Oqaluuserisassani immikkoortoq 19 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ataatsimiinnermik aqutsisoq: Jonathan Motzfeldt, Inatsisartut Siulittaasuat, Siumut.
Jonathan Motzfeldt, ataatsimiinnermik aqutsisoq, Inatsisartut Siulittaasuat, Siumut.
Taamaalilluta oqaluuserisassani
immikkoortoq 19 tikipparput; Ukiumut aningaasanut inatsiseqarfiusumut 2003-mut
Inatsisartut aningaasanut inatsisigigallagaata allanngortinneqarnera pillugu
Inatsisartut inatsissaannut siunnersuut.
Josef Motzfeldt, Aningaasarsiornermut Nunanullu Allanut Tunngasunut Naalakkersuisoq, Inuit
Ataqatigiit.
Naalakkersuisut sinnerlugit ukiumut
aningaasanut inatsiseqarfiusumut 2003-mut Inatsisartut aningaasanut
inatsigigallagaata allanngortinneqarnera pillugu Inatsisartut inatsisissaattut
siunnersuut saqqummiutilerpara.
Ulloq 15. oktober 2002-mi
Inatsisartunut qinersisoqarnissaa nalunaarutigineqarmat taamanikkut
Inatsisartuusut 2003-mut aningaasanut inatsisissaq suli naammassillugu
suliarisimanngilaat. Taamaattumik taamanikkut Inatsisartuusut, Inatsisartut
aningaasaliissutaat pillugit inatsisaagallartussaq akuersissutigaat.
2003-mut Inatsisartut aningaasanut
inatsisissaattut siunnersuut nutaaq Naalakkersuisoq saqqummiutissamaarpaat
2003-mi upernaakkut katersuunnermik Inatsisartuni suliarineqartussanngorlugu.
Pissutsilli ilaat Inatsisartut
upernaakkut katersuunnermi aningaasanut inatsimmi akuersissuteqarnissaannut
utaqqisinneqarsinnaanngillat. Inuiaqatigiit aningaasaqarnerat eqqarsaatigalugu
maannakkuuliinnartoq Naalakkersuisut siunnersuutigaat immikkorluinnaq
aningaasartuutissanut ikittunnguugaluanut aningaasaliissasugut.
Inatsisartut upernaakkut
katersuunnermi 2003-mut aningaasanut inatsisissatut siunnersuutissaq
suliarilerpassuk 2003-mut ataatsimut pingaarnersiulluni tulleriaarineq
isummerfigissavarput.
Missingersuutit pillugit
Inatsisartut inatsisitsinni ataatsimoortumik ataatsikkullu aningaasaliissutissanik
pingaarnersiulluni tulleriiaarisarneq tunngaviusumik periaasiuvoq
pingaarutilik.
Nunatta karsiani aningaasanik
pingaarnersiullutik Inatsisartut tulleriiaarisinnaatitaanerata attatiinnarneqarnissaanut
illersorneqarsinnaanissaanullu taamatullu isumatuumik Aningaasarsiornermut
Naalakkersuinikkut isummersortarnissamut pingaaruteqarluni pisariaqarpoq.
Taamaakkaluartoq Naalakkersuisut
siunnersuutigaat Inatsisartut maannakkuuliinnartoq siunertanut nutaanut
aningaasaliissutissanik immikkoortitseriissasut.
Tamatumunnga pissutaavoq
Naalakkersuisut isumaqarmata 2003-mut aningaasanut inatsissamik
kingusinaartumik akuersissutiginninnissaq arlalippassuartigut suliassaqarfinnut
pineqartunut imaannanngitsunik kingunerluttussaasoq, kingunerlussinnaasoq.
Ataatsimullu isigalugu aammattaaq
inuiaqatigiit aningaasaqarnerannut pitsaanngitsunik kinguneqaratarsinnaalluni.
2002-mut naleqqiullugu 2003-mi
sillimmasiissutinut annertunerusumik aningaasaliisoqarnissaanik
siunnersuuteqarneq pissutaavoq sillimmasiisarfinni nalinginnaasumik
allanngoriartorneq ilaatigut 2001-mi nunani tamalaani pisut kingunerisaannik
sillimmasiisarfinni sillimmasissutit qaffanneqarnerannik kinguneqarsimammat.
Namminersornerullutik Oqartussat
maannamutut 2003-mi sillimmasersimanissaat ingerlatiinnarsinnaajumallugu
sillimmasiissutinut aningaasaliissutit 1,9 million kruuninik amerlineqarnissaat
pisariaqartinneqarpoq. Taamaalilluni tamakkununnga tunngasunik ataatsimut
sillimmasiissutinut aningaasartuutit 9,8 million kruuninik
amerlassuseqalissallutik.
Sinerissamut qanittumi
aalisarnermut aalisariutinik naleqqussaanermut 6,8 million kruuninik
aningaasaliissutit 2003-mi atugassanngortinneqassasut siunnersuutigineqarpoq.
Pissutigalugu aalisariutinik naleqqussaanerup ilaa naatsorsuutigineqartutut
2002-mi naammassineqarsinnaasimanngimmat.
Taamaammat ukiumi
naatsorsuuteqarfiusumi 2002-mi tamakku sipaarsigineqartussanngorput.
Imaluunniit atuinikinneruffiusussanngorput.
Manna tikillugu 2003-mi
aalisariutinik naleqqussaanissamut aningaasanik immikkoortitsisoqanngilaq.
Aalisariutinik naleqqussaanermik suliaq ingerlaannarsinnaaqqullugu Naalakkersuisut
siunnersuutigaat maannakkuuliinnartoq 2003-mi siunertanik tamatumunnga
aningaasaliissutissanik immikkoortitsisoqassasoq.
2002-mi raajat tunineqarneranni
akinut tapiissuteqartoqartarpoq. Akinik minnerpaaffissaliigallarsimaneq
ingerlatiinnarsinnaajumallugu. Qaammatini tulliuttuni
nalilersuisoqartariaqarpoq tamakkununnga tunngasut allatut
iluarsartuunneqarsinnaassanersut.
Tamatumali tungaanut
Naalakkersuisut naliliipput raajat tunisaanerannut atatillugu atuukkallartussamik
killilimmillu tapiissuteqartoqartaannarallarnissaa pisariaqartinneqartoq.
Nunami tunisassiorfiit pillugit naammassisaqarsinnaassutsimik
naleqqussaaneq pillugu 1997-imi isumaqatigiissut 2002-p naanerani
unittussaavoq. 2002-mi ukiakkut isumaqatigiissutip taassuma
malitseqartinneqarsinnaanera oqallisaavoq. Naalakkersuisut naliliipput
nunatsinni sumiiffiit ilaat eqqarsaatigalugit illoqarfiit ilaanni 2003-mi
tunisassiornerup ingerlaannarnissaanik piffissaa killikikkamik
isumaqatigiissuteqartoqartariaqartoq.
2003-p qaammataani siullerni
nutaanik isumaqatigiissuteqartoqartussaavoq. Isumaqatigiissutit tamakkut
Namminersornerullutik Oqartussat aningaasartuutaasa amerlinerat kingunerilluarsinnaavaat.
Naalakkersuisut naliliipput
isumaqatigiissutit nutaat aningaasalersuinikkut matussuserneqarnissaat
qulakkeerniarlugu suliassaqarfiit ilaanni aningaasaliissutit
amerlineqartariaqassasut.
Aamma innarluutilinnut
tunngassuteqartuni ullumikkut annertuumik innarluutilinnut isumaginninnermut
aningaasartuutit qaffariartorput. Aningaasartuutaasartut qaffariartuinnarsimapput
siusinnerusukkut naatsorsuutigineqartumik innarluutillit ikiortariallit
amerlanerusut paasineqarsimammat.
Tamakkununnga tunngassuteqartuni
ikiorsiissutaasartut aaqqissuussinerlu erseqqinnerusumik nalilersorlugit
misissuiffigineqartariaqarput, kisiannili inuiaqatigiinni sanngiinnerusunut
tunngatillugu nukingiussanik aaqqiissuteqartarnissaq pinngitsoortinniarlugu
Naalakkersuisoq naliliipput 2003-mi aningaasaliissutissat amerlineqartariaqartut.
Sanaartornermut tunngassuteqartuni
2002-p ingerlanerani sanaartukkat annikilliartorsimapput arlalippassuartigut
nutarteraluni iluarsaassinissat nutaanillu sanaartornissat pisariaqartitaapput.
Ajortualu aamma uaniissinnaavoq
sanaartornerup annikilleriarnerata kingunerisinnaammagu sanaartornermik
suliaqartut taamatut inuussutissarsiuteqarnerminnik taamaatitsiinnartalernerat
taamaalilluta kingusinnerusukkut tamakkuninnga piginnaasallit
amigaatigilersinnaallutigit.
2003-mut aningaasanut inatsisissap
kingusinaartumik akuersissutigineqarneratigut pissutsit tamakku suli
ajorseriarsinnaapput tassami sanaartugassat sanaartugassanillu pilersaarusiornerit
aallartinneqarsinnaanngillat siunertanut tamakkununnga aningaasaliissutissat
Inatsisartunit akuersissutigineqareersimatinnagit.
Sanaartugassat suli
kinguarsarneqaqqinnissaat pinngitsoortinniarlugu inuiaqatigiillu aningaasaqarmnerannik
tamatuma kingunipiloqarnissaa pinngitsoortinniarlugu Naalakkersuisut siunnersuutigaat
Inatsisartut maannakuuliinnartoq akuersissutigissagaat pingaarnersiuilluni tulleriiaarinerit
2002-mi Inatsisartut aningaasanut inatsisaanni takuneqarsinnaasut nangillugit
killimmik periarfissaliilluni sanaartugassanik aallartitsisoqassasoq.
