2024 2023 2022 Flere år...
26-01-2017
Nunat Avannarliit Siunnersuisoqatigiiffianni ilaasortat, Iddimanngiiu Jensen Bianco aamma Ineqi Kielsen Nunat Avannarliit Siunnersuisoqatigiiffiata ukioq manna ataatsimiinnerini siullerni Inatsisartut sinnerlugit peqataapput
Iddimanngiiu Jensen Bianco, Inuit Ataqatigiit aammalu Ineqi Kielsen, Siumut ulluni 24.-25. januar 2017 Nunat Avannarliit Siunnersuisoqatigiiffiata 2017-imi ataatsimiinnerini siullerni Oslomiipput.
Ulloq 24. januaarimi ullaakkut Den Venstresocialistiske Grønne Gruppe VSG aammalu Den Socialdemokratiske Gruppe partiitut ataatsimiinnitik aallartippaat.
Ulloq taanna ualikkut ataatsimut ataatsimiittoqarpoq ima qulequtalimmik Krig, Krise og Konflikt i en krævende og konkliftfyldt verden (nunarsuarmi piumasaqarfiusumi aaqqiagiinngiffiusumilu sorsunneq, ajornartorsiorneq aaqqiagiinngissuteqarnerlu). Nunat Avannarliit nunanilu avannarlerni nunat nunarsuarmi sorsuffiusumi ajornartorsiorfiusumi aaqqiagiinngiffiusumilu akisussaaffimmik tigusinissaat maanna aatsaat taama pisariaqartinneqartigisoq Norgimi topdiplomati allattaanerlu, Jan Egeland, erseqqilluinnartumik inerniliivoq. Naalakkersuinikkut aaqqiissutissat amigaatigineqarput, taamaattullu nassaariniarneqassapput Nunat Avannarliit ikiuiniarnermik nunanullu allanut politikimut tunngasunik ingerlatsisuusutut ilisimaneqarluartut aallaavigalugit.
Nunat avannarliit attanneqarsinnaanissaannut ataatsimiititaliap ataatsimiinnerani ilaatigut eqqagassalerinermut politiki suliarineqarpoq, tassungalu ilanngullugu Nunani Avannarlerni eqqagassat ingerlaarnerisa takussutissiornissaanut siunnersuut kiisalu pinnersaatit mikroplastimik akoqaqqusaannginnissaannut siunnersuut. Pinnersaatit mikroplastimik akoqaqqusaajunnaaraluarpata tamanna plastikimik eqqakkanik mikroplastimillu ajornartorsiutit annertusiartuinnartut aaqqiivigineqarnavianngitsut Nunat Avannarliit Siunnersuisoqatigiiffianni politikikkut eqqumaffigineqarpoq, taamaattorli EU-mut nunanullu allanut politikikkut sakkortuumik sunniuteqarsinnaasumillu oqariartuuteqartoqarpoq.
Atlantikup avannaata imaani plastikimik eqqakkat aalisakkani piniagassanilu aamma nassaassaasut maanna uppernarsarneqarsinnaavoq. Plastikimik mingutsitsineq assorsuaq ajornartorsiutitaqarpoq, tassami nerisavut, taamaalillunilu atlantikup avannaani sumiiffinni inuit ataannarnissamut tunngavigisaat aarlerinartorsiortinneqarput, taama oqarpoq Ineqi Kielsen, tamatumalu peqatigisaanik plastikimik eqqakkat avatangiisinut ajoqusiisinnaasut killilersimaarniarlugit suliniutigineqaqqittussat siunnersuutit tapersersorini erseqqissaatigalugu. Tamatumani aamma Kalaallit Nunaanni.
Issittumi sumiiffinni imaatigut angalanermi isumannaatsuunissaq sammisaavoq ataatsimiititaliamit suli sulissutigineqartoq, Ineqi Kielsenilu isumaqarpoq ataatsimiititaliap apeqqutaasa akineqarnissaannut nunani avannarlerni naalakkersuisut amerlanerit sukkanerusumik sulinissaat kissaatiginaraluartoq. Nunani avannarlerni nunanit Danmarki ataatsimiititaliap apeqqutaasa akissuteqarfiginissaannut piffissarititaasumik malinnittutuaavoq, tamannalu akueriuminaappoq, taama oqarpoq Ineqi Kielsen.
