2024 2023 2022 Flere år...
22-06-2020
Inatsisartuni Siulittaasuata Vivian Motzfeldtip ulloq 22. juni 2020 Maligassiuisoq Louise Zeeb sølviusumik Nersornaaserpaa, Hans Egedep Illuani, Nuummiittumi
Louise Zeeb sølviusumik Nersornaaserneqarpoq, sivisuumik tunniusimallunilu Uummannami Meeqqat Angerlarsimaffianni kiffatut kingorna perorsaasutut naggataanullu immikkoortortami pisortatut, nersortarialimmik annertuumillu suliaqarsimanera tunngavigalugu.
Inatsisartut Siulittaasuata, Vivian Motzfeldtip Louise Zeebimut oqaaseqarnermini ilaatigut erseqqissarpai:
“1959-imi 17-inik ukioqarlutit taamani meeqqat napparsimavianni kingornalu meeqqanik ulloq unnuarlu paaqqinnittarfinngortumi atorfinissimavutit, aallarniutigalugu kiffatut kingorna perorsaasutut naggataanullu immikkoortortami pisortatut atorfeqarsimallutit.
Taamaammat Uummannami Meeqqat Angerlarsimaffianni atorfeqarninni 2020-mi ulloq 11. marts ukiut 60-inngortorsiorpatit, tassani ikiortitut ilinniagaqanngitsutut aallarteriarlutit pikkorissartarnikkut ilinniagaqartarnikkullu immikkoortortami pisortatut atorfeqalersimallutit.
Soqutigisat qasusuilluni tunniusimallunilu anguniartuarnerisigut takorluukkat anguneqarsinnaanerinut uppernarsaatissaasutit oqartoqarsinnaavoq.
Isumassuinikkut inuppalaartuunikkullu meeqqanut toqqissisimanermik tunniussiuarsimavutit allaallumi meeqqanit aanaamik aanaajaamillu taaneqartarlutit, meeqqanut Meeqqat Angerlarsimaffianni najugaqartunut najugaqarsimasunullu qanilaartuuninnut tamanna takussutissaavoq.
Meerarpassuit mikisunnguuneranniit inersimasunngornerannut malittarisarsimavatit. Meeqqat Angerlarsimaffiat peqatigalugu assersuutigalugu qimusserartitsisarnertigut meeqqat misigisaqartittarsimavatit, aammattaaq innartitsisarnikkut, tussiarfiginnittarnikkut biibilimillu atuffassisarnikkut isumassuisarninni pisariaqartitaannik immersortarsimavatit.
Taamaammat meerarpassuarnut Kalaallit Nunaanni sumiiffinni assigiinngitsuneersunut anaanaasutullusooq inissisimasarsimavutit.“
Siulittaasoqarfik sinnerlugu
Vivian Motzfeldt
Inatsisartut Siulittaasuat