Nutaarsiassat


2019 2018 2017 Flere år...

24-10-2016

Inatsisartut ataatsimiinnerisa nalaanni ilaasortat akikinnerusumik najugaqartinneqarsinnaanerannik periarfissanik misissuineq

Inatsisartunut ilaasortat aalajangersimasunik najugaqarfissaannik pilersitsinissamut periarfissanik misissuinissamik siulittaasoqarfiup suleriaatsimullu ataatsimiititaliap kissaataasa tunuliaqutaat pillugit tusagassiorfitsigut isummanik taamaassorinninnernillu saqqummersoqallattaarpoq naqqiuteqarfiusariaqartunik. Kissaatiginaraluaqaarmi suliassami sunarpiaq pineqarnersoq tusagassiorfiit innuttaasunut eqqortumik saqqummiunniarsimasuuppassuk.

 

Taamaattumik aamma pissusissamisoorlunilu kissaatiginarsimassagaluarpoq tusagassiorfiit Inatsisartut siulittaasoqarfiannut saaffiginnissimasuuppata suliniummut tunuliaqutaasunik paasissutissanik sukumiinerusunik pissarsiniarlutik, tamatumunnga nalinginnaq pissutaasorisaminnik, siulittaasoqarfiup pissutiginngisaannik, siammarterilinnginnerminni.

 

Suliassamut tunuliaqutaarpiartunik pissutaarpiartunillu innuttaasut paasitinneqartariaqarput, nuannaartorisarsorluni aliikkusersuiniaannarlunilu isummat pinnagit pissusiviusunik ilisimatinneqartariaqarlutik.

 

Sanaartorfissami ingutserneqartussap danskisut atequsia quiagalugu illaatigiunnaarutsigu, taava immaqa suliassami sunarpiaq pineqarnersoq tikissinnaagaluarparput.

 

Ullumikkut qinigaaffimmilu atuuttumi Inatsisartunut ilaasortat Nuup avataani najugallit 21-iupput. Ataatsimiinnerit nalaanni taakku inissiani attartukkani assigiinngitsuni illoqarfimmi sumiiffinni assigiinngitsuni najugaqartinneqartarput. Taamaattumik taamatut akisuumik attartornerit, akunnittarfiuppat inissiaappalluunniit apeqqutaatinnagu, eqqarsaatigalugit nutaamik eqqarsarnissaq pisariaqarpoq, tamatumunnga ukiut tamaasa Inatsisartut aalajangersimasumik aningaasartuutigisartagaasa qaffasippallaarnerat pissutigalugu.

 

Ilaasortat ataatsimiinnerit nalaanni Inatsisartut akiligaannik najugaqarsinnaatitaapput, ilaasortallu Nuup avataaneersut taama inissaqartinngikkaanni Inatsisartut ataatsimiinneri ingerlanneqarsinnaassanngikkaluarlutik.

 

Siulittaasoqarfiup periarfissanik misissuinerminut atatillugu Naalakkersuisunut paasiniarsimavaa pisortat inissiaataanni attartortittakkani atuuttuni qanoq periarfissaqartiginersoq, taamatullu aamma Naalakkersuisut sanaartorfissaateqarnersut piukkunnartunik inissianik pisariaqartinneqartutut amerlassusilinnik sanaartorfiusinnaasunik.

 

Paasiniaanermut tamatumunnga atatillugu Naalakkersuisut allattoqarfiinit ilisimatitsissutigineqarpoq pisortat inissiaataanni attartortittakkani tamatumunnga periarfissaqanngitsoq, taamatullu aamma ilisimatitsissutigalugu Noorlerni nunaminertaqartoq sanaartorfiusinnaasumik. Inatsisartuni aarlaannaataluunniit sanaartorfissaq pineqartoq immikkut tikkuarsimanngilaa, akerlianilli periarfissatut ilisimatitsissutigineqarluni.

 

Ullumikkut pissusiviusut imaapput Inatsisartut qaammammut ilaasortamut ataatsimut ineqarnermut 25.000 kr.-it missaannik akiliuteqartariaqartarmata, ataatsimiinnerup ingerlanerani atorneqarneqartussatut attartukkat eqqarsaatigalugit.

 

Eqqarsaatigigaannilu ilaasortat 21-it Nuup avataani najugaqartut ukiumut Inatsisartut ataatsimiinnerini marluusuni qaammatit tallimat missaanni Nuummiittariaqartartut, taava Inatsisartut qaammatinut tallimanut pineqartunuinnaq ineqarnermut akiliutitut 2,5 mio. kr.-it missaat atortariaqartarpaat. Allatut oqaatigalugu ataatsimiinnernut marlunnut ilaasortap ataatsip najugaqartinneqarneranut nunatta karsiata ukiumut 125.000 kr.-it akilertariaqartarpai.

 

Siulittaasoqarfiup kissaatigisimavaa paaserusullugu akikinnerusumik inissaqartitsisoqarsinnaanersoq, soorlu periarfissanut pisortat namminneq pigisaannut aqutaannullu akiliuteqartarnikkut. Siulittaasoqarfiup qularutiginngilaa taamaaliornikkut ukioq naallugu attartornermut ineqarnermut akiliut affaanngortinneqarsinnaasoq, ullumikkut qaammatini tallimani attartornermut akiliutaasartup affaannaanik akiliilluni.

 

Siulittaasoqarfiup taamaalilluni anguniarpaa ilaasortanut ineqartitseriaatsimik allamik nassaarnissani, ajornanngippat qaammatinut tallimanut 125.000 kr.-inik ineqarnermut akiliuteqartarneq affaannanngortillugu qaammatinullu aqqaneq-marlunnut siaarlugu, inissiani pisortat namminneq pigisaanni nalinginnaasumik ineqarnermut akiliutigineqartartumut inissiallu annertussusianut naapertuuttumik akilersorneqartussanut.

 

Pissusiviusut imaapput inissianik attartornermut aningaasartuut pinngitsoorani aningaasartuutigineqartussaammat, naatsorsuutigineqarlunilu aningaasartuut tamanna ukiumut 2,5 mio. kr.-init akikinnerusinnaasoq.

 

Tamannarpiarlu tunngaviuvoq suliassap sukumiinerusumik qulaajaavigineqarnissaanik suleriaatsimut ataatsimiititaliap kissaateqarsimaneranut. Taamaattumik aningaasaqarniarneq aallaavigalugu suliassamik isiginninneq tamanna aallaaviusimavoq ineqarfinnik, pisortat namminneq pigisaannik, akikinnerusumik pilersitsisinnaanermut periarfissat misissorneqarnissaannik kissaateqarnermut, taamaaliornikkut aamma aningaasat pineqartut nunatsinniiginnarnissaat qularnaarniarlugu.

 

Siulittaasoqarfiup taamaattumik suliassap tusagassiorfinni taamaassorinninnernik tunngaveqarluni naapertuutinngitsumik sammineqarnera ilisarisinnaanngilaa.

 

 

Inatsisartut Siulittaasoqarfiat