Sanaartugassanik
pingaarnersiuilluni tulleriiaarineq Inatsisartut aningaasaqarnermut ataatsimiititaliaannit
akuersissutigineqartussaavoq. Naalakkersuisoq sanaartugassanut ullumikkut
ilisimaneqartunut aningaasaliisoqarnissaanullu utaqqissunneqartunut
aningaasartuutissatut missiliukkat aallaavigalugit aningaasaliissutissanik
siunnersuuteqarput.
Kiisalu Naalakkersuisut siunnersuutigaat
sulisitsisut inuussutissarsiutinut ilinniartitaanernut akiliutigisartagaannut
procentiliussaq 2002-misut 0,9 %-iuinnassasoq.
Siunertat tamakku immikkut ittut
Naalakkersuisut maannakkuuliinnartoq aningaasaliissuteqarfiginissaannut
pisariaqartutut isigigaat. Naalakkersuisut qulakkiissavaat aningaasaliissutit
tamakku 2003-mut aningaasanut inatsisissatut siunnersuummut upernaakkut
katersuunnermut suliarineqartussami ilanngullugit suliarineqarnissaat.
Taamaalilluta suliassat pisariaqartinneqartut
ingerlaannarnissaat angussavarput peqatigitillugulu upernaakkut katersuunnermi
nunatta karsiani aningaasat qanoq atorneqarnissaannut qulliunerusumik
pingaarnersiuilluni tulleriiaarinissaannut tunngavissaqartitsiinnassalluta.
Inatsisartut suleriaasianni § 41
innersuussutigalugu Inatsisartut qinnuigissavakka Inatsisartut
suleriaasissaanni 30, imm. siulleq, aamma § 31, imm. siulleq saneqqunneqassasut.
Taamaalilluni 2003-mut inatsisissamut aningaasanut inatsisaagigallagaata
allanngortinneqarnera pillugu Inatsisartut inatsisissaattut siunnersuut
siullermeerinninnermut uiggiutiinnarlugu aappassaaniigassanngortinneqassammat
pingajussaaniigassanngortinneqarlunilu.
Taamatut oqaaseqarlunga siunnersuut
Inatsisartunut suliassanngortippara.
Jonathan Motzfeldt, ataatsimiinnermik aqutsisoq, Inatsisartut Siulittaasuat, Siumut.
Tulliulluni oqaaseqassaaq Siumup
oqaaseqartua Ole Thorleifsen.
Ole
Thorleifsen, Siumup oqaaseqartua.
Qujanaq. Siumumit
nuannaarutigaarput pissusissamisoortuutillugulu taamatut Naalakkersuisut
Inatsisartunut nutaanut aningaasaliissutinut 2003-mut tunngasunik
pingaarutilinnut qinnuteqarnerat pimmat.
Nalunngilarput tamatta
aningaasaqarnermut inatsit 2003 Inatsisartunit qinersisoqartariaqalernera pissutigalugu
naammassineqanngitsoormat.
Utaqqineqartariaqarlunilu
Inatsisartunik qinerseqqaarnissaq tamatuma naammaasinissaanut. Inatsisartut
ataatsimiinnissaat nalinginnaasoq martsip aallartinnerani aatsaat pisussaammat
taamaammat inuiaqatigiit ingerlatsinerata unittuunnginnissaa anguniarlugu makku
pingaarutillit Naalakkersuisunit saqqummiunneqartut Siumumiit paasilluarlugit
akuersaarpagut.
Ukiumut aningaasanut
inatsiseqarfiusumut 2003-mut inatsisartut aningaasanut inatsisigallagaata nr.
6, 17. oktober 2002-meersoq allanngortinneqarnissaa Siumumiit
oqaluuserereerlugu aningaasanut sinaakkusiussat iluaniimmata siunnersuutip
akuersissutigineqarnissaa innersuussutigaarput, kisiannili malugeqqullugu
siunnersuummi immikkoortumik 7, 8, 9 10-milu katillugit 60,1 million kruuninik
aningaasartallit aningaasaqarnermut ataatsimiititaliamit akuerineqareerpata
aatsaat siunertamut atorneqarsinnaaneri.
Naalakkersuisunut Siumumiit
kaammattuutigissavarput Royal Greenlandimut tunisassiornermut
naapertuuttunngorsaanermut eqaatsumik pituttorsimanngitsumillu
inuiaqatigiinnullu ingerlaatsimut naleqqussartuartumik
isumaqatigiissuteqartoqartarnissaa isumageqqullugu.
Nuka A/S aammalu taamaaqataasa
tunisassiornermik ingerlanerunissatsik qulakkeertariaqarmassuk. Nuka A/S
aaqqiissuteqarnissaq Siumumiit tamakkiisumik tapersersorparput.
Sinerissap qanittuani
aalisarnerup naapertuuttunngorsarneqarnera aaqqiissuteqaqqinneqarneralu
ingerlaannarsinnaaqqullugu Naalakkersuisut qanoq iliuuseqarnerat
iluarisimaarlugu taperserparput. Suliallu ingerlaqqinnissaannut kattuffiit
susassaqartut tamaasa peqatigalugit kiisalu Inatsisartut Aalisarnermut
Ataatsimiititaliaata qanimut suleqatigineqarnissaa inassutigaarput.
Kommunit tamarmik
sanaartugassanut iluarsagassanullu tunngatillugu pilersaarusiortalernerat
aammalu sanaartugassat pilersaarutaareersut ingerlateqqinnissaat Siumumiit
pingaartilluinnarlugit isigigatsigit tassuunakkut unittoorneqannginnissaa
pissappat maannakkuugallartoq aningaasaliissutinik atuinissamik Naalakkersuisut
pisinnaatitsissummik qinnuteqaataat Siumumiit paasilluarlugit akuersaarpagut,
ilanngullugulu innarluutillit kommuninini sullinneqarnerannut
aningaasaliissutit malinnatinneqartuarnissaat Siumumiit
pingaaruteqarluinnartutut isumaqarfigaarput nalunnginnatsigu kommunit
aningaasanik atuinerat aningaasaliissuteqartoqanngippat aningaasanut
inatsisaanni maanna ukiup naajartulernerani amigartooruteqartussaanerannik
kinguneqartussaammat.
Aammalu nikingasooruteqartoqarpat
tassa Namminersornerusut aningaasaliissutaannik matussuserneqartussaasut.
Tamannalu Naalakkersuisut maanna
aaqqiissuteqarfiginiarlugu qinnuteqarput. Tamanna Siumumiit tamakkiisumik
akuersaarparput.
Taamatut oqaaseqarluta ukiumut
aningaasanik qinnuteqarfiusumut 2003-mut Inatsisartut aningaasanut
inatsisigigallagaata allanngortinneqarnera pillugu Inatsisartut inatsisaattut
Siumumiit taperserlugu taaseqataaffigissavarput. Qujanaq
Jonathan
Motzfeldt, ataatsimiinnermik aqutsisoq, Inatsisartut
Siulittaasuat, Siumut.
Qujanaq. Tulliulluni
oqaaseqassaaq Aqqalukasik Kanuthsen, Inuit Ataqatigiit.
Aqqalukasik
Kanuthsen, Inuit Ataqatigiit oqaaseqartuat.
Ukiumut aningaasanik
inatsiseqarfiusumut 2003-mut Inatsisartut aningaasanut inatsisigigallagaata
allanngortinneqarnera pillugu Inatsisartut inatsisaata
allanngortinneqarnissaanut Inuit Ataqatigiinninngaaniit makku oqaaseriumavagut.
Allannguutissatut siunnersuummi
inuiaqatigiinni pinngitsoorneqarsinnaanngitsunik ilaqarput
aningaasaliiffigisariaqakkatsinnik. 2003-mi aningaasanut inatsisaagallartut
tamakkiisumik upernaamut allanngortinnissaata tungaanut
utaqqissunneqarsinnaanngitsunik.
Allannguutissatut siunnersuummi
pineqarput upernaamut 2003-mi aningaasanut inatsisissap suliarineqarnissaanut
ilanngunneqartussat.
Taamaattumik Naalakkersuisut
piffissami aningaasaqanermut inatsisip tamakkiisumik suliarineqareernissaata
tungaanut ingerlatsinermut aalisarnermut tunisassiornermut sanaartornermut
inunnik isumaginninnermilu aningaasartuutissanut ilisimaneqareersunut
aningaasaliinissaat pisariaqarpoq.
Innarluutillit ikiortariallit
amerlanerunerat paasineqarsimasoq pillugu Inuit Ataqatigiit paaserusussavarput
pineqartut pillugit kommuninut oqartussaaffiup tunniunneqarnerini sunik
najoqqutassinneqarsimanersut.
Upernaamut katersuunnissatsinnut
2003-mut aningaasanik inatsisissap suliarineqarnissaanut Inuit Ataqatigiit
peqataassaagut tamatumani nunatta aningaasaqarniarnera pingaarnersiuineq
tulleriiaarinerlu aallaavigissagigut maannangaaq nalunaarutigeriissavarput.
Taamatut oqaaseqarluta 2003-mi
Inatsisartut aningaasanut inatsisigigallagaata allanngortinneqarnissaanut
siunnersuut ingerlaannartumik aappassaaneerneqarnissaanut
pingajussaaneerneqarnissaanullu inatsisitigut periarfissaq malillugu
allannguutissatut siunnersuut akuersaarparput.
