2024 2023 2022 Flere år...
30-11-2015
Suliaq naammassineqarpoq. Aalisarnermut Ataatsimiititaliap "avaleraasartuut pillugit suliaq"-mik suliarinninnini naammassivaa
2015-imi avaleraasartuunit pisassiissutit pillugit ingerlatsinermik kukkunersiuilluni misissuinermut atatillugu Aalisarnermut, Piniarnermut Nunalerinermullu Ataatsimiititaliaq ima oqaaseqassaaq:
Avaleraasartoortassanik ukiumut agguataarinerup annertuumik oqallisigineqarnerani ingerlatsinerup arlaannaannulluunniit attuumassuteqanngitsunit immikkullu misissorneqarnissaanut Naalakkersuisut iliuuseqarnerat nersortariaqartutut ataatsimiititaliamit isigineqarpoq.
Misissuineq ataatsimiititaliamit tusaatissatut tiguneqarpoq, tassungalu ilanngullugu Aalisarnermut, Piniarnermut Nunalerinermullu Naalakkersuisup nammineq soqutigisaminik salliutitsiniarluni ingerlanneqarneranut sunniiniarsimaneranut imaluunniit misiliigaluarsimaneranut takussutissaqanngitsoq kukkunersiuisoq avataaneersoq isumaqartoq maluginiarlugu.
Misissuinermili pissutsit arlallit uparuarneqarnissaannut ataatsimiititaliamut pissutissaqalersitsipput. Taamaalillunilu suliamut attuumassuteqarnermik ajornartorsiutip saaffiginnissutiginissaanut ingerlatsinermi siusissukkut iliuuseqartoqarsimannginnera ataatsimiititaliamit sakkortuumik uparuarneqarpoq.
Tamatuma peqatigisaanik tunniussinissamut piumasaqaatit aallaqqaataanilli erseqqissumik nassuiaatigineqarsimannginnerat, tamatumalu kingorna piumasaqaatinik allanik taakkulu qanoq paasineqarsinnaanerannik qinnuteqartunut siumoortumik ilisimatitsissutigineqanngitsunik ilaneqarnerat ataatsimiititaliamit naammaginartinneqanngilaq. Taamaattumillu tamannattaaq pissutigalugu tunniussinermi suliaq tamakkiisumik ammasumik ingerlanneqarsimanngilaq.
Misissuinermit kaammattuutigineqartut Aalisarnermut, Piniarnermut Nunalerinermullu Naalakkersuisoqarfimmit malinneqalersaarmata ataatsimiititaliap naammagisimaarlugu maluginiarpaa, taamaalilluni avaleraasartoortassanik siunissami aqutsineq - pingaartumillu tunniussinissamut piumasaqaatit ersarinnerusinnaaqqullugit. Tassunga atatillugu ataatsimiititaliap Naalakkersuisoqarfik tapersersorpaa.
Tusagassiorfinnut nalunaarut Aalisarnermut, Piniarnermut Nunalerinermullu Ataatsimiititaliaq isumaqatigiittoq sinnerlugu nassiunneqarpoq.
Nikolaj Jeremiassen
Aalisarnermut, Piniarnermut Nunalerinermullu Ataatsimiititaliap siulittaasua
Annertunerusumik paasisaqarusukkaanni saaffigineqarsinnaavoq ataatsimiititaliap siulittaasua Nikolaj Jeremiassen, mobil +299 53 32 63.