Oqaluuserisassani immikkoortoq 08-1 |
|
||
| Siullermeerneqarnera | Aappassaanneerneqarnera | Pingajussaaneerneqarnera | |
Ullut ataatsimiiffiusut aappaat,
pinasunngorneq 12. februar 2003, nal. 15:40
Ataatsimiinnermik aqutsisoq: Jonathan Motzfeldt, Inatsisartut
Siulittaasuat, Siumut.
Jonathan Motzfeldt, Inatsisartut Siulittaasuat, Siumut.
Taava tikipparput immikkoortoq 8,
Inuusuttut Inatsisartuini aalajangiiffigisassatut siunnersuut: Naalakkersuisut
pisussaatinneqarput suliffissaaleqisut sanaartornermi ilinniarnissaminnik
neqeroorfigineqarnissaat sulissutigissagallugu, taamaalilluta iluarsaaqqinneq
ingammik ineqarfiit kollegiallu eqqarsaatigalugit aallartinneqarniassammat.
Tassani siunnersuuteqartuupput
Juliane Henning aamma Ib Uldum. Juliane Henningsen saqqummiussissaaq.
Juliane Henningsen, Ilinniarnertuunngorniafik, Aasiaat.
Siunnersuutitta tunngavilersuuta:
Nalunngilarput amerlasuunik
suliffissaaleqisoqartoq. Kalaallit Nunaanni Naatsorsueqqissaar-tarfimmiit
nalunaarsukkat kingulliit takutippaat 2002-mi ukiup sisamararterutaata
pingajuanni suliffissaaleqineq annertusiartorsimasoq 2001-imi ukiup
sisamararterutaata pingajuannut naleqqiullugu. Suliffissaaleqisut amerlanersaat
ilinniagaqarsimanngitsuupput.
Illuatungaatigut
iluarsaaqqinnissamik pisariaqartitsineq annertusiartorpoq. Pisariaqartitsineq
tamanna ineqarfinni kollegianilu annertunerpaajuvoq. Sanaartukkat tamakku
ukiorpassuit ingerlanerini iluarsaanneqartarsimanngillat, tamatumalu kinguneraa
iluarsaaqqinnissamik pisariaqartitsinerujussuaq.
Taamaattumik pitsaanerpaajussaaq
ilinniarsimanngitsut ilinniartissinnaagutsigit piaartumik iluarsaaqqinneq
aallartissinnaaqqullugu.
Jonathan Motzfeldt, Inatsisartut Siulittaasuat.
Naalakkersuisut sinnerlugit
akissuteqassaaq Marie Fleischer.
Marie Fleischer, Naalakkersuisunut ilaasortaq,
Demokraatit, Nuuk.
Immikkoortumi pilersaarut 2000 B
2003-mi Avatangiisini Nukissiornermilu sunniuteqartumik Kalaallit Nunaanni
iluarsartuussinermut atatillugu 1. januar 2001-imi ukiuni pingasuni
atuut-tussanngorlugu iluani suliniutit aalajangersimasut ilaattut
Ilinniartitaanermut Sulisoqarnermullu Ataqatigiissaariffik pilersinneqarpoq.
Ataqatigiissaariffiup suliassarai
ilinniartitaanermut sulisoqarnermullu tunngassuteqartut immikkut sanaartornermi
sammissallugit, tamatumani tunngaviuvoq Namminersornerullutik Oqartussat
danskillu naalagaaffiata iluarsaaqqinnissarsuaq pillugu
isumaqatigiissuteqarnerat. Tamatuma saniatigut ataqatigiissaariffiup
suliassarai ilinniartitaanermut suliniutit immikkut ittut ataqatigiissaarnerisa
saniatigut aamma sanaartornermi ilinniartuusinnaasunik pilerilertitsinissaq,
kiisalu taamaatitsiinnartartut ikilinissaannik anguniagaqarneq.
Sanaartornermi Ilinniartitaanikkut
immikkut ittumik iliuuseqarnermut ilaapput sulisartunik suliamik
ilinniagaqarsimanngitsunik tunngaviusumik ilinniartitsineq, immikkullu
ilinniartitsinerit. Ilinniartitsineq taanna tunngaviusumik ilinniartitsineq,
immikkullu ilinniartitsinerit tamangajammik AMU-center Midtvestimi
Viborgimiittumi ingerlanneqartarpoq. Tamatuma saniatigut inersimasut sanasutut
ilinniartitaanerat Sisimiuni, Nuummi aamma Aasianni ingerlanneqarpoq. AMU-mi
pikkorissarnerit inersimasutullu ilinniartitaaneq neqeroorutigineqarnerusarpoq
inunnut suliffissaaleqilersimasunut aammattaaq akuttunngitsumik
suliffissaaleqinermik eqqugaasartunut ilaatigut pikkorissarsimanermik
amigaateqarnertik aamma ilinniarsimasuunnginnertik pissutigalugit.
