2024 2023 2022 Flere år...
07-05-2015
Siusinaartumik pensionisiat pillugit inatsisissatut siunnersuut Ilaqutariinnermut Peqqissutsimullu Ataatsimiititaliamit suliarineqarpoq
Siunnersuutip aappassaaneerneqarnissaa pingajussaaneerneqarnissaalu UKA 2015-imi ingerlanneqassasoq Ilaqutariinnermut Peqqissutsimullu Ataatsimiititaliap isumaqatigiittup kissaatigaa. Tamatumani inatsisissatut siunnersuutip peqqissaartumik suliarineqarnissaanut pisariaqartumik piffissaqarnissaq qulakkeerumallugu.
Siunnersuutip ulloq 12. marts 2015-imi siullermeerneqarnerata kingorna Inooqat siunnersuut pillugu tusarniaanermi akissuteqaammik tunniussinissaminut periarfissinneqarsimanngitsoq ataatsimiititaliamit immikkut tusarniaaffigineqarpoq. Inooqammit tusarniaanermi akissuteqaammik ataatsimiititaliaq tigusaqarsimalerpoq taannalu tusarniaanermi akissutigineqartut allat peqatigalugit ataatsimiititaliap siunnersuummik assigiinngiiaartumik tunngaveqarluni nalilersuinissaanut tunngavissiissaaq.
Siusinaartumik pensionisiat pillugit siunnersuut ilusiligaanermigut paasiuminaatsuuvoq isumaginninnermullu inatsisinut allanut atatillugu isiginiarneqartussaalluni, taamaalilluni siunnersuummi aalajangersakkat ataasiakkaat annertunerusumik paasisaqarfiginissaat siunertaralugu siunnersuut pillugu inatsisissamik nalilersuilluni ataatsimiinneq siulleq ataatsimiititaliamit ingerlanneqarpoq. Siunnersuut pillugu inatsisissamik nalilersuilluni ataatsimiinnissaq minnerpaamik ataaseq suli amigaataavoq. Ataatsimiinnermi tassani siunnersuutip aningaasatigut kingunerisassai sukumiinerusumik ersersinneqarumaarput.
Nunatsinni innuttaasut 3000-t tungaanut amerlassusillit siusinaartumik pensionisiaqartut missingerneqarpoq, taamaattumik siunnersuut pisariaqartinneqartutut peqqissaarullugu nalilersorneqassasoq ataatsimiititaliami isumaqatigiissutigineqarpoq. Siusinaartumik pensionisiallit pillugit malittarisassaalerumaartut kommuninit aqunneqartussaammata inatsisissap suliarinerani KANUKOKA-mik ataatsimeeqateqarnissaq ataatsimiititaliamit isumaliutigineqarpoq. Aamma Naalakkersuisunut ilaasortanik attuumassuteqartunik ataatsimiititaliaq sukumiinerusumik oqaloqateqarlersaarpoq. Taamaattumik isumaliutissiissummi siunnersuummut inaarutaasumik ataatsimik arlalinnilluunniit inassuteqaateqannginnermi paasiniagassat suli amerlapput.
Siunnersuummik suliaqarnissani ataatsimiititaliap qilanaaraa.
Tillie Martinussen
Ilaqutariinnermut Peqqissutsimullu Ataatsimiititaliap siulittaasua
Annertunerusumik paasissutissat pillugit ataatsimiititaliap siulittaasua ugguuna attavigineqarsinnaavoq mobil +299 27 49 27.