2024 2023 2022 Flere år...
04-11-2020
Aalisarnermut COVID19-imut tunngatillugu ikiorsiissutit, nunaqarfinni isorliunerusunilu inuussutissarsiutinik ineriartortitsineq kiisalu puisip amiinik tunitsiviit pillugit Aalisarnermut, Piniarnermut Nunalerinermullu Ataatsimiititaliaq ammasumik siunersiuissaaq.
Inuussutissarsiornermut Naalakkersuisoq ammasumik siunersiuinissamut Aalisarnermut, Piniarnermut Nunalerinermullu Ataatsimiititaliamit aggersarneqarpoq. Ammasumik siunersiuineq nunaqarfinni isorliunerusunilu aalisarnermut COVID19-imut tunngatillugu ikiorsiissutinut, nunaqarfinni isorliunerusunilu inuussutissarsiutinik ineriartortitsinermut kiisalu puisip amiinik tunitsivinnut tunngassuteqassaaq.
Siunersiuineq ataasinngornermi ulloq 9. november 2020, nal. 15.15-16.15 ataatsimiittarfik Erling Høeghimi ingerlanneqassaaq.
Ammasumik siunersiuinerit nalinginnaasumik tusagassiortut saniatigut sioqqutsilluni nalunaarnikkut tamanit najuuffigineqarsinnaasaraluarput. Coronalli ajornartorsiortitsinera pissutigalugu sapinngisamik najuuttut killilersimaarniarlugit ulloq 9. november 2020 siunersiuinermi tusagassiortut kisimik najuunnissamut qaaqquneqassasut aalajangiunneqarsimavoq.
Ammasumik siunersiuineq kalaallisut toqqaannartumik aallakaatinneqassaaq. Inatsisartut nittartagaatigut Inatsisartut.gl aqqutigalugu malinnaasinnaavutit – tassani toqqagassaq “Ammasumik siunersiuinerit” toqqassavat.
Tamatuma kingorna siunersiuinerup kalaallisut danskisullu immiunneqarnera Inatsisartut nittartagaannut ilanngunneqarumaarpoq.
Paasisaqarnerujumalluni Aalisarnermut, Piniarnermut Nunalerinermullu Ataatsimiititaliap Siulittaasua Henrik Fleischer oqarasuaatikkut ugguuna; +299 52 72 82 saaffigineqarsinnaavoq.
Siunersiuinerup qanorpiaq ingerlanneqarnissaa pillugu paasisaqarumalluni Inatsisartut Allattoqarfiat oqarasuaatikkut uunga saaffigineqarsinnaavoq: 34 61 25.
Henrik Fleischer
Aalisarnermut, Piniarnermut Nunalerinermullu Ataatsimiititaliap Siulittaasua