Jonathan
Motzfeldt, ataatsimiinnermik aqutsisoq, Inatsisartut
Siulittaasuat, Siumut.
Qujanaq. Tulliulluni
oqaaseqassaaq Atassummit Augusta Salling.
Augusta
Salling, Atassutip oqaaseqartua.
Qujanaq. Ukiumut aningaasanut
inatsiseqarfiusumut 2003-mut Inatsisartut aningaasanut inatsisigigallagaata
allanngortinneqarnera pillugu Inatsisartut inatsisissaattut siunnersuut pillugu
ima oqaaseqassaagut.
Qinersisoqarnissaanik aalajangiussinerup
kingorna 2003-mut Inatsisartut aningaasanik inatsisissaattut
siunnersuutaasimasoq naammassineqanngitsoormat ukiumut aningaasanut
inatsiseqarfiusumut 2003-mut Inatsisartut aningaasaliissutinut
inatsisigigallagaat kisiat tunngavigissallugu naammanngitsoq Atassummiit
ilisimaarilluaratsigu allannguutissamik Naalakkersuisut siunnersuuteqarnissaat
pinngitsoorneqarsinnaanngitsutut nalilerparput.
Tassa upernaamut Inatsisartut
katersuunnissaannut taamaalilluni 2003-mi Inatsisartut aningaasanut inatsisissaata
aalajangiunneqarnissaata tungaanut aningaasaliiffigisariaqakkat
utaqqissunneqarsinnaangitsut arlaqartut ilisimalluarparput. Taamaattorli
Atassummiit pinngitsoorusunngilagut uku apeqqutigissallugit:
Allannguutissatut siunnersuutip
immikkoortuisa pingajuanni raajanik tunisinermi akinut tapiissutini 10 million
kruunit immikkoortinneqassasut Naalakkersuisunit siunnersuutigineqarpoq.
Nassuiaatigineqarlunilu aningaasat taakku ukiumut aningaasartuutaasartunut
naapertuutsilerneqarsimasut.
Innersuussutigalugu KNAPK-p,
Royal Greenlandip aammalu APK atsioqatigalugit taggissimasaat ukioq manna
tapiissutaasimasut 23,6 million kruunit nalingi pisariaqartinneqassasut
matumuuna Atassummiit apeqqutigissavarput uuttuut suut atorlugit 10 million
kruunit raajanik tunisinermik akinut tapiissutitut aalajangiunniarneqarnersut.
Sanaartornermut
iluarsartuussinermullu tunngatillugu aningaasaliiffigineqareersimasut
aallartinneqareersinnaanissaannut, aallartinneqarsinnaanissaannut
qularnaarinninniarneq Atassummiit iluarisimaarparput, nalunnginnatsigu nunatta
minnerunngitsumillu kommunit aningaasaqarnerannut aningaasanillu
kaaviiaartitsinerannut sanaartornermi iluarsartuussinermilu
aningaasaliunneqarsimasut piffissaq eqqorlugu piviusunngortinniarneqarnissaat
pingaaruteqarluinnarmat.
Taamatulli oqareerluta aamma
oqaatigissavarput soorunami Atassummiit pingaartikkatsigu Inatsisartut
pingaarnersiuillutik tulleriiaarisussaanissaat. Matumuunalu Naalakkersuisunut
erseqqissaatigeqqussavarput sanaartugassat iluarsagassallu nutaat sorliit
aningaasaliiffigeqqullugit matumani eqqartorneqarnersut.
Taamatut oqaaseqarluta ukiumut
aningaasanut inatsiseqarfiusumut 2003-mut inatsisissatut Inatsisartut
aningaasanut inatsisigigallagaata allanngortinneqarnera pillugu Inatsisartut
inatsisissaattut siunnersuutip siullermeerneqarnera oqaaseqarfigaarput.
Inassutigissallugulu aappassaaneerneqannginnermini aningaasaqanermut
ataatsimiititaliami oqallisigineqassasoq. Qujanaq.
Jonathan
Motzfeldt, ataatsimiinnermik aqutsisoq, Inatsisartut
Siulittaasuat, Siumut.
Ingerlaqqitsinnata
oqaatigilaassavara Inatsisartut suleriaasianni § 53-imi allassimammassuk
Inatsisartut ataatsimiinneri kalaallisut ingerlanneqartassapput qallunaatullu
malinnaaffigineqarsinnaassallutik.
Inatsisartuni ilaasortaq
qallunnaatuinnaq oqaluttuuppat ataatsimiinnerit kalaallisut aamma
malinnaaffigineqarsinnaassapput. Tulliullunilu
oqaaseqassaaq Per Skaaning, Demokratit.
Per Skaaning, Demokraatit
oqaaseqartuat.
Tassa amerlanerusunik oqaaseqarnata
nalakkersuisut aningaasanik inatsisissaagallartumik siunnersuutaasumik
inatsisissaagallartumik siunnersuutaa tapersersussavarput.
Jonathan Motzfeldt, ataatsimiinnermik aqutsisoq, Inatsisartut
Siulittaasuat, Siumut.
Anthon Frederiksen, Kattusseqatigiit.
Anthon Frederiksen, Kattusseqatigiit.
2003-mut Inatsisartut aningaasanut inatsisaattut
siunnersuutip siullermeerneqarnerani aammalu aningaasanut inatsisaagallartup
atuuttussanngortinneqarnerani Kattusseqatigiinniit oqaaseqaatigut
innersuussutigalugit 2003-mut aningaasanut inatsisaagallartumut
allannguutissatut siunnersuummut Kattusseqatigiinniit imaattumik
oqaaseqassuugut.
Kattusseqatigiinni pingaartilluinnakkatta ilagaat
Kalaallit Nunatsinni aningaasaqarnikkut unittuunnginnissaq qulakkiissallugu.
Taamaattumik ukiumi qaangiutilersumi immikkut ittumik pisoqarnera
pissutigalugu 2003-mut aningaasanut inatsisissatut siunnersuutaagallartup
Inatsisartunit naammassineqannginnera aammalu Inatsisartut nutaat
Naalakkersuisullu nutaat suliap inuiaqatigiinnut pingaaruteqaqisup isumatuumik
pipallataanngitsumillu minnerunngitsumillu aamma inuiaqatigiinnut
sapinngisamik pitsaasumik sunniuteqarluartumillu naammassineqarnissaa
pissutigalugu Kattusseqatigiit sinnerlugit Naalakkersuisut 2003-mut aningaasanut
inatsisaagallartussamut allannguutissatut siunnersuuteqanerat paasilluarlugu
suleqataaffigissavara.
Minnerunngitsumik aamma suliassat assigiinngitsut
unittooratik annerusumillu kinguarsarneqaratik ingerlatiinnarneqarnissaat
qulakkeerumallugit.
Taamaatorli taamak oqareerlunga oqaatigissavara 2003-mut
aningaasanut inatsisissap akuersissutigivinnissaa kommuninut assigiinngitsunut
pilersaarutit assigiinngitsut kipusoortikkumanagit ilaatigut sanaartugassat
iluarsaatassallu aamma eqqarsaatigalugit pilersaarutaareersut
ilanngartinneqannginnissaat Kattusseqatigiinniit Naalakkersuisunut
kaammattuutigiumavara.
Kattusseqatigiit sinnerlugit oqareernittut
paasisinnaalluarpara suliat assigiinngitsut ingerlaannarnissaat
qulakkeerumallugit immikkut aningaasanut inatsisaagallartussap
ilassuteqarfigineqarnissaa avaqqukkuminaassasoq.
Maannamummi aamma paasinarsereermat kommunit ataasiakkat
aamma sanaartugassat iluarsaatassallu eqqarsaatigalugit aappagumut
missingersuutitik immaqa suliareqqittariaqassagaat tassa aningaasaliissutissatut
siunnersuutigereersimasut allannguuteqassagaluarpata. Aammalu maannamut
inuussutissarsiutit pingaarnersaat tassalu aalisarneq piniarnerlu
eqqarsaatigalugit ukiup imaalinerani ilaatigut aamma pinngortitap immikkut
illuinnartumik pissuteqarneranik kinguneqartumik aalisarnermik piniarnermillu
inuussutissarsiuteqartut ilaatigut imaannaanngitsunik atugaqartut
eqqarsaatigalugit Kattusseqatigiinniit Naalakkersuisunut kaammattuutigissavarput
aalisanermik piniarnermillu inuussutissarsiuteqartunut immikkut ittumik iliuuseqarniaqqullugit.
Tassami naluneqanngitsutut ajunaarnersuarmut aningaasaateqarfik maanna
imaqanngilaq. Pisariaqartitsinerlu naapertorlugu ikiorsiinissamut
piareersimasoqartariaqarmat.
Aamma piujuaannartitsinissaq siunertaralugu Naalakkersuisut
anguniagaat soqutiginarluinnartut aalisarnermik piniarnermillu
inuussutissarsiuteqartunut minnerunngitsumillu nunatsinni aningaasarsiornikkut
annertuumik sunniuteqartartut pimoorullugit timitalerneqarnissaat piffinni
assigiinngitsuni aalisartut kommunillu paaseqatigalugit suleqatigalugillu
ingerlanneqarnissaat Kattusseqatigiinniit nunatta aningaasaqarniarneranut
pingaaruteqarluinnarmata aamma eqqaasitsissutigissavarput.
Sanaartugassanut tunngatillugu aamma sanaartugassat ilaatigut
ukioq manna kommunit ilaannut aamma aningaasaqarnikkut
suliffissaqartitsiniarnermullu sunniuteqarnerlussimasut qaangerniarlugit
kommunit oqartussaaffii akisussaaffiillu annertunerusut tunniunneqarnissaat
pimoorullugu Naalakkersuisut maannangaaq sulissutigissagaat
Kattusseqatigiinniit inussiarnersumik kaammattuutigaarput.
