2024 2023 2022 Flere år...
20-12-2022
Inatsisartut Siulittaasuata Kim Kielsenip ulloq 20. december 2022 Siverth K. Heilmann sølviusumik nersornaaserpaa
Inatsisartut Siulittaasuata Kim Kielsenip ulloq 20. december 2022 Kommunalbestyrelsip ataatsimiittarfiani Maniitsumi nalliuttorsiorpalaartumik katerisimaarnermi Siverth K. Heilmann sølviusumik Nersornaaserpaa.
Siverth K. Heilmann sølviusumik Nersornaaserneqarpoq najukkami nunalu tamakkerlugu ukiorpassuarni naalakkersuinermik suliaqarsimanera pissutigalugu.
Inatsisartut Siulittaasuata Siverth K. Heilmann-imut oqaaseqarnermini ilaatigut erseqqissarpai:
"Inatsisartut Siulittaasoqarfiata sølviusumik Nersornaaserpaatsit ukiorpassuarni naalakkersuinermik suliaqarsimanerit pissutigalugu minnerunngitsumik Maniitsumi borgmesteriusimasutut, Atassummut siulittaasuusimasutut, arlaleriarlutit Naalakkersuisunut ilaasortaasimasutut kiisalu aamma ukiorpassuarni suli maannamut Inatsisartunut ilaasortaasutut.
Inuusuttuuninni aalisarneq piniarnerlu aalluttuarsimavatit taakkulu naalakkersuinermik suliaqarnivit saniatigut ingerlatissallugit suli nukissaqarfigalugit. Qinikkatut misilittagalittut tunniusimasutullu ilisimavatsigit, immaqalu Inatsisartut ataatsimiittarfianni oqallittarnerni naammagittarnerit ilaannikkut unammillerneqartaraluartoq, qularutiginngilara naalakkersuinikkut suliaqarnivit ingerlateqqinneqarnissaanut nukissanik aallissagaangavit pinngortitami nukissanik naammagittarsinnaanermillu nassaarsinnaasartutit”
Siulittaasoqarfik sinnerlugu
Kim Kielsen
Inatsisartut Siulittaasuat
