2024 2023 2022 Flere år...
06-04-2017
Stockholmimi Nunat Avannarliit Siunnersuisoqatigiiffiata aalajangersimasumik qulequtaqartitsilluni ataatsimiinnera Inatsisartunit peqataavigineqartoq.
Ulloq 4. april 2017 kommunalbestyrelsinut qinersinerup inaarutaasumik inernera nunatsinni innuttaasut pissangallutik utaqqileruttoraat Inatsisartunut ilaasortaq, Mimi Karlsen, Inuit Ataqatigiit, ulluni 3. – 4. april 2017 Nunat Avannarliit Siunnersuisoqatigiiffiata aalajangersimasumik qulequtaqartitsilluni ataatsimiinneranut peqataavoq.
Apriilimi Nunat Avannarliit Siunnersuisoqatigiiffianni ataatsimiinnerit Aalajangersimasumillu qulequtaqartitsilluni ataatsimiinneq ukiut tamaasa pisarput, nunani avannarlerni inatsisartunit tamanit ilaasortat naapittarlutik naalakkersuinikkut apeqqutit suliassallu oqallisaasut toqqakkallu eqqarsaatigalugit misilittakkanik, ilisimasanik, isummanik paarlaasseqatigiinniarlutik aalajangiiniarlutillu.
Partiikkaartumik ataatsimiinnerit ulloq 3. april aallartereerput, tamatumanilu Mimi Karlsen, nunani avannarlerni socialistit saamerliit qorsuillu; Venstresocialistiske Grønne partigruppe VSG, nunat avannarliit suleqatigiinneranni Inuit Ataqatigiit suleqatigisaasa, ataatsimiinnerannut peqataalluni.
Ataatsimiinnerit tulliit Nunani avannarlerni Ilisimasanut Kulturimullu Ataatsimiititaliami ingerlanneqarput.
Nunani avannarlerni Ilisimasanut Kulturimullu Ataatsimiititaliaq qulequttat suliassallu kulturimut, ilisimatusarnermut ilinniartitaanermullu, meeqqat atuarfiannut, inersimasunik ilinniartitsinermut inunnillu qaammarsaanermut tunngasut – suliassat oqaatsinut tunngasutigut suleqatigiinnermut, paasissutissanik siammartereriaatsinut nutaanut ilinniartitaanermilu piginnaasanik ineriartortisinermut nutaaliornermullu tunngasut ilanngullugit - suliarisarpai. Ataatsimiititaliap aamma sammisarpai inuiaqatigiinni nammineq piumassutsimik suliaqarneq. Timersorneq, oqaatsit, film paasissutissanillu siammarterutit allat, nalinginnaasumik tamanullu eqqumiitsuliorneq kulturilu, meeqqat inuusuttullu kulturiat, ataatsimiititaliap suliassaqarfiinut soqutigisaqarfianullu aamma ilaapput.
Ilisimasanut Kulturimullu Ataatsimiititaliap ataatsimeereernerata kingorna Mimi Karlsenip erseqqissarpaa ataatsimiinneq pissarsiffiulluarsimasoq, siunnersuutit arlallit pissanganartut oqallisigineqarsimallutik. Finlandimit Islandimillu aallartitat oqaatsimik nunat avannarliit suleqatigiinneranni danskit, svenskit norskillu oqaasii assigalugit sulinermi atorneqarsinnaalernissaannik ataatsimut siunnersuutaannut tunngaviusumik tapersiinini Mimi Karlsenip immikkut erseqqissarpaa.
Mimi Karlsen malillugu siunnersuut taanna kalaallisut oqaatsit nunat avannarliit suleqatigiinneranni sulinermi oqaatsitut aamma akuerineqarnissaannik, taamalu oqaatsit allat assigalugit tamanna pisariaqartinneqarpat aamma atorneqarsinnaanissaannik, Kalaallit Nunaannit aallartitat Kalaallit Nunaanniillu nunat avannarliit suleqatigiinnerannut Naalakkersuisup 2016-imi oktobarimi Nunat Avannarliit Siunnersuisoqatigiiffiannut aamma Nunat Avannarliit Ministeriisa Siunnersuisoqatigiiffiannut 2016-imi oktobarimi allakkatigut saaffiginnissutaannut naapertuulluinnarpoq. ”Naligiinneq ataqqeqatigiinnerlu suleqatigiinnermi tunngaviusumik pinngitsoorneqarsinnaanngillat”, Mimi Karlsen erseqqissaavoq, peqatigalugulu ataatsimiititaliami nunanut avannarlernit allanit ilaasortanut ilanngullugu erseqqissarlugu kalaallit oqaasii Kalaallit Nunaanni innuttaasut 80%-iisa missaasa ilitsoqqussaralugu oqaaserimmatigit. Mimi Karlsenip ilanngullugu ilisimatitsissutigaa danskit tuluillu oqaasiisa allamiut oqaasiisut ilinniartitsissutigineqartussatut siullertut naligiissinneqarnissaat nammineq naalakkersuinikkut sulissutigalugu.