Tassami naluneqanngitsutut sanaartugassat ilaat ukioq
manna aallartinneqareertussaagaluit maannamut suli aallartinneqarsimanngillat.
Matumani assersuutigalugu oqaatigissavarput Ilulissani ilinniartorpassuarnik
erinigineqarlutillu atorfissaqartinneqaqisut ilinniartut inissiaat suli
aallartinneqanngimmata.
Taamatuttaaq aamma illoqarfiit ilaanni
aningaasaleeriaaseq 6.040 atorlugu sanaartugassaagaluit uninngatinneqartut.
Aammalu Inatsisartunit akuerineqaratik ilaatigut taamaatinneqarsimasut
pillugit Naalakkersuisut sulissutigeqqittariaqaraat kaammattuutigerusupparput.
Tassami Inatsisartunit ilisimaneqarpoq sanaartugassat
ilaatigut pisariaqarsorinanngitsumik aammalu marloqiusamik allaffissorneq
ilaatigut pissutigalugit kinguarsarneqartarnerat qaangerneqartariaqarmat.
Kattusseqatigiinniit oqareernitsitut nunatta
aningaasaqarnikkut imminut akilersinnaasumik ingerlanneqarnissaa pingaartillugu
suleqataaffigeqqissavarput. Taamaattumik suliassat suulluunniit
inuiaqatigiinnut pingaaruteqartut pissutsit piviusut tunngavigalugit
pilersaarusiorluakkamik suliarineqartarnissaat kaammattuutigeqqinniarparput.
Taamaammallu suliat ilaatigut aamma nukippassuarnik aningaasarpassuillu
atorlugit misissuinertigut uppernarsarneqareersut nunatsinnut niuernikkut
inuussutissarsiornikkut takornariaqarnikkut angallannikkullu siuarsaanermut
pingaaruteqarluinnartussat attatiinnarneqarnissaat aamma Kattusseqatigiinniit
Naalakkersuisunut kaammattuutigissavarput.
Matumani ilaatigut Nuup aamma Ilulissat timmisartunut
suluusalinnut mittarfiisa pilersaarutit naapertorlugit tallineqarnissaannut
suliniutit ingerlanneqareersut nunatsinnut aningaasaqarnikkut angallannikkut
niuernikkut takornariaqarnikkullu nunamut tamarmut pitsaasumik imminullu
akilersinnaasumik ingerlanneqarnissaat qulakkeerniarlugu suliniutit
ingerlatiinnarneqarnissaat qulakkeerneqartariaqartut Kattusseqatigiinniit
kaammattuutigeqqikkusupparput.
Tassami naluneqanngitsutut mittarfiit taakku marluk
nunatsinni angallannikkut pingaaruteqaannaratik aammali tassaammata
amigaartooruteqarfiunngitsumik ingerlatsiffiusut. Tassami Ilulissat
eqqarsaatigalugit takornariartitsinerlu kisialluunniit eqqarsaatigalugu
takornarissat 2001-mi naatsorsueqqissaartarfiup kisitsisaatai naapertorlugit
takornarissat nunatsinnut 4.000-tit missaat tikissimapput. Taakkunanngalu
affaasa missai Ilulissanut tikissimallutik.
Taamaattumik takornariartitsineq siunissami inuussutissarsiutinut
suli annerusumik tapertarineqarlunilu isumalluutigineqarnerulissappat
Ilulissat mittarfiata aamma tallineqarnissaa avaqqukkuminaatsorujussuuvoq.
Taamaammat suliniutit taamaattut nunatsinnut tamarmut
iluaqusiisussat attatiinnarneqarnissaat Kattusseqatigiinniit
kaammattuutigeqqikkusupparput. Allarpassuarnik oqaasissaqarnaraluaqisoq
2003-mut aningaasanut inatsimmut siunnersuutip naammassivinnissaa qularnaarlugu
oqallinnissamut peqataaqqinnissara piareersimaffigissavara.
Taamatullu oqaaseqarlunga Naalakkersuisut sulianik
kinguartinneqarsinnaanngitsunik pin-
ngitsooranilu aningaasanik atuiffiusariaqartunik
ingerlatsinissaat qulakkeerniarlugu 2003-mut aningaasanut
inatsisisaagallartumut ilassutissatut siunnersuutaat Kattusseqatigiit sinnerlugit
akuersaarpara aammalu suleriaatsimi aalajangersakkat naapertorlugit suliap
aappassaaneerneqarluni pingajussaaneerneqarnissaat aamma akuersaarlugu.
Jonathan Motzfeldt, ataatsimiinnermi aqutsisoq, Inatsisartut Siulittaasuat,
Siumut.
Qujanaq. Aningaasarsiornermut Naalakkersuisoq.
Josef Motzfeldt, Aningaasaqarnermut Naalakkersuisoq Nunanullu Allanut
Tunngasunut Naalakkersuisoq, Inuit Ataqatigiit.
Partiit oqaaserisaat ataasiakkaarlugit naatsukullammik
oqaaseqarfigissavakka.
Tassa siullermik siumuminngaaniit rgmut aammalu Nuka
A/S-imut tunngasunik oqaaserisaannut oqaatigissavarput
Naalakkersuisuninngaaniit soorunami isumaqatigiinniarnerit uani isumaqatigiissut
97-iminngaanneersoq tassalu tunisassiorfiit pillugit naammassisaqarsinnaassutsimut
naleqqussaanermut tunngasut taamanernisaapput massakkullu ukiup naanerani
atuukkunnaartussaammata Naalakkersuisuugallartut, Naalakkersuisut siulivut
taakkua isumaqatigiinninarnernik ingerlatsereersimapput.
Massakkullu inaarsarnissaa taassuma Naalakkersuisunit
inaarneqarluni atsiorneqarnissaa isumagissavaat.
Soorunami pissutsit aalisarnikkullu aamma aalisakkanillu
tunisassiornikkut amerlanerusut soqutigisaqarlutik aallartitsisinnaanerat
Naalakkersuisut ukiuni kingullerni arajutsisimasimanngikkaat nalunngilarput.
Taamaattumik eqaatsumik aammalu mattusinertaqanngitsumik
tamatuma piviusunngortinniarnissaa Naalakkersuisut nutaat soqutigalugu
ingerlateqqissavaat.
Taavalu Siumuminngaaniit aamma sinerissap qanittuani
aalisariutinik naleqqussaanermut atatillugu kattuffiit taavalu aamma
inatsisartut aalisarnermut piniarnermut nunalerinermullu ataatsimiititaliaa
peqatigalugu qanimut suleqatigilluinnarlugu ilisimatitseqatigiinnermik toqqammaveqartumik
ingerlateqqinneqarnissaa kaammattuutigineqarmat tamanna Naalakkersuisuninngaaniit
soqutigalugu aamma ingerlanniarparput.
Inuit Ataqatigiinnut, Inuit Ataqatigiinninngaanniit
apeqqutigineqarpoq kommuninut innarluutillit kiffartuunneqarnerat pillugu
kommuninut akisussaaffimmik tunniussuinermi najoqqutassanik taamatut akisussaaffimmik
tunniussineq najoqqutassanik malitseqartinneqarsimanersoq.
Tamanna immaqa erseqqissumik
oqaatigilluaannartariaqarpoq tamanna naammaginartumik najoqqutassanik
nassataqartinneqarsimanngilaq Naalakkersuisunit siulitsinninngaaniit.
Siusinnerusukkut imaluunniit oktoberip qiteqqunnissaata
tungaanut ukioq manna nunap immikkoortuini isumaginninnermik
Naalakkersuisoqarfiup immikkoortortaqarfiisa sulisuisa aningaasanik
atuisinnaanermut piginnaatitaanertik qulakkeeqqaarnagu aningaasanik ilumut matussutissaqarnersoq
qulakkeeqqaarnagu tamanna ingerlattarsimavaat. Sualummik kommunit
misileraarnerup misiliinerup avataaniittut eqqarsaatigalugit.
Aamma pisortaqarfiup piffissap ingerlanerani
paasisimavaa innarluutillit amerlanerusut amerlanerujartortut massakkut
kiffartuunneqarnermut peqataatinneqartariaqartut.
Massakkut pisortaqarfimmi nutaami tassalu ilaqutariinnut
peqqissutsimullu pisortaqarfimmi nutaatut pilersinneqartussaq
atuutsinneqalersoq tassaavoq Naalakkersuisunut ilaasortap taavalu kommunit
pineqartut borgmesteriata akornanni misiliinermi toqqammaviusussat isumaqatigiissutigisassagaat.
Siusinnerusukkut imaassimagaluarami nunap immikkoortuani immikkoortortaqarfiup
sulisuisa borgmesterillu akornanni kommunit pineqartut borgmesteriata akornanni
taamaallaat ingerlanneqartarsimalluni.
Massakkut aaqqeeriarnerup kingunerisussaavaa
ingerlaavartumik ilumut aningaasanik matussutissaqarnersoq
nakkutigineqarsinnaanngussooq. Taavalu aamma aningaasartuutissatut qinnutigineqartut
pissutsinut atuuttunut naleqqunnerusunngortariaqarput.
Ullumikkut oqaatigineqartariaqarpoq ukioq manna
minnerunngitsumik aningaasarparujussuit tamatumunnga misiliinermut
annertunerusumik nakkutigineqanngitsumik atorneqartariaqarsimammata.
