Nutaarsiassat


2021 2020 2019 Flere år...

25-09-2014

Inatsisartut Aalisarnermut, Piniarnermut Nunalerinermullu ataatsimiititaliaat Royal Greenlandip Ilulissani, Qasigiannguani Koszalinimilu tunisassiorfiinut takuniaaqqammerpoq

Inatsisartut Aalisarnermut, Piniarnermut Nunalerinermullu ataatsimiititaliaat ulluni 10. - 15. september 2014-imi iluatsitsiffiulluartumik paasisassarsiorluni angalavoq, tamatumanilu Royal Greenlandip Ilulissani, Qasigiannguani aamma Polenimi Koszalinimi tunisassiorfii Ataatsimiititaliap tikeraarpai.

 

Angalanermi najukkani fabrikkit pisortai tunisassiornermilu pisortaat Ataatsimiititaliap naapippai, takkunaniillu ilaatigut tunisassiornermi atortut - kiisalu aalaakkaasumik tunisassiorneq qulakkeerniarlugu periarfissat unammilligassallu nassuiaatigineqarput. Peqatigisaanillu tunisassiorfiit misissornissaannut, tassunga ilanngullugu ingerlatseqatigiiffiup siunissami ingerlatsinissamut takorluugai pillugit apeqquteqarnissamut Ataatsimiititaliaq periarfissinneqarpoq. 

 

Paasisassarsiorluni angalanermi kinguneqarluartumik oqaloqatigiinnermik periarfissiisoqarpoq, tamannalu Royal Greenland pillugu sinaakkutissatigullu ingerlatseqatigiiffimmut atugassarititaasut pillugit Ataatsimiititaliap paasinninneranut nukittorsaataavoq. Tunisassiornerup aalisarnerullu ataqatigiissarnerisa qanoq pingaaruteqartiginera tamatumani Ataatsimiititaliap immikkut maluginiarpaa. Sunniuteqarluartumik nioqqutissiornerup pilersaarusiorneranut tunitsiveqarneq aalaakkaasoq ataavartorlu kiisalu suleqatit pikkorissut kajumissuseqarluartullu tunngavigineqartariaqarput.

 

Nunani allani niuerfinni pisiumassutsip piareersimaffigisinnaanerata pingaaruteqassusia Ataatsimiititaliap peqatigisaanik maluginiarpaa, taamaattumillu ingerlatseqatigiiffiup Polenimi tunisassiornerata ingerlanneqarsinnaaneranut tamanna pingaarutilittut tunngavilersuutaasinnaasoq.

 

Ataatsimiititaliap paasisassarsiornerata nalaani peqataapput Ataatsimiititaliami siulittaasoq Nikolaj Jeremiassen, Siumut; Knud Kristiansen, Atassut; Aqqaluaq B. Egede, Inuit Ataqatigiit aamma Ane Hansen, Inuit Ataqatigiit. Ataatsimiititaliap paasisassarsiorluni angalanermini Aalisarnermut, Piniarnermut Nunalerinermullu Naalakkersuisoq Finn Karlsen ingiallortigaa.

 

Ingerlatseqatigiiffiup iliuuseqarnissamut pilersaarutaa nutaaq "North Atlantic Champion" kiisalu ingerlatseqatigiiffiup ataatsimut isigalugu ineriartornera pillugu periarfissai unammilligassaalu pillugit upernaaq ataatsimiinneq malitseqartinniarlugu paasisassarsiorluni angalasoqarpoq.

 

 

Nikolaj Jeremiassen

Aalisarnermut, Piniarnermut Nunalerinermullu Ataatsimiititaliami siulittaasoq

 

Annertunerusumik paasissutissat ataatsimiititaliap siulittaasuanut Nikolaj Jeremiassen, mobil +299 53 32 63, saaffiginninnikkut pissarsiarineqarsinnaapput.