Nunat avannarliit attanneqarsinnaanerannut ataatsimiititaliaq qulequttanik sulianillu avatangiisinik pinngortitamillu illersuinissamut, pinngortitami pisuussutinut – tassungalu ilanngullugu nunalerinermi, aalisarnermi orpippassualerinermilu pinngortitami pisuussutinik atorluaanermut tunngassutilinnik suliaqartuuvoq. Apeqqutit silap pissusaanut attuumassutillit suliat pingaarutillit aamma ilagaat – tassungalu ilanngullugit silap pissusaata allanngoriartornerata kinguneri, pingaartumik Nunani avannarlerni sumiiffinnut avannarpasinnerpaanut, assersuutigalugu Kalaallit Nunaannut kalluaasut.
Nunani avannarlerni kultureqarnermut ilisimatusarnermullu ataatsimiititaliaq qulequttanik kulturimut, ilisimatusarnermut ilinniartitaanermullu, atuarfinnut ilinniarnertuunngorniarfinnullu, inersimasunut ilinniartitaanernut innuttaasunillu paasititsiniaanernut – tassungalu ilanngullugit oqaatsit pillugit suleqatigiinnermut, tusagassiorfinnut nutaanut, piginnaasanik ineriartortitsinermut ilinniartitaanernillu inerisaanermut tunngasunik suliaqarpoq. Ataatsimiititaliaq innuttaasunut namminnerlu piumassutsiminnik suliaqartunut tunngassutilinnik suliaqartarpoq. Timersorneq, oqaatsit, filmit tusagassiorfiillu, eqqumiitsuliorneq nalinginnaasumik assigiinngissitaartorlu, meeqqat inuusuttullu kulturiat ataatsimiititaliap suliatut soqutigisatullu aamma suliassaqarfigai.
Nunani avannarlerni kultureqarnermut ilisimatusarnermullu ataatsimiititaliap ataatsimiinnerata kingorna Iddimanngiiu Jensen Bianco naammagisimaarluni oqarpoq: Nunat Avannarliit Siunnersuisoqatigiiffiat oqaatsit pillugit oqallippoq. Tamanna pivoq siulittaasoqarfimmi aammalu nunani avannarlerni kultureqarnermut ilisimatusarnermullu ataatsimiititaliami. Kalaallisut oqaatsit taakkuninngalu atuineq oqallinnerni aamma ilaatinneqarmata immikkut nuannaarutigaara.
Aammattaaq kalaallit oqaasiinik atuineq nutserinerlu pillugit Nunat Avannarliit Siunnersuisoqatigiiffiata siulittaasoqarfianut saaffiginnissutertik nunani avannarlerni kultureqarnermut ilisimatusarnermullu ataatsimiititaliamut tusarniutigineqarniarmat peqataasut taakku marluk naammagisimaarlugu maluginiarsimammassuk paasissutissiissutigineqarsinnaavoq, taamaaliortoqarneratigut suliamut tunngasumik piviusorsiortumillu suliarineqarnissaa qulakkeerneqassammat.
Nunat Avannarliit Siunnersuisoqatigiiffianni ataatsimiinnissat Stockholmimi ingerlanneqassapput, taanna ulluni 4. aamma 5. april 2017-imi Nunat Avannarliit Siunnersuisoqatigiiffiata aalajangersimasumik qulequtaqarluni ataatsimiinnerani qaaqqusisuussalluni.
Annertunerusumik paasisaqarusukkaanni Iddimanngiiu Jensen Bianco, mobil 00299 54 88 44, aamma Ineqi Kielsen, mobil 00299 58 73 31, saaffigineqarsinnaapput.
Nunat Avannarliit Siunnersuisoqatigiiffiat inatsisartutigoortumik suleqatigiiffiuvoq Norgemit, Danmarkimit, Sverigemit, Finlandimit, Islandimit nunanillu namminersorfiusunit Ålandimit, Savalimmiunit Kalaallillu Nunaannit inatsisartunut ilaasortanik 87-inik ilaasortalik.
Inatsisartut Nunat Avannarliit Siunnersuisoqatigiiffianni marlunnik ilaasortaatitaqarput. Ineqi Kielsen, Siumut aammalu Iddimanngiiu Bianco, Inuit Ataqatigiit Nunat Avannarliit Siunnersuisoqatigiiffianni ilaasortaapput Inatsisartunit toqqakkat. Iddimanngiiu Bianco nunani avannarlerni kultureqarnermut ilisimatusarnermullu ataatsimiititaliamut ilaasortaavoq aammalu Ineqi Kielsen nunat avannarliit attanneqarsinnaanerannut ataatsimiititaliamut ilaasortaalluni.