Nutaarsiassat


2021 2020 2019 Flere år...

16-04-2014

Nunat Avannarliit Killiit Siunnersuisoqatigiiffiat nutaamik allattaanertaarpoq

Nunat Avannarliit Killiit Siunnersuisoqatigiiffiata Siulittaasoqarfiata aalajangerpaa Inga Dóra G. Markussen, Nuuk, Nunat Avannarliit Killiit Siunnersuisoqatigiiffianni allattaaninngussasoq. Taarsissavaa Þórður Þórarinsson ukiuni qulingiluani atorfimmeereerluni allamik suliffittaarsimasoq.

 

Nunat Avannarliit Killiit Siunnersuisoqatigiiffiat Savalimmiuni Lagtingip, Islandimi Altingip nunatsinnilu Inatsisartut akornanni inatsisartutigoortumik suleqatigiiffiuvoq 1985-imi pilersinneqartoq. Allattaanertut atorfik assut soqutigineqarsimavoq, qinnuteqarfissaq ulloq 24. februar 2014 naammat inuit soqutiginnittut 41-t qinnuteqarsimallutik.

 

- Atorfimmut qinnuteqaatit taama amerlatiginerisa takutippaa siunnersuisoqatigiiffiup sulinera Nunallu Avannarliit Killiit assut soqutigineqartut. Taamaattumik Siunnersuisoqatigiiffiup Siulittaasoqarfiata piffissangaatsiaq atorsimavaat atorfimmut piukkunnarnerpaaq nassaariniarlugu, Unnur Brá Konráðsdóttir, Nunat Avannarliit Killiit Siunnersuisoqatigiiffiannut siulittaasoq Islandimilu inatsisartunut Altingimut ilaasortaq, oqarpoq.

 

- Tassalu maanna 42-nik ukiulik Inga Dóra G. Markussen Nuummilu najugalik toqqarparput. Taamaalilluta aamma Nunat Avannarliit Killiit Siunnersuisoqatigiiffianni allattaaneqalerpugut aqutsinermik, tusagassiorfiit aqqutigalugit paasissutissanik siammarterinermik attaveqaqatigiinnermillu misilittagaqarluartumik. Tamatuma saniatigut nunani ilaasortaasuni pingasuni inuiaqatigiinni pissutsinik kiisalu nunat avannarliit killiit suleqatigiinnerannik ilisimasaqarluarpoq, tamatumalu saniatigut aamma islandimiutut, kalaallisut, qallunaatut tuluttullu oqalussinnaalluni. Inga Dórap, qanittukkup atorfimmut inissittussap, suleqatiginissaa qilanaaraarput, Unnur Brá Konráðsdóttir oqarpoq.

 

Nunat Avannarliit Killiit Siunnersuisoqatigiiffiata allattoqarfia Reykjavikimi inissisimavoq.

 

 

Paasissutissat sukumiinerusut: Unnur Brá Konráðsdóttir, siulittaasoq, angallattagaq + 354 862 4241.