2024 2023 2022 Flere år...
28-01-2016
Nunat Avannarliit Siunnersuisoqatigiiffianni ilaasorta Ineqi Kielsen Nunat Avannarliit Siunnersuisoqatigiiffiata ukioq manna ataatsimiinnerini siullerni Inatsisartut sinnerlugit peqataavoq.
Helsinkimi januaarip ulluisa 25.-26.-anni Nunat Avannarliit Siunnersuisoqatigiiffiata ataatsimiititaliaasa 2016-imi ataatsimiinnerini siullerni Ineqi Kielsen peqataavoq.
Nunat Avannarliit attanneqarsinnaanerannut ataatsimiititaliap ataatsimiinnerani ilaatigut nunani avannarlerni eqqagassalerinermut politikimik suliaqarneq, tassunga ilanngullugu plastikimik, poortuutinik, atueqqittarnermik nerisassanillu maanaannartitsisarnermik ajortorsiutit oqaluuserineqarput.
Ineqi Kielsen aalisarnermik aqutsineq pillugu ataatsimiititaliap oqaaseqartartuatut toqqarneqarpoq aammalu atuuffiup tamatuma immersornissaa sammisallu susassaqarfiusup tamatuma immikkut aallunnissaa qilanaaralugu.
Nunat Avannarliit Siunnersuisoqatigiiffianni ataatsimiititaliat 2016-imi nutaamik aaqqissuunneqarput aammalu Inatsisartunut ilaasortat ataatsimiititaliani taagorneqartunik pingaarnertut suliassaqarfeqartuni makkunani ilaasortaapput:
Qulequttat suliassallu avatangiisinik pinngortitamillu illersuinermut, pinngortitami pisuussutinut - tassunga ilanngullugu nunalerinermi, aalisarnermi orpippassuarnillu atuinermi pisuussutinik atorluaanermut attuumassutillit Nunat Avannarliit attanneqarsinnaanerannut ataatsimiititaliap suliarisarpai.
Silap pissusaa pillugu apeqqutit sulianut pingaarutilittut aamma ilaapput - tassunga ilanngullugit silap pissusaata allanngoriartornerata kingunerisai pingaartumik nunani avannarlerni avannarpasinnerpaanut, assersuutigalugu Kalaallit Nunaannut sunniuteqartut aammalu sermersuup aakkiartornerata najukkanut nunarsuarmullu sunniutai.
Qulequttat suliassallu kultureqarnermut, ilisimatusarnermut ilinniartitaanermullu, tunngaviusumik piareersarfiusumillu atuarfinnut, inersimasunik ilinniartitsinermut innuttaasunillu paasititsiniaanermut - tassunga ilanngullugu oqaatsit pillugit suleqatigiinneq pillugu sulianut, tusagassiuutinut nutaanut, piginnaasanik ineriartortitsinermut ilinniartitaanernillu nutarterinermut attuumassutillit kultureqarnermut ilisimatusarnermullu ataatsimiititaliap suliarisarpai.
Ataatsimiititaliap sammisaanut aamma ilaapput inuiaqatigiit atugartuut aammalu namminneq piumassutsiminnik suliaqartut nukissaat suliaallu.
Kiisalu timersorneq, oqaatsit, filmit tusagassiuutillu, eqqumiitsuliorneq kulturilu nalinginnaasut assigiinngissitaartullu aammalu meeqqat inuusuttuaqqallu piorsarsimassusiat ataatsimiititaliap suliassaqarfiinut soqutigisaqarfiinullu ilaapput.
Nunat avannarliit suleqatigiinneranni aaqqissuussaq tulliullugu ingerlanneqartussaq tassaavoq nunat avannarliit isumasioqatigiinnerat Nuummi Katuami ulloq 10. Februar 2016-imi ingerlanneqartussaq.
Peqqissutsimut Nunanillu Avannarlernik suleqateqarnermut Naalakkersuisoq, Doris Jakobsen aammalu nunatsinnit aallartitanut siulittaasoq, Ineqi Kielsen, isumasioqatigiinnissamut ilaatigut qaaqquaat Nunat Avannarliit Siunnersuisoqatigiiffianni siulittaasoq, Henrik Dam Kristensen aammalu nunat avannarliit suleqatigiinneranni ministerit Ålandimeersut Savalimmiuneersullu.
Nunat Avannarliit Siunnersuisoqatigiiffianni aammalu Nunat Avannarliit Ministerinut Siunnersuisoqatigiiffianni suleqatigiinnermut 2016-imi naalakkersuinikkut naatsorsuutigisat isumasioqatigiinnermi saqqummiunneqassapput, tamatumalu saniatigut Killeqarfinni akimmisaarutit pillugit siunnersuisooqatigiit (Grænsehindringsrådet) suliaat pillugit ilisimatitsisoqassalluni.
Iddimanngiiu Bianco silap ajornera teknikikkullu ajornartorsiutit pissutigalugit ataatsimiinnerni peqataanngitsoorpoq.
Annertunerusumik paasisaqarusukkaanni attavigineqarsinnaavoq Ineqi Kielsen, mobil 58 73 31.
Nunat Avannarliit Siunnersuisoqatigiiffiat inatsisartutigoortumik suleqatigiiffiuvoq Norgemit, Danmarkimit, Sverigemit, Finlandimit, Islandimit nunanillu namminersorfiusunit Savalimmiunit, Kalaallit Nunaannit Ålandimillu inatsisartunut ilaasortanik 87-inik ilaasortalik.
Inatsisartut Nunat Avannarliit Siunnersuisoqatigiiffianni marlunnik ilaasortaatitaqarput. Ineqi Kielsen, Siumut aammalu Iddimanngiiu Bianco, Inuit Ataqatigiit Nunat Avannarliit Siunnersuisoqatigiiffianni ilaasortaapput.
Iddimanngiiu Bianco nunani avannarlerni kultureqarnermut ilisimatusarnermullu ataatsimiititaliamut ilaasortaavoq aammalu Ineqi Kielsen nunat avannarliit attanneqarsinnaanerannut ataatsimiititaliamut ilaasortaalluni