Nutaarsiassat


2019 2018 2017 Flere år...

17-09-2016

Inatsisartut Siulittaasuata Lars-Emil Johansenip Naalakkersuisut Siulittaasuat kuultiusumik Nersornaaserpaa

Inatsisartut Siulittaasuata ullumi Hans Egedep Illuani Naalakkersuisut Siulittaasuat Kim Kielsen kuultiusumik Nersornaaserpaa ukiorpassuarni naalakkersuinikkut suliaqarsimaneranik Naalakkersuisunullu Siulittaasuuneranik nersorinnissutitut.

 

Inatsisartut Siulittaasuata Lars-Emil Johansenip Kim Kielsenimut oqaaseqarnermini ilaatigut erseqqissarpai:

 

Oqalugiaat

 

"2005-imiit Inatsisartunut ilaasortaaninni assigiinngitsorpassuarnik atuuffeqarsimavutit, aatsitassanut avatangiisinullu tunngasut aamma inuussutissarsiortunut atugassarititaasut immikkut annerusumik sammisimallugit. (...) Taamatuttaaq nunat avannarliit suleqatigiinneranni apeqqutit avatangiisinut tunngasut pingaartissimavatit.

 

2007-imi naalakkersuisunut ilaasortanngoqqaarputit, 2007-imiit 2009-mut Attaveqaqatigiinnermut Avatangiisinullu Naalakkersuisutut, tamatumalu kingorna 2013-miit 2014-imut Avatangiisinut, Pinngortitamut Nunallu Avannarliit Suleqatigiinnerannut Naalakkersuisutut. Ingasattajaarnanga aamma oqaatigissavara ukioq 2014 naalakkersuinermik suliaqarnerit eqqarsaatigalugu ilinnut immikkorluinnaq issimammat, tassami ukioq taanna partiimut siulittaasunngorlutillu Naalakkersuisunut siulittaasunngorputit.

 

Naalakkersuinikkut sulinerit najukkani ataasiakkaani inuiaqatigiit atugaannik sukumiisumik ilisimasaqarnermik aallaaveqarpoq, naalakkersuinikkullu isiginneriaatsit najukkani pissutsinik, minnerunngitsumik innuttaasut ulluinnarni atugaannik, toqqammaveqarluni. (...) Naalakkersuinikkut sulisimanippit annertuumik tunniussimallutillu sulisimanerit takutippaa, tamannalu Siulittaasoqarfiup nersorniarpaa matumani kuultiusumik Nersornaaserneqarnikkut."

 

 

Siulittaasoqarfik sinnerlugu

 

Lars-Emil Johansen

Inatsisartut Siulittaasuat