Nutaarsiassat


2019 2018 2017 Flere år...

05-02-2016

Aalisarnermut ataatsimiititaliaq siunersiuinissamut aggersaavoq.

Aalisarnermut, Piniarnermut Nunalerinermullu Naalakkersuisoq februaarip ulluisa aqqarnani 2016 Aalisarnermut, Piniarnermut Nunalerinermullu ataatsimiititaliap siunersiuinissamut aggersarpaa.

 

Siunersiuinermi Aalisarneq pillugu inatsimmik allanngortiteriniarnermi imarisassai piffissalersuinerillu pillugit Naalakkersuisoq nassuiaateqaqquneqassaaq, ilanngunneqassappullu akuersissutinik tunniussisarneq pisassiissutillu pillugit tunngavigineqartut.

 

Ataatsimiititaliami siulittaasoq Nikolaj Jeremiassen ima oqaaseqarpoq:

 

"Aalisarneq pillugu inatsit sivisuumik utaqqineqarsimavoq, ilimagaarpulli Naalakkersuisut missingiummik inaarsaallutik naammassingajalersut, qanittukkullu taanna saqqummiunneqarsinnaassagunartoq."

 

"Naalakkersuisut saqqummiussinissamut tunuarsimangaatsiarsimapput. Naalakkersuisut sulinissaminnut periarfissinneqartariaqarnerat Ataatsimiititaliap ataqqivaa, isertuunneqassanngilarli akuutitsinerunissaq imaluunniit suliap ingerlarnga pillugu annertunerusumik ilisimatitsisarnissaq Ataatsimiititaliamit isumagineqaraluarmat. Tamannalu tunngavigalugu siunersiuinissamut aggersaasoqarpoq"

 

"Peqatigitillugu aalisarsinnaanermut akuersissutit aamma pisassiissutit pissusiviusutigut qanoq tunniunneqarlutillu agguaanneqartarnersut pillugit Naalakkersuisup nassuiaanissaanut Ataatsimiititaliaq pissutissaqarpoq. Maanna aaqqissuussineq taamaalilluni ersernerluttortaqartoq qularnannqitsumik isumaqartoqarpoq, tamannalu (naalakkersuinikkut ingerlataqartutut) isummersorfigisariaqarparput."

 

Tusagassiorfinnut nalunaarut Aalisarnermut, Piniarnermut Nunalerinermullu ataatsimiititaliamit isumaqatigiissutigineqartutut nassiunneqarpoq.

 

 

Nikolaj Jeremiassen

Aalisarnermut, Piniarnermut Nunalerinermullu ataatsimiititaliami siulittaasoq

 

 

Paasissutissanik amerlanerusunik Ataatsimiititaliami siulittaasua Nikolaj Jeremiassen qinnuigineqarsinnaavoq, attavigisinnaavat mobil +299 53 32 63.