2024 2023 2022 Flere år...
22-07-2021
Inatsit eqquinerluppoq: meerartaaqqammersut ilinniartut ineqarfiini najugaqaannarsinnaanngillat
Pitaq, Ilisimatusarfimmi ilinniartut siunnersuisoqatigiivisa ilinniartut ineqarfii pillugit inatsimmi § 38 ajornartorsiutitaqarnerarunikku eqqortumik oqarput. Inatsimmi taamatut aalajangersaasimaneratigut meerartaaqqammersut ilinniartut ineqarfiinit anisariaqalertarnerannik taamaalillutillu ilinniarnerminnik unitsitsisariaqalertarnerannik kinguneqarsinnaavoq, uffa inatsimmi allami ineqaannarnissaannik periarfissinneqaraluartut. Kultureqarnermut, Ilinniartitaanermut, Ilisimatusarnermut Ilageeqarnermullu Ataatsimiititaliap inatsit misissoqqissaartikkusuppaa.
Nunarput nunaqavissunik ilinniarsimasunik sulisussanik amigaateqarpoq. Ilutigisaanik ilinniartut ineqarfii pillugit inatsit illinnialertussanut inissianik qulakkeerinnittussaq, ima ilusiligaavoq, ajornerpaassappat meerartaaqqammersut ilinniakkaminnik unitsitsiinnarnerannik kinguneqarsinnaalluni.
”Inuusuttut amerlasuut ilinniagaqarnissaat tamatta isumaqatigaarput, ilinniartulli unitsitsiinnartartut eqqumaffigiuartillugit naapertuutinngilaq, erninermut atatillugu sulinngiffeqartarneq pillugu inatsit ilinniartut ilinniakkaminnik unitsitsiinnartarnissaannik ilinniartullu ineqarfimminniit anisariaqarnissaannik ingerlaannaq kinguneqartussanngorlugu aaqqissuussimagatsigu”
taama oqarpoq ataatsimiititaliap siulittaasua Sofia Geisler.
Ilinniartut ineqarfiinik amigaateqarneq iliuuseqarfigisassaammat ataatsimiititaliap tikkuarpaa, meerartaaqqammersulli inigisaminnit anisinneqarnerannik kinguneqartariaqarani.
”Meerartaaqqammersut meerartaamik isumagisussaanera pissutigalugu inissiamik nutaamik ujaasisariaqalertarnerat illersorneqarsinnaanngilluinnarpoq. Nutaanik ilinniartut ineqarfiinik sanaartortoqartariaqarpoq, taamaalilluni ilinniagaqarumasut tamarmik illoqarfimmut allamut ilinniagaqarfiusumut nuuttussat inissaqartinneqarsinnaaniassammata.”
oqarpoq Sofia Geisler.
Inatsimmik allannguisoqarniarnersoq pillugu erseqqissaassuteqaqqullugu Naalakkersuisoq susassaqartoq Kultureqarnermut, Ilinniartitaanermut, Ilisimatusarnermut Ilageeqarnermullu Ataatsimiititaliap apeqquteqarfigaa, Ilinniartitaanermullu Naalakkersuisoq oqaaseqaqqullugu kaammattorlugu.
Sofia Geisler
Kultureqarnermut, Ilinniartitaanermut, Ilisimatusarnermut Ilageeqarnermullu Ataatsimiititaliami Siulittaasoq
Annertunerusumik paasissutissat ataatsimiititaliap siulittaasua mobil +299 58 81 55-imut attavigalugu pissarsiarineqarsinnaapput