Nutaarsiassat

15-01-2015

Nunanut Allanut Sillimaniarnermullu Ataatsimiititaliap Pituffik pillugu suliaq ilungersunartutut isigaa

Greenland Contractorsip Pituffimmi kiffartuussinissamik isumaqatigiissummik annaasaqarnera pillugu suliaq Nunanut Allanut Sillimaniarnermullu Ataatsimiititaliap ilungersunartutut - allaallu ilungersunartorujussuartut - isigaa.

Tamaattumillu ataatsimiititaliaq sapaatit akunnerini kingullerni Naalakkersuisunut arlalinnik apeqquteqarpoq.

Apeqquteqarnikkut ilaatigut paasiniarneqarpoq amerikamiut oqartussaasuisa kiffartuussinissaq pillugu suliffeqarfimmik, Danmarkimi adresseqarnerinnani aqqutigalugu naalagaaffeqatigiinnermut attuumassuteqartumik, isumaqatigiissuteqarnerat naalagaaffeqatigiinnerup USA-llu akornanni isumaqatigiissutinut atuuttunut naapertuunnersoq.

Pisup Greenland Contractorsip kiffartuussinissaq pillugu isumaqatigiissummik annaasaqarneranik kinguneqartup tamarmiusup qulaajarneqarnissaanut ataatsimiititaliaq aamma apeqquteqarpoq, tassunga ilanngullugu pisumi tassani Naalakkersuisoq qanoq annertutigisumik akuutinneqarsimanersut aammalu taamaassimappat pisup ingerlarngani Naalakkersuisut Kalaallit Nunaata soqutigisaanik qanoq isumaginnissimanersut.

Kiisalu pisumi Naalakkersuisut Naalagaaffeqatigiillu Kalaallit Nunaata soqutigisaanik qanoq pitsaanerpaamik isumaginnissaanersut paasissallugu ataatsimiititaliamit soorunami soqutigineqarsimavoq.

Ataatsimiititaliamit aamma paasissutissiissutigineqarsinnaavoq ataatsimiititaliap suliami kingullertut iliuuserisaa tassaammat Naalakkersuisut Siulittaasuannik Kim Kielsenimik aammalu Nunanut Allanut Naalakkersuisumik Vittus Qujaukitsumik sisamanngornermi ulloq 15. januar apersuinissamut aggersaaneq.

Apersuinissamut aggersaanermi siunertaavoq suliap ineriartorneranik ataatsimiititaliap ilisimatinneqarnissaa, tamatumalu peqatigisaanik paasissutissat ataatsimiititaliap maannamut Naalakkersuisunit pissarsiarisimasaasa itisilertinneqarnissaannut ataatsimiititaliap periarfissinneqarnissaa.

Naggasiullugu paasissutissiissutigineqarsinnaavoq Pituffik pillugu danskit Folketingianni ulloq 21. januar apeqquteqaat aallaavigalugu oqallisiginnikkasuarnissamut aallartitaqarnissaq ataatsimiititaliamit aalajangiunneqarmat. Ataatsimiititaliamit peqataassapput Steen Lynge (Atassut) aamma Sara Olsvig (Inuit Ataqatigiit). Tassunga atatillugu Nunanut Allanut Sillimaniarnermullu Ataatsimiititaliap aammalu Folketingip Kalaallit Nunaannut ataatsimiititaliaata suliamik qanimut aamma malinnaaffiginnittup akornanni ataatsimeeqatigiinnissaq isumaqatigiissutigineqarsimavoq.

Justus Hansen
Nunanut Allanut Sillimaniarnermullu Ataatsimiititaliami siulittaasoq

Paasissutissat annertunerusut pissarsiarineqarsinnaapput ataatsimiititaliap siulittaasuanut Justus Hansenimut, mobil +299 53 12 10-mut attaveqarnermut.