2024 2023 2022 Flere år...
23-08-2020
Nunanut Allanut Sillimaniarnermullu Ataatsimiititaliaq Nunanut Allanut Nukissiuteqarnermullu Naalakkersuisumik kiisalu nunanut allanut ministerimik paasissutissiiviusumik ataatsimeeqateqarnissamut qaaqqusaasoq.
Nunanut Allanut Sillimaniarnermullu Ataatsimiititaliaq paasissutissiiviusumik ataatsimiinnermut Nunanut Allanut Nukissiuteqarnermullu Naalakkersuisumit qaaqqusaavoq. Paasissutissiiviusumik ataatsimiinneq nunanut allanut ministerip, issittumi pissutsit pillugit aallartitaq peqatigalugu peqataasussap nunatsinnut tikeraarneranut atatillugu ingerlanneqassaaq. Nunanut allanut ministerip Kalaallit Nunaannut tikeraarnermini Inatsisartut Nunanut Allanut Sillimaniarnermullu Ataatsimiititaliaannik naapitsinissani pingaartissimammagu ataatsimiititaliamit tulluusimaarutigineqarpoq.
Ataatsimiititaliamik ataatsimeeqateqarnissap nunanut allanut ministerip tikeraarnissaani oqaluuserisassanut ilanngunneqareersimasoq Nunanut Allanut Sillimaniarnermullu Ataatsimiititaliamut ilaasortat tusagassiorfitsigut atuarsinnaasimavaat. Nunanut allanut ministeriaqarfiup tusagassiorfinnut nalunaarutaani nunanut allanut ministeri ima issuarneqarpoq, “Uummaarissumik, naligiiffiusumik, ataqqeqatigiiffiusumik, piffissarlu ilutigalugu ineriartorfiusumik naalagaaffeqatigiinnerup qulakkeerneqarnissaa uannut pingaartuuvoq. Tamanna aamma suliassaqarfimmut nunanut allanut sillimaniarnermullu tunngassuteqartumut atuuppoq”.
Naalagaaffeqatigiinnermi ataatsimut sulinermi naligiissutsip ataqqeqatigiinnerullu tunngavissaatinneqartariaqarnerat ataatsimiititaliamit isumaqatigineqarpoq. Taamaammat tamanna eqqarsaatigalugu Nunanut Allanut Sillimaniarnermullu Ataatsimiititaliap paasissutissiiviusumik ataatsimiinnermut qaaqqusissut ataatsimiinnissaq ullualunnguanik sioqqullugu aatsaat tigummagu uggornartorujussuuvoq. Ataatsimiititaliamut ilaasortat aamma Inatsisartut ataatsimiititaliaanni allani pisussaaffeqarmata allanik ataatsimiititaliaq ajoraluartumik taamak sivikitsigisumik piffissaqartitsilluni paasissutissiiviusumik ataatsimiinnermut peqataasinnaanngilaq.
Ataatsimiititaliap piffissaalluartillugu qaaqqusaasimanissaa kissaatiginaraluarpoq. Taamaattoqarsimagaluarpat ataatsimiititaliaq qularnanngitsumik nunanut allanut ministerimik naapitsinissamut piffissaqarsimassagaluarpoq. Nunanut allanut ministerimik kingusinnerusumkkut ataatsimeeqateqarsinnaaneq ataatsimiititaliamit qilanaarineqarpoq.
Aleqa Hammond
Nunanut Allanut Sillimaniarnermullu Ataatsimiititaliami Siulittaasoq
Paasisaqarnerujumalluni ataatsimiititaliap Siulittaasua oqarasuaammut uunga saaffigineqarsinnaavoq; +299 49 23 09