Malittarisassaqannginneq aningaasartuutit
atuinnariarlugit annertuutigut Namminersornerullutik Oqartussat
akiligassanngorlugit nassiunneqartarsimaneranik kinguneqartumik.
Taanna aaqqinneqassasoq Naalakkersuisunngortut taanna
neriorsuutigereerpaat aamma aallartereerlugu.
Atassutikkut oqaaseqartuannut tassani raajat akiisa
tunineqarneranni raajat akinik minnerpaaffiliinissamut sooq 10 millioninik
suna uuttuutigalugu 10 millioninik aningaasartalerneqassasoq
siunnersuutigineqarnersoq apeqqutigineqarpoq.
Kattuffiit pineqartut allatut isumaqarnerat 23, qassit
millioninik pisariaqartitsisoqarnera eqqaasimammassuk. Eqqaamaneqassaaq
2000-imi upernaakkut raajarniarnermi pissutsit raajat akiissa
appariartupiloorujussuarnerannik akinik minnerpaaffiliisariaqarneq taamanikkut
pissutsit toqqammavigalugit aalajangersaavigineqarsimammat
aningaasaliiffigineqarlunilu.
Naalakkersuisut massakkut saqqummiussinitsinni
ilanngullugu oqaatigivarput 2002-mi raajat tunineqarnerannut akiinik
tapiissuteqartoqarpoq. Akinik minnerpaaffissaliigallarsimaneq
ingerlatiinnarsinnaajumallugu.
Taava massakkut oqarpugut, qaammatini tulliuttuni
nalilersuisoqartariaqarpoq tamakkununnga tunngasut allatut
iluarsartuunneqarsinnaanersut. Tassa kattuffiit taavalu aamma raajanut
pisiortortut peqatigalugit massakkut misissortariaqarparput ilumut ukioq
kaajallavillugu assigiilluinnaqqinnaamik ullumikkutut tapiisoqartassanersoq
imaluunniit aaqqissuussineq allaanerusoq nassaarineqarsinnaanersoq.
Taamaattumik inatsisissap aningaasanut inatsisissap
tamakkiisumik martsimi suliarineqarnissaata tungaanut Naalakkersuisut
naliliisimavugut 10 millionit taakkua atugassanngortinneqartariaqartut.
Taava qaammatit tullii atussavagut kattuffiit tunisassiorfiillu
peqatigalugit tamatuma allaanerusumik aaqqinneqarsinnaanera aalisarnermik
ingerlataqartunut tamakkiisumik pissutsinik ajornerulersitsinngikkaluartumik.
Taavalu sanaartugassanut atassutip oqaasii tassalu
kommunit peqatigalugit aamma siaammaaniarnermut tunngassuteqarnerusuugunartut
taakkua Naalakkersuisunngortitseqatigiinnermi aamma Kattusseqatigiinnut taanna
tunngavoq. Naalakkersuisunngortitseqatigiinnermi isumaqatigiissutaavoq
sanaartugassat oqartussaaffiginerisa siammarneqarneqarnissaat kommuninut.
Tassalu taanna soorunami ulluinnaq
suliarineqarsinnaanngilaq. Aqaguinnarneqarsinnaanngilaq. Misissuilluta
kommunit kattuffiannik isumaqatigiissutit nutarternissaannut pisussaaffinnik
aalajangersaasimaneq allanngortinniartariaqassooq isumaqatigiinniutigalugulu.
Taanna siunnerfiuvoq neriorsuutigissavara.
Taavalu Demokraatinit oqaatigineqartut
qujassutigissavakka annertunerusumik Naalakkersuisut pisariaqartutut
naliliisimanerat akuersaarmassuk. Kattusseqatigiinnut Naalakkersuisuni arajutsisimanngilarput
silaannaap minnerunngitsumik silaannaap kissaata allanngoriartorneranik,
allanngoriartornerata kinguneranik nunatta immikkoortuini minnerunngitsumik
piniarnerinnarmik annertunerusumik inuussuteqarfiusumik ajornartorsiutit
annertuujummata.
Sikujumaataarnera umiatsiarfiunanilu
qimusserfiusinnaanngikkallarnerani ajornartorsiutit atuuttut
kommunininngaanniit eqqorneqartunit Naalakkersuisunut apuussorneqarput.
Soorunami taakkua nalilersuiffigineqassapput
Naalakkersuisuninngaaniit. Ilungersunarpoq, pissutsit
ilungersunartorujussuartut oqaatigineqartariaqarput.
Taavalu aamma piujuaannartitsinissaq imaluunniit
nungusaataanngitsumik pisuussutinik uumassusulinnik atuinermut Kattusseqatigiit
oqaasii qujassutigissavagut, qujassutigissavakka Naalakkersuisut sinnerlugit.
Tassanilu tassa minnerunngitsumik aalisarnermi,
minnerunngitsumik aalisarnermik piniarnermilu inuussutissarsiutit
ingerlannerani tamatuma toqqammaviunissaa paasinarpoq Inatsisartunit
isumaqatigineqartoq. Kisianni aamma kommunit taavalu aamma aalisarnermik
piniarnermillu ingerlataqartut kattuffiit suleqatigalugit qanoq taassuma
atuutsinneqarnissaa taavalu aamma piniakkanik uumasusilinnillu nalinginnaasumik
atuinerup kommuninut annertunerujartortumik tunniukkiartuaarnissaa aamma
isumaqatigiinniutit ilagisariaqassavaat.
Tamakkiisumik nuna tamakkerlugu
toqqammaveqarsinnaavugut. Kisianni taassuma saniatigut kommunit nammineq
sumiiffitik najoqqutaralugit peqassuseq piujuaannartitsinissarlu toqqammavigalugu
qitiusuminngaaniit aalajangersakkanik suli pitsaanerusumik siunnersuutissaqassappata
tamatuma piviusunngortikkiartuaarnissaa Inatsisartuni ukiuni arlaqartuni
oqaluuserineqarsimasoq Naalakkersuisut soorunami sulinerminni aamma
alaatsinaassavaat, arajutsinaveersaassavaat.
Sanaartorneq oqaaseqarfigereerpara. Marloqiusamik
allaffissornermik nassataqartartoq kommunit Namminersornerullutik Oqartussallu
akornanni massakkut attaveqatigiinnermut avatangiisinut ineqarnermullu
Naalakkersuisoqarfimmut Naalakkersuisup isumagisassaasa ilagigaattut
Naalakkersuisuni isumaqatigiissutaavoq suut sanaartornerup sanaartornermut
kinequtaasimasut kigaalaaqutaasimasinnaasut misissorluinnaqqissaartariaqartut
ilaatigut taanna marloqiusamik allaffissorneq aammalu pilersaarusiornermi
kanani suleriaatsit qanoq ittuunersut avataaninngaaniillu siunnersortinik
atuisarneq taakku taarmik ataatsimut nalilerneqassapput.
Tamatta soqutigisarput tassaasariaqarpoq ullumikkut
sanaartornermut iluarsaasseqqinnissamullu aningaasaateqarfik ukiup matuma
naanerani qularnanngilaq milliardit affai angullugit aningaasanik
imaqalertussaammat naak sanaartugassatigut pisariaqartinneqartut sinerissami
tamarmik annertuujugaluartut.
Taamaattumik eqaallisaanissaq ukiuni arlaqartuni eqqartorneqarsimasoq
suli tamakkiisumik naammaginartumik naammassinniffiusimanngitsoq
iluarsiissuteqarfiginiarlugu Naalakkersuisut ilungersuutiginiarpaat, kisianni
tassani qularnanngilaq uani sanaassat sunarpiaat Atassumminngaaniit
apeqqutigineqartut matumani pineqarnersut isumaqarpunga pissusissamisuussasoq
Attaveqatigiinnermut Avatangiisinut Ineqarnermullu Naalakkersuisup tamanna
erseqqissaateqarfigissappagu.
Aammalu qularnanngilaq innarluutillit
kiffartuunneqarneranut tunngatillugu Ilaqutariinnut Peqqissutsimullu
Naalakkersuisut ukununnga oqaatsinnut ilassutissaqassajunnarsivoq.
Mittarfilersaarnianngilanga ullumikkut Kattusseqatigiit
mittarfilersaarusukkaluartoq. Qularnanngilaq upernaaru aningaasanut
inatsisissamut taakkua mittarfiit qanoq iliuuseqarfigineqarsinnaanerat
Naalakkersuisut naliliiffigissavaat. Massakkut atagu una utaqqiisaagallartumik
qaammatini pingasuni siullerni inatsisissami toqqammaviginiakkagu
qinnutigisavullu oqaluuserilaaqqaarallartigit.
Jonathan Motzfeldt, ataatsimiinnermik aqutsisoq, Inatsisartut
Siulittaasuat, Siumut.
Aap, tulliulluni oqaaseqassaaq Inuussutissarsiornermut
Naalakkersuisoq Mikael Petersen.
Mikael Petersen, Inuussutissarsiornermut Naalakkersuisoq, Siumut.
Qujanaq. Aningaasarsiornermut Naalakkersuisup
akissuteqaataanut ilassutigilaarlugu tassa tunisassiorfeqarnermut tunngatillugu
Siumuminngaaniit oqariartuutigineqartoq aammalu partiinit allaninngaaniit
ilanngullugit aamma eqqartorneqartut tunisassiorfeqarnermut tunngasut nutaamik
aaqqiivigeqqinnissaannut tunngassuteqartut oqaaseqarfigilaassavakka. Aamma
erseqqissaateqalaarlunga.
