2024 2023 2022 Flere år...
15-09-2016
Inuusuttut 18-it 24-illu akornannik ukiullit 2017-imi Inuusuttut Inatsisartuinut peqataanissamut maanna qinnuteqarsinnaalerput
Inuusuttut Inatsisartuinut tullernut, 2017-imi februarip 20-aniit 24-anut ingerlanneqartussamut, peqataanissamut qinnuteqarsinnaaneq ullumikkumiit periarfissaalerpoq. Inuusuttut 18-it 24-illu akornanni ukiullit tamatumani anguniarneqarput. Peqataanissamut qinnuteqarsinnaanermut ulloq 31. oktober 2016 killiliunneqarpoq.
Inuusuttut Inatsisartuini sammineqassaaq "Nunatsinni tunngaviusumik inatsit: Namminerisatsinnik tunngaviusumik inatsiseqalernissarput piffissanngorpa?" Sammisamut paasissutissat erseqqinnerusut, pisussanut pilersaarutit peqataasinnaanermullu piumasaqaatit nittartakkami inu.gl-imi nassaarineqarsinnaapput. Tamatuma saniatigut Facebookimi qupperneq aaqqissuussaq sioqqullugu sammisaq pillugu oqalliffiusinnaallunilu isummersorfiusinnaasoq pilersinneqarsimavoq.
Inatsisartut oqartussaaqataanerlu pillugit peqataasut tunngaviusumik ilisimasaannik annertusaanermik aallarniuteqartillugu Kalaallillu Nunaanni tunngaviusumik inatsit pillugu oqallinnermik malitseqartillugu pisussanut pilersaarut suliarineqarsimavoq. Isiginnaagassiamik takutitsisoqassaaq, nalorsitsaarisoqarluni, sammisamut immikkut ilisimasalinnit saqqummiussisoqarluni Inatsisartullu ataatsimiittarfianni, siunnersuutinik suliarisimasanik saqqummiussiviusumik illersuiffiusumillu, ataatsimiittoqarluni. Peqataasullu naggataagut inaarutaasumik nalunaarummik Inatsisartut Siulittaasuannut Naalakkersuisullu Siulittaasuannut tunniussinissaat ilimagineqarpoq.
Katillugit peqataasunut 36-inut inissaqartitsisoqarpoq. Nittartakkakkut inu.gl-ikkut oqarasuaammulluunniit (iPhonemut Androidimulluunniit) inu.gl-ip app-ia aariarlugu peqataanissamut qinnuteqartoqarsinnaavoq. Ingerlaqqiffiusumik ilinniarfiit, atuagaateqarfiit tamarmik kiisalu inuusuttut kattuffiat Sorlak allagartarsuarmik, aaqqissuussamik nalunaarutiginnittunik, inu.gl-illu app-ianut ingerlaqqiffissiamik toqqaannartumik pilerneqarsimasunik maanna nassitsiffigiortorneqarput. Tamatuma saniatigut KNR sapaatip akunnerini tullerni arfinilinni 2017-imi Inuusuttut Inatsisartui pillugit ussassaarummik aallakaatitsisassaaq.
Inuusuttut akornanni oqalliseqataanissamut piumassuseqarluarnermik neriuuteqarlunga.
Lars-Emil Johansen
Inatsisartut Siulittaasuat
Erseqqinnerusumik paasisaqarumalluni uunga saaffiginnittoqarsinnaavoq: Paasissutissiisarnermik suliniutinillu suliaqartoq Nils Baum oqarasuaat 34 61 14.