Nutaarsiassat

Kalaallit-danskit ataatsimut aallartitaat kalaallit puisinniartarnerat illersoriartorlugu aammalu piniarneq piniariaatsillu pillugit paatsoornerit isummallu pigiliutiinnakkat eqqunngitsut ajoraluartumik suli atuuttut nungutinniarlugit pingasunngornermi ull. 22. april Bruxellesimut aallarput.

Aallartitat Europaparlamentimi oqaaseqartartut kiisalu unammilleqatigiinnermut kommissæri Margrethe Vestager aammalu Catrine Norrgård, EU-p niuernermut kommissæriata aallaartitaa ataatsimeeqatigaat. Tamatuma saniatigut danskit norskillu EU-mi ilaasortaatitaat kiisalu amminik tunisassiornermik suliffissuit kattuffiat ataatsimeeqatigineqarput. 

EU-p puisit pillugit peqqussutaa Kalaallit Nunaannut ajoqutaasumik sunniuteqarnerluppoq. Ammit Kalaallit Nunaanneersut piujuartitsinermillu tunngaveqartut avammut tunineqarneranni nalingat ukiualunnguit ingerlanerini 95 pct.-imik appariaateqarpoq - piffissamilu 2008-2012-imi puisinniartartut 34 pct.-imik ikileriarlutik.  

Taamaattumik puisimit tunisassianik niuerutiginninnissamut EU-p inerteqqutaata allanngortinneqarnissaanik Kommissionip siunnersuutaata inerteqqutip sukaterneqaqqinneranik kinguneqannginnissaa, akerlianilli ammit nunatsinneersut piujuartitsinermillu tunngaveqartut tuniniarneqartarnerisa oqilisarneqarnissaata sulissutigineqarnissaa Kalaallit Nunaannut - aammalu piniarnermik inuussutissarsiuteqartut piuinnarnissaannut - aalajangiisuusumik pingaaruteqarpoq.

Tassunga atatillugu "inuit ilaatinneqannginnerisa" ilisimaneqarnerulernissaata annertusarneqarnissaa annertuumik suliniuteqarfissaavoq. Immikkut pineqarluni ilaatinneqannginneq pillugu paasissutissiisannginneq amernik nunatsinneersunik niueruteqarnerup EU-p maleruagassaanik unioqqutitsinerusutut kukkusumik paasineqartarneranut tunngavissiivoq. 

Ataatsimiinnerit anguniagaqarfiusumik ingerlanneqarput. Kommissionip allannguutissatut siunnersuutaanut ernumassuteqarnertik aallartitat nassuiaatigaat aammalu nunatsinni piniartarneq pillugu paasissutissanik saqqummiussillutik. Piniarneq piujuartitsinermik tunngaveqartoq - aammalu uumasut pitsaasumik pineqarnissaat ataqqilluinnarlugu pisartoq - erseqqissaatigineqarpoq.

WWF aamma Greenpeace nunatsinni puisinniartarnermut tapersersuipput.  

Annertunerusumik paasisaqarniaraanni Aalisarnermut, Piniarnermut Nunalerinermullu Ataatsimiititaliap siulittaasua aammalu Nunanut Allanut Sillimaniarnermullu Ataatsimiititaliap siulittaasua saaffigineqarsinnaapput:

Nikolaj Jeremiassen

Aaliarnermut, Piniarnermut Nunalerinermullu Ataatsimiititaliaq

Mobil: +299 53 32 63

Justus Hansen

Nunanut Allanut Sillimaniarnermullu Ataatsimiititaliaq

Mobil: +299 53 12 10