Nutaarsiassat


2020 2019 2018 Flere år...

25-02-2020

Siunissaq isigalugu

Inatsisartut Kultureqarnermut, Ilinniartitaanermut, Ilisimatusarnermut Ilageeqarnermullu Ataatsimiititaliaat piffissami 15. – 22. februar 2020-mi Qaqortumut, Narsamut Narsarsuarmullu angalavoq.

 

Angalanermini ataatsimiititaliap ataatsimeeqatigai atuarfiit, ulluunerani paaqqinnittarfiit, katersugaasiviit, INUILI, Majoriaq, Campus Kujalleq, eqqumiitsuliortut sanaluttarfiat, Kujataani provsteqarfik kiisalu Kommune Kujallermi kommunalbestyrelsi. Ilaatigut kulturikkut kingornussatta allanngutsaaliorneqarnissaat, minnerunngitsumilli nunatta siunissai meerartagut inuusuttagullu qitiutillugit sammineqarput.

 

Tikilluaqqusineq inussiarnisaarnerlu annertoqaaq aammalu kommunimi pimoorussillutit anguniagallit piumassuseqarnerat ataatsimiititaliamit malugineqarluarpoq. Pimoorussillutit anguniagallit taakku nunatta kujataani siunissami pitsaasumik ingerlanissaq pillugu akisussaaffimmik annertuumik tigusipput. Kommunimi inuusunnerusunik sorsuutiginnipput, periarfissaannik tappiffiginnillutik siunissamilu nammineernerulernissaannut kaammattorlugit.

 

Pimoorussillutit anguniagaqartut assut pisariaqartinneqartut ataatsimiititaliamit oqaatigineqartariaqarpoq. Minnerunngitsumik meeqqat inuusuttullu inuuniarnikkut imaannaanngitsunik atugaqartut, angerlarsimaffimminnit tapersersorneqanngitsut imaluunniit arlaatigut inuunerminni ajornartorsiutillit ikiorniarlugit paaqqinnittarfiit, atuarfiit ilinniarfiillu sorsuutiginnipput. Sorsuutiginninnerli taanna inuit ataasiakkaat iliuuseqarnerannik ajoraluartumik annertuallaamik toqqammaveqarsorinarpoq.

 

Atuarfimmi atuartut qulerarterutaat immikkut atuartinneqartarpata, ilinniartitsisunut nakuusertoqartarpat, ulluunerani paaqqinniffimmi ikuallattoornissamut isumannaallisaaneq qularnarpat, illuutit ajutoortoqareerneratigut aatsaat aserfallatsaalineqartarpata, ilinniarsimasunik sulisussaaleqineq annertoorujussuuppat imaluunniit sullissisut annertuallaamik allaffissorpata pimoorussillutit anguniagaqartut sorsuutiginninnerat artornarpallaalersinnaavoq.

 

Taamaalillunilu naalakkersuinermik suliaqartut periusissiaat, anguniagaat suliniutaallu pitsaasut paaqqinnittarfinni/atuarfinni/ilinniarfinni ataatsimiititaliamit takujuminaatsinneqarput. Taamaalilluni aaqqissuusaaneq qajannarsisarpoq, taamungaannagaalerluni oqimaappallaalerlunilu. Tamannalu innuttaasunut atorfilinnulluunniit iluaqutaanngilaq.

 

Inuttatta minnerunngitsumillu inuusunnerusortatta pitsaanerpaamik periarfissaqartinneqarnissaannut tamatta akisussaaffeqarpugut. Akisussaaffik taanna aamma Inatsisartuniippoq. Taamaattumillu Kommune Kujallermit, kommunip paaqqinniffiinit atuarfiinillu aammalu ilinniarfinnit pulaakkatsinnit paasissutissat pissarsiagut amerlaqisut ataatsimiititaliamit malitseqartilersaarpagut.

 

Taamaattumillu Ilinniartitaanermut, Kultureqarnermut, Ilageeqarnermut Nunanullu Allanut Naalakkersuisoq ataatsimiititaliamit piffissami qaninnermi siunersiuinissamut aggersarneqalersaarpoq. Pitsaasumik ineriartornissaq akuusunit tamanit kissaatigineqartoq ataatsimiititaliap erseqqilluinnartumik paasivaa kissaallu taanna ataatsimiititaliamit sulissutigineqalersaarpoq.

 

 

Kultureqarnermut, Ilinniartitaanermut, Ilisimatusarnermut Ilageeqarnermullu Ataatsimiititaliaq sinnerlugu

 

Doris Jakobsen Jensen

Ataatsimiititaliap siulittaasua

Paasisaqarnerujumagaanni siulittaasoq uunga saaffigineqarsinnaavoq: tlf. 539400