”Nalitsinni nalinginnaasumik oqaatsinik annaasaqarfiusartumi oqaatsillu eqqarsaatigalugit ilatsiinnarfiusumi pingaarutilerujussuuvoq oqaatsitigut assigiinngisitaarnerup, taamalu aamma kulturikkut kinaassutsip, attatiinnarneqarnissaa,” Mimi Karlsen, nunat avannarliit suleqatigiinneranni isummat taamaattut saqqummiunneqarsinnaanerinik nuannaaruteqartoq, naggasiivoq. ”Piffissap takutikkumaarpaa suleqatigiinneq naligiinneruleqqullugu Finlandimit, Islandimit Kalaallit Nunaanniillu tunngaviusumik isummat saqqummiunneqartut minnerpaamik naapertuuttumik aaqqiissuteqarfigineqarsinnaassanersut,” Mimi Karlsen erseqqissaavoq.
Tamanna pereermat Aalajangersimasumik qulequtaqartitsiluni ataatsimiinneq ingerlanneqarpoq, siunnersuuterpassuit oqallisigineqarlutillu taasissutigineqarlutik, soorlu aamma ataatsimut oqallinnermi USA-mi præsidentimik nutaamik qinersisoqarnerata kingorna nunat avannarliit USA-mut attaveqarneri immikkut oqallisigineqartut.
Aalajangersimasumik qulequtaqartitsilluni ataatsimiinneq naggaserlugu Nunat Avannarliit Siunnersuisoqatigiiffianni Sverigemit aallartitat Østersø kaajallallugu illersornissamut tunngatillugu naalakkersuinikkut ineriartorneq pissutsillu pillugit oqaloqatigiinnissanut qaaqqusivoq, russit Østersømi najuunnerat USA-milu qanittukkut præsidentimik qinersinerup malitsigisinnaasai minnerunngitsumik eqqarsaatigalugit.
Nunat Avannarliit Siunnersuisoqatigiiffiannut Kalaallit Nunaannit aallartitap aappaa sinniisussaaluunniit Aalajangersimasumik qulequtaqartitsilluni ataatsimiinnermut, ilaatigullu peqataasinnaasimanngillat, Nunani Avannarlerni Piujuaannartitsinermut Ataatsimiititaliami ataatsimiinneq ilanngullugu.
Tamatumunnga atatillugu erseqqissarneqassaaq Nunat Avannarliit Siunnersuisoqatigiiffianni Præsidenti Britt Lundberg Ålandimeersoq eqqarsaateqarmat qanittukkut apriilip ulluisa 25-iannit 28-iannut 2017 Nuummut tikeraarnissaminik Kalaallit Nunaanni pissutsit paasisaqarfiginerorusullugit, taamatullu aamma inunnik, ataatsimiititalianik sinniisuutitanillu naalakkersuinikkut qitiusunik namminersulivinnissaq siunertaralugu suliniarneq aallartinneqarsimasoq pillugu ilisimasaqarnerulerusulluni.
Nunat Avannarliit Siunnersuisoqatigiiffianni ataatsimiittarnissat aggersut tassaapput ataatsimiititaliat aasaanerani ataatsimiinneri, sap. ak. 26-imi nunani avannarlerni sumiiffinni assigiinngitsuni ingerlanneqartussat.
Paasissutissat sukumiinerusut Mimi Karlsen 58 76 19 attaveqarfigalugu pissarsiarineqarsinnaapput.
Nunat Avannarliit Siunnersuisoqatigiiffiat inatsisartutigoortumik suleqatigiiffiuvoq Norgemit, Danmarkimit, Sverigemit, Finlandimit, Islandimit aamma namminersorfiusunit Ålandimit, Savalimmiunit Kalaallit Nunaanniillu 87-inik ilaasortalik.
Inatsisartut Nunat Avannarliit Siunnersuisoqatigiiffiannut marlunnik sinniisussalinnik ilaasortaatitaqarput. Ineqi Kielsen, Siumut, ilaasortaavoq Vivian Motzfeldt, Siumut, sinniisussaralugu. Iddimanngiiu Jensen Bianco, Inuit Ataqatigiit, ilaasortaavoq Mimi Karlsen sinniisussaralugu. Iddimanngiiu Jensen Bianco/Mimi Karlsen Nunani Avannarlerni Ilisimasanut Kulturimullu Ataatsimiititaliamut ilaasortaavoq, Ineqi Kielsen/Vivian Motzfeldt Nunani Avannarlerni Piujuaannartitsinermut Ataatsimiititaliamut ilaasortaasoq. Ilaasortat sinniisussallu Inatsisartunut ilaasortassapput taakkunanngalu toqqarneqarsimassallutik.