Tamanit naluneqanngitsutut Royal Greenlandip
naapertuuttunngorsaaneq pillugu isumaqatigiissutaa Namminersornerullutik
Oqartussanut ukioq manna 2002-mi naasussaavoq.
Aamma ukiuni kingullerni taanna Inatsisartuni
annertoorujussuarmik oqallisigineqartarpoq. Ilaatigut pituttuivallaarnera
pillugu, ilaatigullu taassumap aamma isumaqatigiissutip atuunnermini
tunisassassiassatigut suliffissuaqarnikkut soqutigisat assigiinngitsut
eqqarsaatigalugit. Aammalu tuniassiassat aalajangersimasut imminnut
arsaartuuttumik ingerlanneqarnera taanna annertuumik ajornartorsiutaasarluni.
Minnerunngitsumik soorlu qalerallit tunisassiarineqarnerat eqqarsaatigalugu.
Taamaattumik Naalakkersuisuni
eqqumaffigeqqissaarniarparput taamatut tunisassiornerit imminnut
arsaartuutinngitsumik ingerlanneqarnissaat qulakkeerniassallugu. Taamaalilluta
ingerlaavartumik suliffissuaqarnikkut nunaqarfinni illoqarfinnilu
ingerlatsinissaq aamma qulakkeerniarsarissallugu. Soorunami ajornartorsiutit
assigiinngitsut naapinneqartarumaarput.
Kisianni taamatut eqqarsarluni aallaaveqarlunilu Royal
Greenlandimut Nuka A/S-imullu isumaqatigiinniarnissat
ingerlanniartussaassavagut ukiup aallartilaarnerani.
Taamaattumik nuannaarutigaara uangattaaq Inatsisartut
akuersaarmassuk massakkut taamatut nutaamik isumaqatigiissuteqarnissamut aamma
aningaasaliissuteqaqqinnissamik tunngasut naammassiniaqquneqarmata
Naalakkersuisunit.
Tassunga tunngatillugu erseqqissaatigilaassavara taakkua
18 millionit ukiumut 2003-mut tunngassuteqartut taakkua pingaarnertut
aallaaveqarallarmata tassa Qeqertarsuarmi, Paamiuni Qasigiannguani kiisalu
aamma Nuka A/S-imut tunngatillugu Alluitsup Paani suliffissuaqarnikkut
ingerlatsinerit suliffissaqartitsinissallu qulakkeerniarlugit.
Soorunami illoqarfiit allat aamma eqqarsaatigalugit
Naalakkersuisuninngaanniit oqaatigeriissavarput suliffissuartigut
ingerlatsinerit aalisarnermut naapertuuttumik ingerlanneqarnissaat
qulakkeerniarlugu suliniutit aamma aallartereerumaaratsigit. Taamaalilluta
aalisarneq aammalu tunisassiorfitsigut ingerlatsineq imminnut naapertuuttumik
ingerlanneqarnissaat qulakkeerniarluagu.
Taakkua saniatigut ilanngullugu oqaatigeriissavara aamma
Naalakkersuisuni siunnerfigigatsigu sulisussatigut amigaateqalersarneq
eqqarsaatigalugu suliffissuaqarnermi nunaqarfinni illoqarfinnilu
naapertuuttumik aamma taanna aaqqissuutissagatsigu.
Tassa naatsumik oqaatigalugu aalisarnerup
tunisassiorfeqarnerup sulisussaqarnerullu imminut naapertuutsinnissaat
sukumiisumik nalilersoqqissaarlugu aallaavigalugu isumaqatigiissutit
suliariumaaratsigit.
Jonathan Motzfeldt, ataatsimiinnermik aqutsisoq, Inatsisartut
Siulittaasuat, Siumut.
Oqallinneq ingerlaqqitsinnagu erseqqissaatigilaassavara
Naalakkersuisut siunnersuutigimmatigit uani maannakkut inatsisaagallartumut
allannguutissat, inatsisaagallartumut allannguutissat upernaaru 2003-mi
ataatsimiinnissap tungaanut atuuttussat allannguutissat suliarineqarmata.
Taakkulu nukinginnartutut isigineqarmata taava maannamut
partiip ataatsip kisimi udvalgemi suliarineqarnissaa kissaatigaa, tassa
Atassutip sinnerisa nukinginnartumik suliarineqarnissaat tamarmik
akuersaarpaat.
Taanna eqqaasitsissutigaara. Tulliulluni oqaaseqassaaq
Per Rosing-Petersen, Siumut.
Per Rosing-Petersen, Aningaasaqarnermut Ataatsimiititaliap siulittaasua,
Siumut.
Qujanaq. Naatsukullannguamik
aningaasaqarnermut ataatsimiititaliap siulittaasuatut oqaaseqassaanga -
nuattorujussuugama aamma.
Soorlu Inatsisartut
Siulittaasuata oqarneratut una ullumikkut siullermeerlugu aappassaaneerlugulu
pingajussaaniigassanngorlugu Naalakkersuisunit siunnersuutigineqartoq partiit
amerlanerussuteqartunit Kattusseqatigiinnillu tapersersorneqarpoq. Taamaallaat
Atassumminngaaniit aappassaaneerneqannginnermini aningaasaqarnermut
ataatsimiititaliamut ingerlatitassanngorlugu imaattorneqarpoq.
Tassa taakkua Atassutikkut
kisimiillutik taamannak kaammattuutigaat, innersuussutigaat.
Kisiannili aamma uani
allannguutissani siunnersuutaagallartumik aningaasat inatsisissaannut
upernaamut akuersissutigineqarnissaata tungaanut allassimareerpoq uani § 1-imi
taakkua qinnuteqaatit ingerlateqqinninngineranni Inatsisartut
aningaasaqarnermut ataatsimiititaliaata akuersissutigineqarneri
toqqammavigalugit taakkua ingerlaqqinneqartassasut.
Taamaattumik taanna
ataatsimiititaliap tungaaninngaaniit qujassutigalugu tiguarput. Soorunami aamma
taakkua suliarigutsigit ataatsimiititaliap iluani partiit Kattusseqatigiillu
oqaaseqaataat toqqammavigalugit suliaq ingerlakkumaarpagut. Qujanaq.
Jonathan
Motzfeldt, ataatsimiinnermik aqutsisoq, Inatsisartut
Siulittaasuat, Siumut.
Tulliulluni oqaaseqassaaq Ole
Thorleifsen, Siumut.
Ole
Thorleifsen, Siumup oqaaseqartua.
Siullermik Aningaasaqarnermut
Naalakkersuisup tapersiineranut qujavunga. Taavalu inassutigerusuppara una
siunnersuut pingaaqisoq inuiaqatigiit ingerlaqqinnissaanut
aappassaaneerneqassasoq pingajussaaneerneqassasoq. Qujanaq.
Jonathan
Motzfeldt, ataatsimiinnermik aqutsisoq, Inatsisartut
Siulittaasuat, Siumut.
Tulliuppoq Augusta Salling,
Atassut.
Augusta
Salling, Atassutip oqaaseqartua.
Qujanaq. Aap, Aningaasaqarnermut
Naalakkersuisup oqaatigaa raajanut akinut tapiissutit tassa ukiumut taakkua 10
millionit naammaguttussatut aaqqiissuteqarfiginiarumaarlugit. Tassa uagut uani
apeqquteqarnitsinnut tunngavigaarput ilisimasagut tunngavigalugit raajanut akit
massakkut annertuumik pitsanngoriaateqarsimanngimmata suli.
Taamaattumik ukioq mannamit 23
millionit amigarineqareersut tassa atuukkunnaareerput nungoreernikuugamik.
Tassunga tunngatillugu massakkut 10 millioniinnaat eqqartorneqarnerani qanoq
tamanna anguneqarsimanersoq erseqqarissumik paaserusussimagaluarparput, kisiani
tusaasinnaavara Aningaasaqarnermut Naalakkersuisup tassani ersarissumik
akisinnaanngikkaanga, kisinnili sulinerminni immaqa anguneqarsinnaanissaa
taanna naatsorsuutigisimallugu.
Sanaartugassanut tunngatillugu
neriuutigaara sanaartugassanut tunngatillugu Naalakkersuisuusup ersarissumik
akisinnaassagaatigut. Tassani sorpiaat nutaat eqqartorneqarnersut. Aammalu
aaqqissugassat.
Tassami
pingaaruteqarluinnaqqissaarpoq Inatsisartut uagut aningaasaliinermut
akuersinitsinni ilisimassagipput suut sanaartugassat tassani pineqarnersut.
Aningaasartai kisiisa eqqartornagit. Taamaattumik ersarissumik
oqarifigineqarnissarput tassani kissaatigilluinnarpara.
Taava aamma ataatsimiititaliamut
ingerlatinneqarnissaanik Atassumminngaaniit kissaateqaratta. Assut
ilungersuukkaluarparput taamaattoqartariaqartoq. Pissutigalugu imaanngilaq
ataatsimiititaliami ingerlanneqassappat ullumikkut
naammassineqarsinnaanngitsoq. Ataatsimiinneq unikkallarsinnaavoq taavalu
ataatsimiititaliami ingerlanneqarluni. Taava uteqqilluta suliassat
ingerlateqqillugit.
Taamaalilluta
qulakkeersinnaassagatsigu taamatut aningaasaliinissami akuersinissami pissutsit
piviusut tunngavigalugit aammalu aningaasaliinissami inatsisit eqqortut
tunngavigalugit aamma tassani Inatsisartut aalajangiitinneqarput.
