2024 2023 2022 Flere år...
22-06-2015
Nutaamik inatsisartoqarfiliornissamik pilersaarutit taamaatiinnarneqarput
Inatsisartoqarfimmik nutaamik sananissaq pillugu Inatsisartut aalajangigaata piviusunngortinneqarnissaanut partiit akornanni amerlanerussuteqartoqarunnaarsimasoq Inatsisartut Suleriaatsimut Ataatsimiititaliaata tallimanngornermi ulloq 19. juni 2015-imi ataatsimiinnerani paasinarsivoq. Taamaattumik pilersaarutit taamaatiinnarneqarput.
Tassunga atatillugu Inatsisartut Siulittaasuat Lars-Emil Johansen ima issuaavigineqassaaq:
"Inatsisartoqarfimmik nutaamik sananissaq pillugu Inatsisartut aalajangigaat uanga Inatsisartut siulittaasuattut unneqqarillunga ingerlanniarsimavara. Taama aalajangerneq Inatsisartunut ilaasortat amerlanerussuteqarluartut november 2013-imi taperserpaat. Aalajangiinerulli taassuma piviusunngortinnissaa tapersersorluarneerussimasoq paasivara. Tamanna tusaatissatut tiguara.
Tamatuma kinguneraa suliniut taamaatiinnarneqartariaqarmat aammalu Inatsisartut Inatsisartunullu ilaasortat inini maanna atorneqartuniiginnartariaqarnerat atugaasalu taamaaginnartariaqarnerat."
Siulittaasoqarfik sinnerlugu
Lars-Emil Johansen
Inatsisartut Siulittaasuat
Annertunerusumik paasisaqarusukkaanni saaffigineqarsinnaavoq Inatsisartut Siulittaasuat Lars-Emil Johansen, mobil +299 55 19 15.