Nutaarsiassat


2021 2020 2019 Flere år...

19-02-2014

Inatsisartut Siulittaasoqarfianni ilaasortamut Kristian Jeremiassenimut inussiarner-sumik eqqaasitsissut

Sermitsiap nittartagaani ulloq 19. februar 2014 Inatsisartunut ilaasortaq Kristian Jeremiassen oqaaseqartinneqarpoq. Oqaaseqaataatigut erserpoq Kristian Jeremiassen siunissami siunnersuutinik saqqummiussaqassagaangami kalaallisuinnaq allattalerniartoq, oqaatigineqartutut siunnersuutaagoq itigartinneqarsimammat qallunaatoortaa kukkuneqarmat. Siunnersuummi Nukissiorfiit aktiaateqarluni ingerlatseqatigiiffinngortinneqarnissaat pineqarpoq. (Najoqqutaq: http://sermitsiaq.ag/kl/k-jeremiassen-kalaallisuinnaq-allattalerpunga)

 

Kristian Jeremiassen ilisimaneqartutut Inatsisartut Siulittaasoqarfiannut ilaasortaavoq, tamannalu tunngavigalugu oqaaseqaataa tupiginngitsoorneqarsinnaanani. 

 

Taamaalillunga Kristian Jeremiassenimut eqqaasitsissutigisariaqarpara nammineq Siulittaasoqarfimmut ilaasortatut ippassaq Siulittaasoqarfiup sivisuumik ataatsimiinneranut peqataammat, tassanilu isumaqatigiissutigineqarlunilu aalajangerneqarluni, ilaatigut namminerminit siunnersuut matumani eqqartorneqartoq, upernaakkut ataatsimiinnermi oqaluuserisassanut ilanngunneqarsinnaanngitsoq.

 

Taamatulli aalajangermut pissutaasut siunnersuutip kalaallisuuata qallunaatuuatalu taasissutissartaasa akornanni assigiinngissuteqalaarneranit annertunerujussuupput.

 

Tamatumunnga atatillugu immikkut oqaatigineqarpoq siunnersuutip akuerineqaruni aningaasatigut kingunerisassai siunnersuummi sukumiinerusumik nassuiarniarneqarsimanngitsut, taamatullu aamma nalilerneqarluni siunnersuummik massakkut saqqummiussaqarneq piffissaq eqqarsaatigalugu pissusissamisoortutut isigineqanngitsoq, tassami ilisimaneqarmat sammisaq tamannarpiaq pillugu nassuiaammik annertuumik upernaakkut ataatsimiinnermut agguaassaqartoqartussaasoq, taamaattumillu pissusissamisoortutut isigineqarluni nassuiaatip ataatsimiititaliami nalilersorneqaqqaarnissaa utaqqimaarneqarpat.

 

Taamatut naliliineq aalajangiinerlu tamanit isumaqatigineqarpoq, taamaattumillu assut ajuusaarnarluni takullugu taamatut aalajangernermiit ulloq ataaseq qaangiutiinnartoq aalajangernerup qimarratiginiarneqarnera.

 

Sulilu pissutsit ajuusarnarneruliinnarput peqatigitillugu takusinnaagakku Siulittaasoqarfimmut ilaasortap ammasumik nalunaarutigimmagu siunnersuuteqarnermut atatillugu ilusissanut piumasaqaatit ilaat malinniarnagit, naak Siulittaasoqarfiup suliassaasa pingaarnerpaat ilagigaluaraat taakku eqquutsinneqarnissaasa qularnaarneqarnissaat. 

 

Siulittaasoqarfik Inatsisartut tamaasa sinnerlugit sulivoq, tamannalu immini aamma isumaqarpoq Siulittaasoqarfimmut ilaasortatut ilaannikkut inuttut nammineq soqutigisat tunulliunneqartariaqartarmata. Tamannali ajuusaarnaraluartumik matumani pisimanngilaq.

 

Tamanna tunngavigalugu Kristian Jeremiassen kaammattuinnarsinnaavara oqaaseqaatigisimasami eqqarsaatigeqqinnissaanut.

 

 

Lars-Emil Johansen
Inatsisartut Siulittaasuat
  

 
Paasissutissat sukumiinerusut Inatsisartut Siulittaasuat, angallattagaq 55 19 15, attaveqarfigalugu pissarsiarineqarsinnaapput.