2024 2023 2022 Flere år...
27-06-2023
Inatsisartut Siulittaasuata Kim Kielsenip ulloq 26. juni 2023 Toku Oshima Qaanaami sølviusumik nersornaaserpaa.
Inatsisartut Siulittaasuata Kim Kielsenip ulloq 26. juni 2023 Qaanaami Kommunalbestyrelsiusimasup ataatsimiittarfigisimasaani nalliuttorsiorpalaartumik katerisimaarnermi Toku Oshima sølviusumik nersornaaserpaa.
Toku Oshima sølviusumik Nersornaaserneqarpoq pingaartumik Qaanaami meeqqat atugaat pillugit annertuumik suliaqarsimanini minnerunngitsumillu najukkami nalilerneqarsinnaanngitsumik qaqutigoortumillu sullissilluarsimanini pissutigalugu.
Inatsisartut Siulittaasuata Toku Oshimamut oqaaseqarnermini ilaatigut erseqqissarpai:
”Inatsisartut Siulittaasoqarfiata sølviusumik Nersornaaserpaatsit, inuussutissarsiutigalugu piniartutut aammalu innaallagissiortutut ilinniagaqarsimasutut immikkut maluginiartarialimmik Qaanaami meeqqat atugaat pillugit annertuumik sullissillutit nipaatsumik inooqataanerpit oqaluttuassartaa Siulittaasoqarfimmut anngussimammat.
Siulittaasoqarfimmittaaq ilisimaneqarpoq takornartaanngitsutit, naak atit tusarlugu taama isumaqarnarsinnaagaluartoq, Qaanaamili alliartortutit japanimiunillu siuleqarlutit.
Taamaalillunilu inuussutissarsiutigalugu piniartuuneq inuussutigigit aammalu angallatit motorialu nammineq iluarsaallugillu aserfallatsaalisaritit kiisalu innaallagissiortutut ilinniagaqarnerit ilisimaneqarluarput. Nunap immikkoortuani arnaalluni taamatut akuleriinnik inuussutissarsiorneq nalinginnaanngilaq – tassuunakkulli aamma takutippat tamanna periarfissaasoq allanit malinneqarsinnaasoq. Taamaattumillu inuussutissarsiutigalugu piniartutut pikkorissutsit pillugu assorsuaq ataqqisaanerit tupinnanngilaq.
Illoqarfimmi inuunermut aamma akuulluinnarputit, tamatumani ilaatigut illoqarfiup meerartai isumagisarpatit qulakkeertarlugulu toqqissisimasumik atugaqarnissaat ilaatigullu ataqatigiinnerup, imminut ataqqeqatigiinnerup minnerunngitsumillu pinngortitamik ataqqinninnerup naleqassusiannik ilinniartittarlugit. Soorluttaaq ilissinni inissaqartitsiuartutut aammalu kakaomik kissartumik boorlunillu peqartuartutut illoqarfiup meerartaanit ilisimaneqarluarputit.
Taama isumassuinerit inissaqartitsinerillu illoqarfimmi utoqqartaasunut aamma takutittarpat, taakkumi illit nammineq aaqqasiatit isersimmasiatillu iluarusuutigisarpaat.”
Siulittaasoqarfik sinnerlugu
Kim Kielsen
Inatsisartut siulittaasuat