Tamannarpiaruna uagut angujumallugu
kissaatigigaluaripput taamatut aningaasat aamma annertoorsuit aammalu
ilisimasariaqaratsigit suut aningaasaliiffiginerlugit. Tamanna tunngavigalugu
ataatsimiititaliami ingerlateqqaarnissaa assut uagut kissaatigigaluarparput,
kisianni ajuusaarutigalugu paasivara tassa Inatsisartuni amerlanerpaat
akuersaaginnarniaraat aningaasat taakkua qinnutigineqartut. Taava
akuereriarlugit immaqa arlaani paasiumaaramikku suut tassanerpiaq
eqqartorneqanersut. Qujanaq.
Jonathan Motzfeldt, ataatsimiinnermik aqutsisoq, Inatsisartut Siulittaasuat, Siumut.
Tulliulluni oqaaseqassaaq
Attaveqatigiinnermut, Avatangiisinut Ineqarnermullu Naalakkersuisoq.
Johan Lund-Olsen, Attaveqatigiinnermut, Avatangiisinut Ineqarnermullu Naalakkersuisoq, Inuit
Ataqatigiit.
Qujanaq. Tassa oqaaseqartumut
kingullermut, Atassutip oqaaseqartuanut, Augusta Sallingimut oqaatigissavara,
soorunami Naalakkersuisuninngaaniit uagut isumaqatigilluinnarparput
Inatsisartut pingaarnersiuillutik tulleriiaarisuusarnissaat. Taanna
qularnanngilluinnarpoq. Taanna saneqqunneqarsinnaanngilaq. Aamma
taamaattuartussaavoq, kisianni tassa uani siunnersuummi pingaartinneqarpoq
sanaartornerup unittuuvinnginnissaa eqqarsaatigalugu sanaartugassat taakkua
ingerlatinneqaannarnissaat. Atassutip saqqummiussinerminni tassa
erseqqissaateqaqquaatigut Naalakkersuisoq sanaartugassat iluarsagassallu nutaat
sorliit aningaasaliiffiginiarneqarnersut matumani.
Tassa oqaatigisinnaavara suliassat
assigiinngitsut 2003-mi tassa pineqartut ukuummata, tassa Tasiilami inissiat
36-t aallartinnissaat. Qaanaami atuarfiup skolehjemmip aamma qangalili
eqqartorneqartuartup aallartinneqarnissaa. Nukissiorfinnut aamma
aningaasaliinissaq 1,5 millioninik. Ilulissani aamma tassa taanna Kattusseqatigiit
oqaaseqartuata Anthon Frederiksenip ujartugaanut attuumassuteqarpoq. Ilulissani
kollegiat taakkua ingerlaqqissinnaanissaannut aningaasaliinissat.
Taavalu Qeqertarsuarmi
timersortarfeeqqap allineqarnissaanut aningaasaliissutissat taavalu aamma
assigiinngitsualuit aamma tassaniipput. Taavalu aamma iluarsartuussinermut
tassa renovering, tassa maani Nuummi Kujallerpaani kollegianik
iluarsartuussinissamut atatillugu aningaasat immikkoortinneqartussat. Taavalu
aamma Namminersornerullutik Oqartussat illuutaat assigiinngitsut
aserfallatsaalineqarnerinut aningaasaliissutissat matumani aamma pineqarput.
Tassa taakkuupput nutaat kisianni
oqaatigeriikkattuut una Naalakkersuisuninngaaniit soorunami
pingaartilluinnarparput tassa Inatsisartut pingaarnersiuillutik tulleriiaarisarnissartik
taanna ingerlattussaavaat. Taanna Naalakkersuisut soorunami
qaangiataavinnarlugu qanoq iliuuseqarsinnaanngilagut, kisianni una
erseqqissartariaqarparput tassa sanaartugassat assigiinngitsut aammalu
sanaartorneq unittuuveqqunagu una inatsisissamut siunnersuut taanna
pisariaqarluinnarpoq.
Kisianni aamma ilanngullugu
Inatsisartut ataatsimiititaliaannut attuumassuteqartunut tassa pingaartumik
Attaveqatigiinnermut, Avatangiisinut Ineqarnermullu Ataatsimiititaliamut
aammalu Inatsisartut aningaasaqarnermut ataatsimiititaliaannut
neqeroorutigerusussavara ukua aatsaaginnaq taagukkakka allaganngorlugit tassami
allaganngorlugit tunniunneqarnissaat. Taannalu tassa piaartumik
isumaginiarsinnaassavarput. Inatsisartut sineriammeersut aqagu aallakaalersinnagit.
Jonathan Motzfeldt, ataatsimiinnermik aqutsisoq, Inatsisartut Siulittaasuat, Siumut.
Tulliulluni oqaaseqassaaq Anthon
Frederiksen, Kattusseqatigiit.
Anthon Frederiksen, Kattusseqatigiit.
Qujanaq. Aningaasaqarnermut Naalakkersuisoq
aammalu Attaveqatigiinnermut, Avatangiisinut Ineqarnermullu Naalakkersuisoq,
taakkua taaguutaat sungiukkuminaalaaramik nutaat, kisianni tassa taakkununnga
attuumapput.
Naalakkersuisut akissuteqarnerannut
qujavunga aammalu paasivara Kattusseqatigiinniit oqaaseqaatigut
tigulluarneqartut.
Soorunami mittarfilerngusaanneq
uani aallartinnianngilara, aamma eqqarsaatiginngilara taanna. Tassunga
tunngatillugu oqaaseqarninnut attuumassuteqaannarpoq aningaasanut
inatsisissanut siunnersuutaagaluartup siulliup tassani ilaatigut mittarfiit
pineqartut oqaatigineqartut tallineqarnissaannut pilersaarusiornissamut
aningaasanik immikkoortitsisoqareernikuugaluarmat.
Taannaana eqqarsaatigalugu aamma
misissuinerit suliallu assigiinngitsut siusinnerusukkulli ingerlanneqareersimasut
pillugit tassunga ilanngullugu taanna eqqaagiga, kisianni aamma uani
tunisassiornermut tunngatillugu ilaatigut ilisimaneqareertutuut kommunini
assigiinngitsuni kipiluttunartumik inisseriataartarneq aningaasaqarnermullu suliffissaqartitsiniarnermut annertuumik
ilaatigut kommuninut eqquinerluttartoq.
Aamma massakkut ulluni qaninnerni
assersuutigalugu Ilulissani pisoq, tassa ukiarmili aasarli fabrikimi
tuniasassiornermut tunngatillugu aalisartut isumaqatigiissuteqarnerat
naapertorlugu fabrikip januarip naallugu ammanissaagalua maanna
tassanngaannartumik aallaat ilaatigut
aalisartut paaseqatiginagit
aalajangerneqarsimanera aningaasarsiornermut suliffissaqartitsiniarnermullu
taamaattut sunniuteqarnerluttartut tassanngaannaq pisannginnissaat aamma
Naalakkersuisunit eqqumaffigeqqunaqaaq.
Tassa sulisut ilaatigut 100-200-t
tungaanut taamaalillutik attorneqariasaartarnerat aalisartullu aamma nunatsinni
aningaasarsiornikkut assorujussuaq kipusoortitsisarmat tassanngaannaq.
Taamaattumik tamakkua
tassanngaannaq periasaartarneri aamma pinaveersaartinneqarnissaat aamma allani
kommunini eqqarsaatigeqqunaqaat. Taamaalilluni aningaasarsiornerup pitsaasumik
ingerlaannarnissaa aamma qulakkeeqqullugu. Qujanaq.
Jonathan Motzfeldt, ataasimiinnermik aqutsisoq, Inatsisartut Siulittaasuat, Siumut.
Tulliulluni oqaaseqassaaq
Aalisarnermut Naalakkersuisoq.
Simon Olsen, Aalisarnermut Naalakkersuisoq, Siumut.
Naalakkersuisunit
iluarisimaarparput Siumumit aalisarnermut tunngatillugu kattuffiit
susassaqartut tamaasa peqatigalugit kiisalu aamma Inatsisartut aalisarnermut
ataatsimiititaliaat qanimut suleqatiginninnissaanik inassuteqaatigineqartoq.
Taanna pitsaasutut nalilerparput
tamannami aamma siunnerfigaarput. Atassummi apeqqutigineqartoq
allannguutissatut siunnersuummi tapiissutit taakku 10 millionit pineqartut
tassa imatut paasineqartut aalisarnermut imaluunniit Aningaasaqarnermut
Naalakkersuisup oqaatigereeraluaraa oqaatigissavara tassa taakkua tapissutit
ingerlaannarallarnissaannut pilersitsisuupput imaluunniit isigineqarput.
Tassami assigiinngitsunik
nalilersugassaqarpugut. Aammattaaq ilisimasatsitut raajat pisassarititat
ukiumut tullermut aamma qaffannikuupput. Taamaammat nalilersugassat
annertungaatsiarput.
Inuit Ataqatigiinninngaaniit
aalisarnermut tunngasunik oqariartuutigineqartoq paasinaqqissaarpoq
paatsoorneqarsinnaanngilaq. Taamatuttaaq aamma Kattusseqatigiit tassani
taakkartorneqartut aammalu kaammattuutigineqartut erseqqilluinnartuttaaq aamma
maluginiarluaqqissaagassaapput.
Taamaammat suleriaqqinnissamut
oqaaseqarineqartunut aalisarnermut Naalakkersuisutut qujajumavunga.
Jonathan Motzfeldt, ataatsimiinnermik aqutsisoq, Inatsisartut Siulittaasuat, Siumut.
Tulliulluni oqaaseqassaaq Aningaasaqarnermut
Naalakkersuisoq.
