Nutaarsiassat

02-07-2014

Andreas Lyberth sølviusumik Nersornaaserneqarpoq (Angerlaq)

Inatsisartut siulittaasuata tulliisa sisamaata Ruth Heilmannip ippassaq ataasinngornermi Kangaamiuni naliuttorsiorpaluttumik katerisimaarnermi Andreas Lyberth, Angerlaq, sølviusumik Nersornaaserpaa.

Inatsisartut Siulittaasoqarfiata Andreas Lyberth sølviusumik Nersornaaserpaat inuunini tamaat inuiaqatigiinnik timitalimmik sullissisimanera aalisarnermillu ikaarsaariartornermi inuiaat ilisimasaqarnerulernissaannut aqqutissiuusseqataalluinnarsimanera ilaatigut tun-ngavilersuutigalugit.

Ruth Heilmannip Andreas Lyberthimut oqaaseqarnermini ilaatigut ima oqarpoq:

"Nalunngilarput 1949-mi 18-iinnarnik ukioqarlutit tukutuuarartaarsimasutit, tassanngaanniillu aalisarneq ingerlatilerlugu. Inuiaqatigiinnik sullissineq tunuarsimaarfigisimanngilat, inuit arfinillit annaassimallugit, ujaasisarnerpassuit peqataaffigisimallugit taamatullu aamma napparsimasunik angallassisarsimallutit - ilaatigut ukiut 60-it matuma siorna angallassininni maanna nunaqqatigisatsinnik inunngortoqarsimalluni.

Inuiaqatigiit kalaallit aalisarnermik ingerlatsiartulerneranni tunuarsimaarnak siuarsaaqataasimavutit aalisarnernik assigiinngitsunik misileraasarlutit, ilaatigullu tissukartitsilluni kapisilinniarnermik eqqusseqqaartuusimallutit. Meeqqatit minnerunngitsumik maani nunaqarfimmut aamma sunniuteqarlualersimapput, ernitit minnerunngitsumik arfanniartarnermikkut neqissaqarniarnikkut malunnaateqarluarlutik."

Ruth Heilmann

Inatsisartut siulittaasuata tulliisa sisamaat

Paasissutissat sukumiinerusut Inatsisartut Siulittaasuata tulliisa sisamaat Ruth Heilmann angallattagaq 52 08 05 attaveqarfigalugu pissarsiarineqarsinnaapput.