Nutaarsiassat


2019 2018 2017 Flere år...

20-05-2019

Ilaasortanut Inatsisartunit sulinngiffeqarallartunut sinniisussanik aggersaasarnermi maleruagassat

Sermitsiaq onlinemi ulloq 15. maj aallaaserisami atuarneqarsinnaavoq Nunatta Qitornaata Inatsisartunut ilaasortaatitaa folketingimut qinigassanngortittoq Inatsisartunit sulinngiffeqarallarnermini sinniisussamik aggersaasoqarnissaanik akuerineqarsimanngitsoq.

 

Aallarniutigalugu Siulittaasoqarfimmit erseqqissaatigineqassaaq ilaasortanik sulinngiffeqarallarnissamik qinnuteqartunik imaluunniit sinniisussamik aggersaasarnermi assigiinngisitsisoqanngimmat.

 

Suleriaaseq aammalu sulinngiffeqarallarnissamik suliani taamaattuni periutsit Siulittaasoqarfimmit tunngavigineqarput.

Ilaasortaq ullunit 14-init sivikinnerusumi sulinngiffeqassatillugu sinniisussamik aggersaanissap itigartitsissutigineqartarnera Siulittaasoqarfimmit ukiuni arlaqartuni aalajangersimasumik ileqqorineqarpoq. Tamannalu partiimut sorlermut ataneq apeqqutaatinnagu atuuppoq.

 

Taamaalillunilu periutsit malillugit sivikinnerpaamik ulluni 14-ini aatsaat najuutinngikkallartoqassatillugu sinniisussamik aggersaasoqartarpoq. Tassuunakkut qulakkeerniarneqarpoq piffissami sivikinnerusumi sulinngiffeqarfiusumi sinniisup illoqarfimmut apuussinnaanissaa aammalu sinniisussap Inatsisartunut ilanngutinnginnerani Qinigaanerup Misilinneqarnissaanut Ataatsimiititaliamit qinigaasinnaanerata misilinneqarnissaata angumerineqarnissaa. Taamaalillunilu ullunit 14-init sivikinnerusumi sinniisuusussamik aggersaaneq arlalitsigut ajornartorsiutinik tigussaasunik taamatut periuseqalersimanermut pissutaasunik nassataqartarpoq.

 

Inussiarnersumik inuulluaqqusillunga

 

Vivian Motzfeldt