Nutaarsiassat


2021 2020 2019 Flere år...

02-07-2014

Nunalerineq ingerlalluartoq - maanna siunissamilu

Kalaallit Nunaanni nunalerinerup tapersersornissaanut ineriartortinnissaanullu ikinnerpaamik 15. mio. kr.-nik aningaasaliisoqassasoq Inatsisartut junimi aalajangerpaat. Aningaasat 2015-imi atorneqassapput - taamaalillutillu ukiumi tulliuttumi pisortat aningaasaliissutissaattut missingersuutinut (aningaasanut inatsimmut) ilanngunneqassallutik, tamannalu Inatsisartut ukiaru ataatsimiinnissaannut akuerineqassasoq naatsorsuutigineqarpoq.

 

Aalajangiinerup akuersissutigineqarneranut atatillugu Aalisarnermut, Piniarnermut Nunalerinermullu Naalakkersuisoq Finn Karlsen nualerinermut atugassatut ikinnerpaamik 15 mio. kr.-inik aningaasaliissuteqarnissamik siunnersuummut tapersersuivoq.

 

Nunalerineq ingerlalluartoq imminut pilersorsinnaanerunermut suliffinnillu nutaanik pilersitsinermut ilapittuutaasoq nunarput tamakkerlugu soqutigineqarpoq. Inuussutissarsiutip ineriartornissaanut Inatsisartut aalajangiinermikkut tapersersuerusussuseqarnerat Aalisarnermut, Piniarnermut Nunalerinermullu ataatsimiititaliap nuannaarutigaa.

 

Paatsoortoqaqqunagulu 15 mio. kr.-t  taakku aningaasaliissutigineqarnissaannut aalisarneq pilliutigineqassanngitsoq Ataatsimiititaliap oqaatigerusuppaa. Tamanna Ataatsimiititaliamit akuersaarneqarsinnaanngilluinnarpoq, taamaalisoqassappammi Inatsisartut kissaatigisaannik takorlugaannillu uniuinerulluinnassaaq. 

 

Aalisarneq Nunatsinni inuussutissarsiutit pingaarnersaraat, Ataatsimiititaliallu qularinngilaa aalisartunut taakkulu ilaqutaannut patajaatsumik atugassaqartitsinissaq naalakkersuinikkut ingerlatsisunit partiinit siamasissumik isumaqataaffigineqartoq.

 

Taamaalilluni Ataatsimiititaliap kaammattuutigerusuppaa, nunalerinermut tapiissutinik aningaasalersuinermut atatillugu aalisarnerup tigusiffigineqannginnissaa, allaatigulluunniit aalisartut akornanni ernumanermik toqqissisimannginnermillu pisariaqanngitsumik iliuuseqartoqassanngitsoq.

 

 

Nikolaj Jeremiassen

Aalisarnermut, Piniarnermut Nunalerinermullu ataatsimiititaliami siulittaasoq

 

Pasisaqarnerorusunnermi Ataatsimiititaliap siulittaasua Nikolaj Jerimiassen oqarasuaammut uunga attavigineqarsinnaavoq: +299 53 32 63.