Ukioq 1999-ip upernaavanit 2002-p
qeqqata tungaanut inuit 340-t iluarsartuussinissamik suliassamut atatillugu
AMU-Midtvestip ataani pikkorissarnernik immikkoortulersukkanik modulinik
ataatsimik arlalinnilluunniit ingerlatsipput. 171-it modul 1 naammassivaat,
104-t modul 2-mut ingerlaqqillutik, 40-t modul 3 naammassivaat 25-llu
maannamuugallartoq modul 4-mi angusisimallutik.
Ukioq 2000-imi inersimasutut
ilinniartitaaneq aqqutigalugu 12-it sanasutut ilinniarlutik aallartipput 6-illu
qalipaasutut.
Ukioq 2001-imi inersimasutut
ilinniartitaaneq aqqutigalugu 11-it sanasutut ilinniarlutik aallartipput 6-illu
qalipaasutut.
Piginnaanngorsaaqqinnissamut
ikiorsiisarneq pillugu Inatsisartut peqqussutaat ulloq 1. januar 2002-mi atuutilerpoq.
Peqqussut atorlugu inuup sulisinnaassusilittut ukioqartup killilimmilli
sulisinnaassuseqalersimasup suliinnarnissaanut sulilernissaanulluunniit
ikiuinissaq periarfissin-neqarpoq. Piginnaanngorsaaqqinneq ataatsimik
arlalinnilluunniit suliaqarluni ingerlanneqarsinnaavoq, tassani suliffeqarfimmi
piginnaanngorsaaqqinneq pisortat imaluunniit namminersortut suliffeqarfiini
sungiusarnertigut pikkorissarnertigulluunniit ingerlanneqarsinnaalluni.
Kommunini suliffissaqartitsiniutinut
tapiissutit pillugit Namminersornerlutik Oqartussat Nalunaarutaat nr. 42, ulloq
28. september 1994-imeersoq malillugu, suliffinnik pilersitsinermut atatillugu
tapiissuteqartoqarsinnaavoq, tamatumani
aamma inuusuttut sanaartornermi sulinermi sungiusarfigisartagaanni
Inuusuttut Sulliviini tapiisoqarsinnaanera pineqarpoq,
Taamaalillutik Namminersornerullutik
Oqartussat amerlanerusut ilinniagaqarnissaannik suliniuteqalereerput,
tamatumunnga ilanngullugit suliffissaaleqisut iluarsaaqqinnerni
ingerlanneqareersuni siunissamilu ingerlanneqartussani atorneqartussaat.
Inuit qanoq amerlatigisut
ilinniagaqarnissanik neqeroorutinik pioreersunik ilinniarnermik kingorna
aalajangersimasumik suliffeqalertarnertut pillugit nalunaarsorneqartarneri
pigineqanngillat.
Taamaattumik inuusuttut qanoq
amerlatigisut inissiat ilinniartullu najugaqarfiisa iluarsartuunneqarnerini
sulisinneqarnersut aamma nalunaarsorneqarsimanngilaq.Tamakku qanoq
ataqatigiinnerannik misissuinissap pisariaqarneranik siunnersuuteqartut
oqarnerat Naalakkersuisut isumaqatigaat, tamatumalu misissuiffigineqarnissaata
aallartinneqarnissaa piareersimaffigalugu.
Julianne Henningsen, Avannaani
Ilinniarnertuunngorniarfik, Aasiaat.
Akissummut qujanaq.
Ajunngilluinnarpoq aallartittoqarsimasoq taamannak, taanna qujamatissaannaavoq,
taava assersuutigalugu ilaa suliffissaqanngitsut imaluunniit
ilinniarsimanngitsut amerlanertigut qallunaatut pisinnaasaat
annikittartorujussuupput, assersuutigalugu Danmarkimut nassiukkutsigik
qallunaatut piginnaasaqarpianngitsut taavalu Danmarkimi pissutsit
najoqqutaralugit ilinniartinneqartarlutik, taava qularnartoqarpoq tassani qanoq
pissarsiaqartigissanersut, tassani taakkua nassiunneqartartut Danmarkimut.
Taava qujavunga kisiat akissummut,
ersarippoq. Qujanaq.
Jonathan Motzfeldt, Inatsisartut Siulittaasuat, Siumut.
Tulliulluni oqaaseqassaaq Naja
Stefani.
Naja Stefani, Naalakkersuisunut ilaasortaq,
Atassutip Inuusuttai, Sisimiut.
Ilinniagaqarsimanngitsut imaluunniit
suliffisaaleqisut, tassami amerlanersai ilinniagaqarsimasuuneq ajormata,
periarfissat pioreersut atorluarnissaat, uanga allamik
siunnersuutissaqanngilanga, atorluarnissaat siunnersuutigisinnaavakka,
aftenskolit allallu oqaatsitigut ilinniarfiit kursuserfiusinnaasut.
Atorluarniallitikkit tamakku, taava
immaqa suliffissaaleqinerminnut aporfigisatik taamaalillutik
piginnaasaqarfigilersinnaasavaat.
Jonathan Motzfeldt, Inatsisartut Siulittaasuat, Siumut.
Tulliuppoq Poul Olsen.
Poul Olsen, Naalakkersuisunut ilaasortaq,
Siumup Inuusuttai, Sisimiut.
