Nutaarsiassat

05-06-2015

Puisinit nioqqutissiat: Inatsisartut ataatsimiititaliaasa EU-mi taasineq nuannaarutigaat, ilungersuuteqarnerulli ingerlaannarnissaa kaammattuutigalugu.

Nunat Avannarliit Killiit Siunnersuisoqatigiiffiannut Inatsisartut aallartitaasa, Inatsisartut Nunanut Allanut Sillimanianermullu Ataatsimiititaliaata aamma Aalisarnermut, Piniarnermut Nunalerinermullu Ataatsimiititaliaata EU-p inatsisartuini taasineq nuannaarutigaat, tamatumani killeqanngitsumik niueqateqarsinnaanermut atuisartullu illersorneqarnissaannut ataatsimiititaliap (IMCO) EU-p "puisinniartarneq pillugu peqqussutaata" allanngortinneqarnissaanut siunnersuut taasissutigimmagu.

EU-p ataatsimiititaliaata akueraa nunatsinni puisinniartarneq kulturitta kinaassutsittalu ilagilluinnaraa pingaarutilik, taamatullu aamma takutillugu piumassuseqarluni "naggueqatigiit Inuit puisinit nioqqutissiaasa" inerteqquteqarnermit ilaatinneqannginnerata siunertamisut atuutsinneqalernissaanut. Taamaalilluni ataatsimiititaliap peqatigitillugu kaammattuutigaa naggueqatigiit Inuit eqqusseqqusinnginnermut ilaatinneqannginnerat pillugu paasisitsiniaasoqassasoq, neriuutigineqarluni taamaaliornikkut nunatsinni puisinniartarnermut atatillugu paatsuungassutaasinnaasut peerneqarnissaat, taamaaliornikkullu ilaatigut puisit amiinik avammut nioqquteqarsinnaaneq annertusillugu.

Taasineq nunatta ajugaaneraa pingaarutilik - Danmarkimi nunatsinnilu qinikkat atorfillillu anguniarlugu sukataarutigisimasaat. Taamaalillutik Nunat Avannarliit Killiit Siunnersuisoqatigiiffiannut Inatsisartut aallartitaat, Inatsisartut Nunanut Allanut Sillimaniarnermullu Ataatsimiititaliaat aamma Aalisarnermut, Piniarnermut Nunalerinermullu Ataatsimiititaliaat isumaqatigiinniarnernut timitalimmik peqataasimapput, ataatsimiititaliat EU-mi susassaqartunik ingerlaavartumik attaveqartarnerisigut, ilaatigullu Bruxellesimut Strasbourgimullu tikeraartarnerisigut.

Pingaaruteqarporli erseqqissassallugu taasineq isumaqatigiinniarnerni sivisuumik ingerlasinnaasuni alloriarneq siulliinnaammat EU-mimi isumaqatigiinniarnerit suli naammassineqanngimmata. Taamaattumik kikkunnut tamanut nunatta soqutigisaanik illersuineq ingerlatiinnaqqullugu kaammattuutigaarput - qularineqassanngilarlu sapaatit akunnerini qaammatinilu aggersuni isumaqatigiinniarnerit Inatsisartunit sukumiisumik malinnaavigiumaaratsigit.

Paasissutissat sukumiinerusut ukununnga saaffiginnilluni pissarsiarineqarsinnaapput: