2024 2023 2022 Flere år...
24-03-2017
UPA2017-imi oqaluuserisassat Siulittaasoqarfimmit aalajangersarneqarput
2017-imi Inatsisartut upernaakkut ataatsimiinnissaanni (UPA2017) oqaluuserisassat ullumi saqqummiunneqarput.
Inatsisartut upernaakkut ataatsimiinnerat sisamanngornermi ulloq 20. april nal. 11.00 aallartissaaq ullorlu 7. juni 2017 naammassinissaa pilersaarutaalluni.
Inatsisartunut ilaasortanit immikkoortut katillugit 41-t, Nunat Avannarliit Killiit Siunnersuisoqatigiiffiannit kaammattuutitut aalajangersakkat marluk, siulittaasoqarfimmit immikkoortoq ataaseq Naalakkersuisunillu immikkoortut 30-it oqaluuserisassanut ilanngunneqarput.
Sapaatit akunnerini ullut ataatsimiiffiusartussat:
- Ataasinngornerni, marlunngornerni pingasunngornernilu Inatsisartut nal. 11.00-imiit 15.00-imut ataatsimiittassapput
- Sisamanngornerit tamaasa Inatsisartut nal. 11.00-imiit 16.00-imut ataatsimiittassapput
- Tallimanngornerit Inatsisartuni ataatsimiiffiusassanngillat, ullut 21. aamma 28. april Inatsisartuni nal. 11.00 – 15.00 ataatsimiiffiusussat eqqaassanngikkaanni
- Taakku saniatigut pingasunngornerit tamaasa nal. 11.00-imiit 12.00-imut sapaatip akunnikkaartumik akunneq apeqquteqarfiusinnaasoq ingerlanneqartassaaq, tamatumalu kingorna ataatsimiinneq nal. 15.00 tungaanut ingerlaqqittassalluni. Akunneq apeqquteqarfiusinnaasoq siulleq ulloq 26. april ingerlanneqassaaq Naalakkersuisullu apeqquteqarfigineqarsinnaasut tulleriinnerat Inatsisartut nittartagaanni takuneqarsinnaassalluni
- Ataasinngorneq 1. maj kiisalu nalliuttut Tussiarfissuaq tallimanngorneq ulloq 12. maj, Qilaliarfik sisamanngorneq ulloq 25. maj piinsillu ulluisa aappaat ataasinngorneq ulloq 5. juni taamatuttaaq Inatsisartuni ataatsimiiffiussanngillat
UPA2017-imut tunngatillugu atortussat tamarmik www.inatsisartut.gl-imi takuneqarsinnaapput.
Iluarsiisoqartillugu taakku ingerlaavartumik nittartakkami takuneqarsinnaassapput, taamaattorli suli aamma periarfissaqarluni atortussat tamaasa qarasaasiakkut pissarsiarisarnissaannut. Tamanna kissaatigigaanni Laila Kristiansen lkri@inatsisartut.gl attaveqarfigineqassaaq.
Lars-Emil Johansen
Inatsisartut Siulittaasuat