2024 2023 2022 Flere år...
22-09-2017
Inatsisartut ukiakkut ataatsimiinnerat qilaatersornermik aallarnerneqarpoq
Pisarneq malillugu Inatsisartut ataatsimiinnerat Inatsisartut innuttaasullu piumasut naalagiarneranik aallarnerneqarpoq, kingornalu Inatsisartunut ilaasortat oqaluffimmiit Inatsisartut ataatsimiittarfianut ingerlaaqatigiillutik.
Inatsisartut Siulittaasuata ukiakkut ataatsimiinneq ammarpaa Inatsisartunut ilaasortat tikilluaqqullugit, tamatumalu kingorna Anda Kuitse aammalu Nuka Alice Lund ataatsimiittarfimmut qilaatersornissaannut tikilluaqqullugit.
Qilaatersornermik eqqussineq innuttaasumit saaffigiinnissuteqartoqarnerata kingorna Siulittaasoqarfimmi aalajangiisoqarnera aallaavigalugu pivoq, saaffiginnittup siunnersuutigimmagu Inatsisartut ataatsimiinneri qilaatersornermik aallarnerneqartarnissaat, naalagiarnerup europamiut ileqqorisaata saniatigut.
Andap Nuka Alicellu qilaatersortussatut toqqarneqarneranut tunngaviuvoq qilaatersornermik nunatsinni kulturikkut ileqqutoqqat nutaannginnersaasut ilaagisaannut tunniussimallutik anersaaqarfiginnimmata.
Pisoq kingumut uteqqiattumik ingerlanneqartalissaaq Inatsisartut ataatsimiinnerini tamani qilaatersortussanik toqqaasoqartassalluni, siunertaavorlu qilaatersortut Inatsisartunut ilaasortanut Inatsisartut ataatsimiinnerisa aallartinnerini tamani kalaallit anersaavanik tunniussisarnissaat.
Lars-Emil Johansen
Inatsisartut Siulittaasuat
