2024 2023 2022 Flere år...
23-04-2014
Inatsisartuni akunnerup apeqquteqarfiup nutaamik ilusilerneqarnera iluatsilluarpoq
Sapaatip akunnikkuutaartumik akunneq apeqquteqarfik maleruagassat nutaat qaammammi kingullermi siulittaasoqarfimmit akuerineqartut malillugit Inatsisartut ullumi siullermeertumik ingerlappaat.
"Periuseq nutaaq atuutiliinnarluni iluatsilluarpoq", taama oqarpoq Lars-Emil Johansen. "Soorunami maleruagassat nutaat partiit siulittaasuinit, oqaaseqartartunit Naalakkersuisunullu ilaasortanit sungiunniarneqalaaqqaassapput, maannangaarli takusinnaalereerparput periuseq nutaaq oqallinnerup pitsaanerulerlunilu sammineqartunut tunnganerulerneranik nassataqassasoq, tamannarpiarlumi nutaamik aaqqissuussisoqarnerani anguniakkat pingaarnersaraat ".
"Atuisut aaqqissuussineq nutaaq pillugu iluarisimaarinnillutik oqariartuutaannik arlalinnik tigusaqareerpugut, tamannalumi Inatsisartut uangalu soorunami nuannaarutigaarput" taama oqarpoq Lars-Emil Johansen.
Maleruagassat nutaat malillugit pingasunngornerit allortarlugit illuatungiliuttuni partiit siuttui (imaluunniit partiip siulittaasua Inatsisartunut ilaasortaanngippat illuatungiliuttut oqaaseqartartui) kisimik Naalakkersuisut siulittaasuannut apeqquteqarsinnaapput. Tamatumani oqaaseqartartut tamarmik minutsinik aqqaneq marlunni oqaaseqarsinnaapput. Oqaaseqartartut nalinginnaasumik tulleriinnilersuineq malillugu, tassa Inatsisartunut ilaasortaqaqqortussuseq malillugu oqaaseqartassapput. Minutsit aqqaneq marluk ingerlanerini minutsit marluk tikillugit sivisussusilimmik qasseriarluniluunniit apeqquteqartoqarsinnaavoq aammalu minutsit marluk iluini akissuteqartoqartassalluni.
Pingasunngornerit allortarlugit akunneq apeqquteqarfik pisarnertut ingerlanneqartassaaq, tamatumanili allaanerussutaalluni partiini Naalakkersuisuutitaqartuni ilaasortat apeqquteqarnissamut periarfissinneqannginnissaat Siulittaasoqarfimmit kaammattuutigineqarmat. Ilaasortat taakku Naalakkersuisut aqqutigalugit paasissutissanik ajornannginnerusumik pissarsiniarsinnaanerisa ilimagineqarnera tamatumunnga soorunami pissutaavoq.
"Taamatut iliuuseqarneq Inatsisartuni Inatsisartullu oqalliseriaasiannik ingerlaavartumik inerisaanerup nutarterinerullu ilaatut isigaara" Lars-Emil Johansen ilassusiivoq. "Neriuppunga ukiuni aggersuni iliuutsinik taamaattunik Siulittaasoqarfik saqqummiussisinnaajumaartoq."
Lars-Emil Johansen
Inatsisartut Siulittaasuat
Paasissutissat sukumiinerusunut Inatsisartut Siulittaasuannut Lars-Emil Johansenimut, oqarasuaat angallattagaq +299 55 19 15, attaveqarluni pissarsiarineqarsinnaapput.
