2024 2023 2022 Flere år...
25-03-2020
Immikkut ittumik ataatsimiinneq – IIA20
COVI19 pillugu pissutsinut atatillugu nukinginnartumik inatsisiliornissaq qulakkeerneqarsinnaaqqullugu Inatsisartut immikkut ittumik ataatsimiigiaqquneqarnissaannik Naalakkersuisut siulittaasuata qinnuteqaataanik Siulittaasoqarfik tigusaqarpoq.
Suliaq Siulittaasoqarfimmit ullumi suliarineqarpoq Inatsisartullu immikkut ittumik ataatsimiigiaqquneqarnissaannik qinnuteqaat akuerineqarluni.
Inatsisartut immikkut illuinnartumik ataatsimiinnissaannut, COVID19-imut atatillugu killilersuutitigut killiliunneqartut iluanni ingerlanneqartussamut, aggersaannginnermi pissutsit arlallit paasinarsisinneqartinnagit IIA20-mut ulluliunneqartussaq Siulittaasoqarfimmit maannakkuugallartoq paasissutissiissutigineqarsinnaanngilaq.
Inatsisartut aalajangiisinnaassuseqartut 16-inik ilaasortaqartut ataatsimiittarfimmut ornigullutik ataatsimiigiarsinnaasut qulakkeerneqarnissaat pisariaqartinneqarpoq.
Massakkorpiaq ilaasortat illoqarfimmiittut 16-iunngillat, taamaalillunilu ataatsimiittarfimmi ilaasortat 16-iusinnaanissaat qanoq qulakkeerneqarneqarsinnaanersoq misissorneqarpoq.
Sineriammiilli timmisartukkut aggertitsisoqassanngilaq, taamaattumillu allatut aaqqiisoqartariaqarluni.
Tamanna maanna sulissutigineqarpoq, soorluttaaq ataatsimiittarfimmi ataatsimiinnerup ingerlanneqarnissaani avatangiisinut tunngasut arlallit paasinarsisinneqartariaqartut.
Pissutsit sukannersut Nuummiittunut tamanut atuuttut aammalu Inatsisartunit allaffissornermillu suliaqartunit maleqquneqartut malillugit ataatsimiinneq ingerlanneqassaaq, taamaalillunilu pisariaqanngitsumik tunillatsittoqannginnissaa qulakkeerneqassalluni.
Immikkorluinnaq ittumik Inatsisartut ataatsimiinnissaanni pissutsit tamarmiusut paasinarseriarpata immikkut ittumik ataatsimiinnissamut ulluliussassaq Siulittaasoqarfimmit ulluni qaninnerni paasissutissiissutigineqassaaq.
Immikkulli ittumik ataatsimiinnissamut sapinngisamik piaarnerpaamik aggersaanissaq anguniarneqarpoq aammalu ilaasortat sulisullu ataatsimiinnerup ingerlanneqarnissaanut ataatsimiittarfimmi najuuttussatut pisariaqartinneqarluinnartut saniatigut naatsorsuutigineqartariaqarlunili ataatsimiittarfimmi isernissamut piumasaqaatit sakkortoorujussuunissaat aammalu soqutiginnittunit aallaavittut isigalugu internetikkut tv-kulluunniit taamaallaat malinnaavigineqarsinnaanissaa.