Josef Motzfeldt, Aningaasarsiornermut Nunanullu Allanut Tunngasunut Naalakkersuisoq, Inuit
Ataqatigiit.
Soorunami Inatsisartut
ataatsimiititaliaanni partiip ataatsilluunniit kissaateqarnera saneqqukkuminaattarpoq.
Taamaakkaluartoq Atassutip
oqaaseqartuanut oqaatigissavara inatsisissatut inatsisaagallartussatut
siunnersuummi allassimasut najoqqutaralugit, ukua immikkoortoq siulleq tassalu
sillimmasiisarnermut tunngasoq. Taanna avataaninngaanniit pissutsinut
naammassinninnerusussaammat Inatsisartuni Naalakkersuisut
allanngortissinnaanngilarput, akeq taamaattoq oqaatigineqarpoq.
Isumaqatigiinniarnerit pisimapput,
taavalu septemberip 11-ni 2001-imi taamatut pisoqarnerata kingorna akit
qaffakkiartornerat suli sunniusimaarpoq. Taavalu aamma sinerissap qanittuani
aalisarnermut naleqqussaanermut inaarinissaq misissuinerit Naalakkersuisut
siulliit nalaanili misissuinerit pisut najoqqutaralugit 6,8 millioninik ukiumi
kingullermi aningaasartalerneqarsimavoq.
Tassanngaaniit sinneri tamarmik
aningaasaqarnermut, Inatsisartut aningaasaqarnermut ataatsimiititaliaanut
saaffiginnissuteqaqqaarnikkut aatsaat akuerineqartartussaammata
massakkorluinnaq Aningaasaqarnermut Ataatsimiititaliaq ilumut taakkuninnga
nalilersuereernissaa qinnuteqaatinik suli takkuttoqanngitsoq pisariaqarnersoq
imaluunniit suliassat takkukkaangata Aningaasaqarnermut Ataatsimiititaliaq
saaffiginnissutigineqaraangata isummerfigineqartassanersut taanna Atassummit
soorunami inussiarnersumik kaammattuutigissavara isummerfigeqqullugu.
Taavalu raajanut akinut tunngasuni
erseqqissaatigeqqiinnassavara periutsit allat nassaarineqarsinnaanersut
ullumikkoorniit aallaanerusut kattuffiit raajanullu pisiortortut akornanni
oqaluuserineqartut Naalakkersuisut ilisimavaat.
Taamaattuminguna oqartugut
Inatsisartut missingersuusiornermut inatsisaat innimigalugu Naalakkersuisut
oqarput. Tamakkiisumik tulleriiaarinivissaq aningaasanut inatsisissami
pisussaammat. Inatsisissavimmi martsimi sammisassatsinni pisussaammat.
Ullumikkut utaqqiisaagallartumik 10
millioninik oqarpugut, taassumap tungaanut martsimi inatsisiliornissaviup
tungaanut pissutsit misissoqqarumagatsigit asuli toqqammaveqanngiusattumik
aalajangiinissamut inassuteqarumanata.
Taavalu Kattusseqatigiinnut
oqaatigissavara soorunami qineqqusaarneq qaangiuppoq sulineq aallartippoq.
Qineqqusaarnermi aningaasartuutigineqarsinnaasunik partiit tamarmik
saqqummiussuinerat taavalu aamma taassumap saniatigut
aningaasarsiorfiusinnaasunik saqqummiussuinerat taanna Naalakkersuisut
oqimaaqatigiissaariniarlutik misissussavaat, tassuunakkullu mittarfiit
tallinerinut iluaqutissanik taamannarujussuaq pitsaasunik takusaqassagutta
soorunami taanna isummerfigissavarput Inatsisartunullu saqqummiullugu.
Kisianni ullumikkut soorunami
sorliit qaqugu qanoq iliorfigineqassanersut oqaatigiuminaappoq tamaviisa
misissoqqaartinnagit. Qujanaq.
Jonathan Motzfeldt, ataatsimiinnermik aqutsisoq, Inatsisartut Siulittaasuat, Siumut.
Tulliulluni oqaaseqassaaq Augusta
Salling pingajussaaniilerami naatsunnguamik.
Augusta Salling, Atassutip oqaaseqartua.
Qujanaq. Aap, tassa
Attaveqatigiinnermut, Avatangiisinut Ineqarnermullu Naalakkersuisoq
sanaartugassanullu Naalakkersuisup nassuiaateqarnera sanaartugassat
assigiinngitsut suut nutaat pilersaarutigineqarnersut aammalu iluarsartugassat
taakkununnga tunngatillugu qujarusuppunga taakku oqaatigineqarmata sorpiaat
pineqarnersut. Taamatut Inatsisartut aningaasaliissuteqarnissaannut
tunngasumik.
Isumaqarluinnarpunga
siunnersuuteqarnermi aamma taakkua ilaatinneqareersimasariaqaraluartut.
Taamaalilluta partiini assigiinngitsuni isummerniarnitsinni aamma
apeqquteqarpassuit assigiinngitsut pisariaqanngitsumik immaqa aamma
qassiiliuutigalugillu pisimassanngikkaluarpugut. Aammalu immaqa itinerusumik
nalilersuillutalu periarfissaqarsimassagaluarluta.
Kisianni tassa massakkut
paasivarput sorpiaat pineqarnersut. Aammalu aningaasaqarnermut
ataatsimiititaliap soorunami ataasiakkaarlugit aamma suliareqqittussaammagit
naatsorsuutigilluinnassavarput tassani sulinermi aamma eqqumaffigisassat
assigiinngitsut tamaasa soorunami ilanngullugit Inatsisartut sinnerlugit
suliarineqarumaartoq.
Taamaattumik taanna oqaatigisinnaavarput
uani Atassumminngaanniit akuerseqataaffigissagatsigu. Kisianni uani
ataatsimiititaliamut suliarineqarsinnaaneranut tunngatillugu isumaqarpunga
taanna eqqumiigineqarsinnaanngitsoq Atassumminngaaniit taanna
kissaatigineqartoq. Kisianni soorunami uani ikinnerussuteqarfigalugu
takusinnaagatsigu soorunami aamma taanna akuersaarparput tassa
amerlanerussuteqartut ingerlaannarlutik akuersissutigiumammassuk.
Kisiannili
oqaatigeqqittariaqarpara pissusissamisoorpoq aningaasarpassuit uani eqqartorneqarmata
aamma soorunami Inatsisartut sinnerlugit ataatsimiititaliat arlaasa
nalileeqqaarallarsimanissaat taanna pissusissamisoortutut uagut
isigisimagaluaratsigu.
Kisianni ajunngilaq
taamaanniarli. Uani inatsisaagallartussamut siunnersuutigineqartut Atassumminngaaniit
akuerseqataaffigissavagut soorlu oqareersugut nukinginnarput. Aamma
oqareerpugut ataatsimiititaliamulluunniit ingerlasimassagaluarpata ullumi aamma
naammassisinnaagaluarpugut.
Kisianni kissaatigissavarput
ataatsimiititaliami matuma kingornatigut ataasiakkaarlutik
saaffiginissutigineqartarnerini peqqissaartumik aamma ataatsimiititaliami
nalilersorluarneqarlutik ingerlanneqarnissaat pisariaqarluinarmat. Qujanaq.
Jonathan
Motzfeldt, ataatsimiinnermik aqutsisoq, Inatsisartut
Siulittaasuat, Siumut.
Qujanaq. Taamaalilluni allanik
oqaaseqartoqarniassanngilaq. Taamaalillunilu siullermeerneqarnera naammassivoq.
Uani allannguutissatut
siunnersuummi § 1-imi, imm. 1-imi takuneqarsinnaapput tassani suut tassani
pineqartut. Aammalu taakku oqallinnermi tamarmik attorneqareerput.
Taamaattumillu aamma oqaaseqartuninngaaniit erseqqissarneqarpoq inatsit taanna
akuerineqarpat taava Aningaasaqarnermut Ataatsimiititaliaq suleqatigalugu
akuersissutitut taakkua ingerlanneqarumaartut. Taamaalilluni aamma Atassutip tassuunakkut
noqqaassutigisaa naaperiarfigalugu aamma naammassineqarsinnaasutut
isumaqarfigaara.
Taamaalilluni
siullermeerneqarnera inerpoq.
Taavalu maannakkut
aappassaaneerneqarnissaa tikipparput, tassungalu tunngatillugu oqaaseqartoqarumanersoq
apeqqutigissavara?
Taamaattoqanngilaq.
Taava maannakkut
aappassaaneerneqarnera taasissutigissavarput; taamatut isikkoqarluni
akuersissutigineqarnissaanut isumaqataasut qinnuigissavakka nukueqqullugit.
31.
Taavalu taamak isikkoqarluni
aappassaaneerneqarluni akuerineqareermat pingajussaaneerneqarluni maannakkut
akuersissutigineqarnissaa tikipparput. Pingajussaaneerneqarnerani
oqaaseqarumasoqarnersoq apeqqutigissavara?
Naamik.
Taava
pingajussaaneerneqarnissaanut akuersissaagut. Taamak isikkoqarluni
akuersissutigineqarnissaanut isumaqataasut qinnuigissavakka nikueqqullugit.
31.
Taamaalillunilu
ukiumut aningaasanut inatsiseqarfiusumut 2003-mut Inatsisartut aningaasanut
inatsisigigallagaata allanngortinneqarnera Inatsisartuni maani akuersissutigineqarpoq.
Suliarineranilu taava Aningaasaqarnermut Ataatsimiititaliaq suleqatigalugu
naammassiniarneqassallutik.