Qujanaq. Naatsunnguamik. Isumaqarpunga
suliffissaaleqisut sanaartornerinnarmi suliaqartinnagit inuit tamatta allanik
pikoriffeqaratta pikkoriffiit atorluarlugit arlaannik
pitsanngorsaavigineqartariaqartut sanaartornerinnaq eqqarsaatiginagu.
Jonathan Motzfeldt, Inatsisartut Siulittaasuat, Siumut.
Tulliuppoq Ânâ-Grethe Mathiassen.
Ânâ-Grethe Mathiassen, Perorsaanermik Ilinniarfik,
Ilulissat.
Uanga aamma isumaqarpunga
suliffissaaleqisut taamatut projekteqartittarneratigut sanaartornermi
pitsaasuusoq, kisianni aamma eqqarsaatigisariaqarpavut arnapassuaqarpoq aamma
suliffissaaleqisunik. Tamakku aamma eqqarsaatigineqartariaqaraluarput
siuarsarneqarnissaat, angutit sanaartornerlu kisisa pinngagit, aamma arnanut
sammisassat pineqarsinnaapput.
Jonathan Motzfeldt, Inatsisartut Siulittaasuat, Siumut.
Tulliuppoq Aggu Løvstrøm.
Aggu Løvstrøm, Isumaginninnermi
Siunnersortinngorniat Ilinniarfiat, Nuuk.
Nunatsinni suliffissaaleqisut
sanaartornerup tungaatigut sakkuginiarneqartarneri, soormi nunatsinni
sanaartorneq kisiat eqqarsaatiginagu suliffissaaleqisunut ammaaneqartuuguni,
soorlu immaqa Tele Greenlandikkut arlaani imaluunniit qarasaasialerinermut,
taavalu arnattagut suliffissaaleqisut ammerinerinnarmut isumalluutiginagut,
soorlu allanut pilerinarnerusunut, ilaa taakkununnga naleqquttunut ullumikkut,
tassa qujanaq.
Jonathan Motzfeldt, Inatsisartut Siulittaasuat, Siumut.
Tulliuppoq Johanne Olsen Kreutzmann.
Johanne Olsen Kreutzmann, Ilisimatusarfik, Nuuk.
Saqqummiussassinni pivarsi aningaasat
atorneqartartut suliffissaaleqisunut, isumaqarnerusumik atorneqarnissaat
siunertaralugu projektimik aallartitsisoqarnissaa aamma siunnersuutigalugu,
projekteqareerpoq aamma eqqaaneqareerpoq arnanut taanna aamma arnat aamma
eqqarsaatigineqartariaqartut.
Aningaasat atorluarneqassappata
suliffissaaleqisunut tunniunneqartartut ikiuutinik taasartakkagut, taava aamma
piumaffigisariaqarpavut taakku aningaasanik tunineqartartut ullut tamaasa
aningaasanik tigusartagaqarnerminni ullut tamaasa qaammammut
tigusartagaqarsimagunik qaammatip iluani suliffeqarfimmut ikkusimasariaqartut
arlaannut suliffeqarfimmut, innuttaasunut aamma tunniussaqartartoq,
innuttaasuniit ikiuutinik pigami aamma naleqassusaa nammineq inuup taassumap
eqqarsaatigalugu innarlerumanagalulu, suli naleqassusaa piutinniarlugu,
naleerukkiartussanngimmat inuiaqatigiinnit ikiorneqaannarlutik
misigisimallutik, inuiaqatigiinnut tunniussaqartussanngorlugu
piumaffigisinnaasariaqaraluarparput suliffeqarfimmut arlaannut
isumaqatigiissusiorsinnaasasoq inuk tigusartagaqartoq.
Taamaalilluta aningaasat tunniussagut
inuiaqatigiittut inuiaqatigiinnut utertinneqartassapput, taavalu inuk
suliffissaqartinneqanngitsoq inuttut anersaakkullu ataqqinassutsimigut
pisinnaaneqar nermigullu naleqassusaa aamma tassuuna
innarlernaveersaarsinnagatsigu ilisimatittuassallugu ullut tamaasa
atorfissaqartinneqarneranik.
Jonathan Motzfeldt, Inatsisartut Siulittaasuat, Siumut.
Allanik oqaaseqartoqarumanngimmat aamma
oqallisigineqartoq soqutigineqarmat, uanilu aamma Naalakkersuisut
nalunaarutaani taaneqartoq malugeqqussavara maannakkut Suliffissaqartitsiniarnermut
Ataatsimiititaliamut ingerlaqqittussammat, oqaatigineqarmat inuit qanoq
amerlatigisut ilinniagaqarnissamik neqeroorutinik pioreersunik ilinniarnermik
kingorna aalajangersimasunik suliffeqalertarnertik pillugit nalunaarsorneqartarneri
pigineqanngillat. Taanna aamma malu giniassavarsi aamma qanoq ililluni
pissarsiariniarneqarsinnaaneranik qularnanngilaq oqallinneq udvalgimi
nanginneqarumaartoq taamaalillugu tusarfigineqarumaartoq
aappassaaneerneqartinnagu.