2024 2023 2022 Flere år...
18-03-2016
Ilinniartitaanermi periuseq inissaqartitsilluartoq - imaluunniit qanoq?
Nunatsinni atuarfik ulluuneranilu paaqqinnittarfiit pillugit oqallinneq tamanit ilisimaneqarpoq. Inissaqarluartitsinissaq aaqqiissutissaavoq. Atuarfinni ulluuneranilu paaqqinnittarfinni tamani meeqqat tamarmik inissaqartinneqassapput. Tamatumani apeqqutaatinneqassanngillat timikkut tarnikkulluunniit pisariaqartitat, ikorfartorneqarnissamik periarfissat, sulisut katitigaanerat il.il. Inissaqarluartitsinissaq isumaqatigalugu isumaqatiginagulu tunngavilersuutit amerlapput. Inuusuttuarartattali meeraanermit inuusuttuaranngortarneranni inissaqartitsilluarneq tamanna sumut pisarpa?
Kultureqarnermut, Ilinniartitaanermut, Ilisimatusarnermut Ilageeqarnermullu Ataatsimiititaliaq ilaatigut ulluunerani paaqqinnittarfinnut arlalinnut, ilinniarnertuunngorniarfimmut, Ilinniarfissuarmut Ilisimatusarfimmullu sapaatip akunnerani qaangiuttumi takuniaasaqattaarpoq. Unammilligassat, iluatsilluartut, periusissat qimerluukkallu oqaloqatigiissutigineqarput. Aqutsisut qimerluugallit, aqutsisut ullumikkut inuusuttuaqqat ineriartornissamik iluatsitsilluarnissamillu anguniagaqarusunnerannik isumaqataasut aqutsisullu pisariaqartitsinerpaanut pimoorussisut.
Ulluunerani paaqqinnittarfiit ilinniarfiillu ulluinnarni sulisussaaleqinermik, aserfalasimasunik illutaqarnermik, ilinniarunnaartartunik, pikkorissartannginnermik il.il. tamarmik immikkut unammilligassaqarlutik qimerluukkaminnik periusissaminnillu ineriartortitsiniarsaripput. Inuusuttuarartatta inersimasunngornissamut piareersarneqarnissaat ilinniarfiit paaqqinnittarfiillu tamarmik immikkut periuseqarlutik sapinngisaminnik iliuuseqarfiginiaraat ataatsimiititaliaq isumaqarpoq. Sukkulli ataqatigiittoqarpa? Angerlarsimaffiup, ulluunerani paaqqinnittarfiup, ilinniarnertuunngorniarfiup inaarutaasumillu ilinniartitaanerup akornanni ikaarsaariarfiit qanorpiaq imminnut atassuteqarpat? Imaluunniit periutsimik ineriartortitsisimanerpugut inuusunnersagut inuunerminni sumulluunniit killikkaluarunik nutaavinnik ilisimasaqarfigineqanngitsunillu tamatigut aallartitsisarlutik?
Ulluunerani paaqqinnittarfitta nalinginnaasut atuarfittalu pisariaqartitat amerlanerujartuinnartut isumaginiaraat ilinniartitaanikkut periutsip sinnerani ineriartorneq allatut ingerlasoq ataatsimiititaliaq isumaqarpoq. Nunatsinni ilinniartitaanernik pitsanngorsaarniarnermi ilinniarnerminnillu unitsitsiinnartartunik ikilisaaniarnermi nunatsinni ilinniartitaanerit ilaanni tiguneqarnissamut piumasaqaatit sukateriffigineqarput. Taamaaliornikkut ilinniarnerminnik naammassinnittut piginnaasaat qaffanniarsarineqarput. Karakteeritigulli piumasaqaatit qaffakkaanni ilinniarnerminnik naammassinnittut karakteerii qaffasinnerit ilinniartitaanerit pitsanngoriarnerannut takussutissaanngillat atuartulli ilinniakkatigut pikkorinnerulereersut aallunneqarnerannut takussutissaapput.
Ilinniartitaanerit pitsaassusiannik qaffassaaniarnermi qaffasissutsinik aalajangersimasunik angusaqarniareersut mattunneqaannarnerat ataatsimiititaliamit ernumanartoqartinneqarpoq. Inissaqarluartitsinissaq sumiippa? Aammalu inuit ilinniarnissamut mattunnissaat akissaqartipparput? Inuusuttuaqqat qaffasinnerusumik angusaqanngitsut qanoq iliussappat? Nunatsinni ilinniarfiit inunnik ilinniartitsiniarlutik inuiaqatigiinni akisussaaffeqarpat imaluunniit inuit ataasiakkaat namminneq tamanna aalajangissavaat? Apeqqutit tunngaviusut taamaattut ilaatigut Naalakkersuisunik oqaloqateqartarnermigut ataatsimiititaliap sulissutigeqqinniarpai.
Kultureqarnermut, Ilinniartitaanermut, Ilisimatusarnermut Ilageeqarnermullu Ataatsimiititaliaq sinnerlugu
Vivian Motzfeldt
Ataatsimiititaliap siulittaasua
Annertunerusumik paasisaqarusukkaanni saaffigineqarsinnaavoq ataatsimiititaliap siulittaasua, mobil+299 55 56 41.