2024 2023 2022 Flere år...
08-12-2022
Inatsisartut Siulittaasuata Kim Kielsenip ulloq 8. december 2022 Kaaleeraq Heilmann Qasigiannguani sølviusunik Nersornaaserpaa
Inatsisartut Siulittaasuata Kim Kielsenip ulloq 8. december 2022 Qasigiannguani Hotel Diskobayimi nalliuttorsiorpalaartumik katerisimaarnermi borgmesteriusimasoq Kaaleeraq Heilmann sølviusumik Nersornaaserpaa.
Kaaleeraq Heilmann taamatut nersorniarneqarpoq aalisarnermi Qasigiannguanilu borgmesteriunermini najukkami naalakkersuinikkut ingerlatsinermi malunnartumik tunniusimallutillu suliniuteqarsimanini pissutigalugit.
Inatsisartut Siulittaasuata Kaaleeraq Heilmannimut oqalugiarnermini ilaatigut erseqqissarpai:
”Inatsisartut Siulittaasoqarfiata sølviusumik Nersornaaserpaatsit aalisarnermik inuussutissarsiuteqarnermi aalisartutut namminersortutut borgmesteritullu najukkami inuiaqatigiit ineriartortinneqarneranni nersortarialimmik suliaqarsimanitit pissutigalugit.
Inuussutissarsiutinnik ingerlatsininni sivisuumi eqeersimaarlutit nammineerlutit raajarniuteqarlutit aallartissimavutit naallu sinerissamut qanittumi raajarniarneq annertuumik aaqqissuuteqqinneqaraluartoq inuussutissarsiutit attatiinnarsinnaasimallugulu ingerlateqqissinnaasimavat, ilaatigullu aamma kilisaammik piginneqataalersimallutit.
Raajarniarnerup aaqqissuuteqqinneqarnera aalisarnermik inuussutissarsiuteqartunut namminersortunut annertuumik piumasaqaateqarfiusimavoq, illilli uniinnarnak raajarniarsinnaajunnaaravit Qasigiannguanilu tunisassiorfik raajaniit qaleralinnik tunisassiornermut ikaarsaariarmat fabrikimut aalisakkanik assartuutit atorsimavat.
Taamatuttaaq KNAPK-mi ukiorpassuarni siulersuisuunernut, ilaatigut siulittaasup tulliatut, peqataanikkut aalisarnerup ineriartortinneqarneranut sunniuteqaqataalluarsimavutit, minnerunngitsumillu tunisinermi raajat akiisa pitsanngorsaavigineqartuarnissaat tamaviaarutigiuarsimallugu, taamaalillutillu aamma sinerissamut qanittumi raajarniat peqatigiiffiannut siulittaasuusimallutit”.
Siulittaasoqarfik sinnerlugu
Kim Kielsen
Inatsisartut Siulittaasuat
