuisut ataatsimut isigalugu ukioqqortusigaluttuinnarnerannik ataatsimiititaliap ilimaginninnera Jan Eriksenip eqqornerarpaa oqaluttuaralugulu danskit 2009-mi misissuineranni paasineqartoq meeqqat misissuinermi peqataasut taamaallaat 26 %-ii aasap ingerlanerani ullut tamaasa silamiissimasut. Tamanna taakku aanakkuinut sanilliullugu 33 %-imik appariarneruvoq. Juliane Henningsen isumaqarpoq Kalaallit Nunaanni - annikinnerugaluamik - aamma taamaattoqarsinnaasoq. Silami sammisaqarneq pisuttuarneruppat, aalisariarneruppat najukkamiluunniit timersoqatigiiffimmut eqeersimaartumik ilaasortaanikkut pippat tamanna inunnut ataasiakkaanut inuiaqatigiinnullu tamanut iluaqutissaavoq.

Nunat Avannarliit Siunnersuisoqatigiiffianni ataatsimiinnissat Islandimi Akureyrimi ulluni 7. - 9. april 2014-imi ingerlanneqassapput. Akureyrimi ukiumoortumik ataatsimiinneq ingerlanneqassaaq, tamatumani qulequtarineqassalluni "pinngortitami pisuussutinik atorluaaneq".
 

Annertunerusumik paasisaqarusukkaanni saaffigineqarsinnaavoq Per Berthelsen, mobil 55 33 61 aammalu Juliane Henningsen, mobil 48 81 48.

Nunat Avannarliit Siunnersuisoqatigiiffiat inatsisartutigoortumik suleqatigiiffiuvoq Norgemit, Danmarkimit, Sverigemit, Finlandimit, Islandimit nunanillu namminersortuni; Ålandimit, Savalimmiunit Kalaallit Nunaannillu 87-inik ilaasortalik.

Inatsisartut Nunat Avannarliit Siunnersuisoqatigiiffianni marlunnik ilaasortaatitaqarput marlunnillu sinniisussaqartitsillutik. Inatsisartunut ilaasortat Per Berthelsen Siumumit aamma Juliane Henningsen Inuit Ataqatigiinnit ilaasortaapput, taakkulu sinniisussaralugit Evelyn Frederiksen Siumumit aamma Naaja Nathanielsen Inuit Ataqatigiinnit.