2024 2023 2022 Flere år...
11-05-2017
Sullivimmi avatangiisinut suliassaqarfiup nunatsinnut nuunneqarnissaa pillugu siunnersuutip 2018-imi upernaakkut ataatsimiinnermut kinguartinneqarnissaa qinnutigineqarpoq
Suliassaqarfiit Naalagaaffimmit nunatsinnut nuunneqarnissaannik sulineq Inuussutissarsiornermut Aatsitassanullu Ataatsimiititaliamit tunngaviusumik tapersersorneqarpoq. Nunatsinnulli nuussinerit naalakkersuinikkut ataqatigiissaakkamik aammalu ataatsimut pilersaarusiornerup tulleriiaarinerullu kingorna ingerlanneqartariaqarput. Aqqaluaq B. Egedep aalajangiiffigisassatut siunnersuutaa, Naalakkersuisut suliassaqarfiit Naalagaaffimmit nunatsinnut nuunneqarnissaat pillugu nassuiaammik kingusinnerpaamik 2018-imi upernaakkut ataatsimiinnermi saqqummiunneqartussamik suliaqarnissamik peqquneqarnissaannik imaqartoq, Inatsisartut isumaqatigiittut 2015-imi ukiakkut ataatsimiinnermi akuersissutigaat.
Nassuiaatissami suliassaqarfiit sorliit siulliullugit nunatsinnut nuunniarneqartariaqarnersut nassuiarneqarlunilu tulleriissaariffigineqassaaq kiisalu nunatsinnut nuussinermi allaffissornermut aningaasaqarnermullu tunngasut allaaserineqassallutik.
Nunatsinnut nuussinissat oqaluuserineqarlutillu naliliiffigineqarnissaanni nassuiaatissaq Inatsisartut naalakkersuinikkut tulleriiaarinissaanni sakkussaasoq ataatsimiititaliaq naliliivoq. Tamanna tunngavigalugu Inuussutissarsiornermut Aatsitassanullu Ataatsimiititaliap immikkoortoq 25 oqaluuseraa: Uunga siunnersuut: Sullivinni avatangiisinut suliassaqarfiup ilaata, nunami sullivinni avatangiisinut tunngasup, Namminersorlutik Oqartussanit tiguneqarnissaanik Inatsisartut aalajangiiffigisassaattut siunnersuut aammalu inatsisissatut siunnersuut tassunga atasoq imm. 24.
Suliassaqarfiup tamatuma nassuiaammut ilanngunneqareernissaanut aammalu suliassaqarfinnut allanut sanilliullugu naalakkersuinikkut aningaasaqarnikkullu tulleriiaariffgineqareernissaanut sullivimmi avatangiisinut suliassaqarfiup nunatsinnut nuunneqarnissaanut isummernissani Inuussutissarsiornermut Aatsitassanullu Ataatsimiititaliap kinguartippaa. Nassuiaat 2018-imi upernaakkut saqqummiunneqassasoq naatsorsuutigineqarpoq.
Inatsisartut aalajangigaat Naalakkersuisunut peqqussutaasut malinneqartariaqartut Inuussutissarsiornermut Aatsitassanullu Ataatsimiititaliaq isumaqarpoq. Sullivinni avatangiisinut suliassaqarfiup nunatsinnut nuunneqarnissaanik aalajangiiffigisassatut siunnersuut aammalu inatsisissatut siunnersuut Inatsisartunut nassiunneqartut Inatsisartut 2015-imi ukiakkut ataatsimiinnermi isumaqatigiillutik aalajangigaannut naalakkersuinikkut allaffissornikkullu naapertuutinngillat, tamatumanimi nuussinissat pillugit nassuiaasiortoqarnissaa Inatsisartunit kissaatigineqarmat.
Peter Olsen
Inuussutissarsiornermut Aatsitassanullu Ataatsimiititaliap siulittaasua
Ataatsimiititaliap siulittaasuanut saaffiginninnikkut mobil +299 48 66 88-imut saaffiginninnikkut paasissutissat annertunerusut pissarsiarineqarsinnaapput.