2024 2023 2022 Flere år...
01-10-2014
Line Dalentoft sølviusumik Nersornaaserneqarpoq
Ullumi Nuummi Kommuneqarfik Sermersuumi kommunalbestyrelsip ataatsimiittarfiani nalliuttorsiualaarnermi Inatsisartut Siulittaasuata Lars-Emil Johansenip Line Dalentoft sølviusumik Nersornaaserpaa.
Inatsisartut Siulittaasoqarfiata Line Dalentoft sølviusumik Nersornaaserpaat ukiorpassuarni sunniuteqartumillu inuunermi ilarujussua pinaveersaartitsinermut atorlugu sullissisimanera pissutigalugu.
Lars-Emil Johansenip Line Dalentoftimut oqaaseqarnermini ilaatigut erseqqissarpaa:
"Inatsisartut Siulittaasoqarfiata sølviusumik Nersornaaserpaatit nunatsinni pinaveersaartitsinermi aaqqissuussaanerup ineriartortinneqarnerani tunniutiinnarnak sapiissuseqarlutillu sulisimanerit pissutigalugu, tamatumani inuiaqatigiinni inuit amerlasuut naapittarpatit ikiortarlugillu aammalu nunatsinni pitsaanerusumik peqqinnerusumillu inuuneqarnissamut periarfissiinissaq eqeersimaarlutit peqataaffigisimallugu.
Oqallorissuunerit, oqaloqateqarsinnaanerit inuiaqatigiinnilu angalaartarnerit aqqutigalugit pinaveersaartitsineq pillugu ilisimasatit naleqartitallu anguniagaqarfiusumik ingerlateqqittarsimavatit."
Lars-Emil Johansen
Inatsisartut Siulittaasuat
Paasissutissat sukumiinerusut Inatsisartut Siulittaasuat Lars-Emil Johansen 55 19 15 attaveqarfigalugu pissarsiarineqarsinnaapput.
