Oqaluuserisassani immikkoortoq 08-2 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ullut ataatsimiiffiusut pingajuat,
sisamanngorneq 13. februar 2003, nal. 18:22
Ataatsimiinnermik aqutsisoq: Per Rosing-Petersen, Inatsisartut Siulittaasoqarfianni
ilaasortaq, Siumut.
Per Rosing-Petersen, Inatsisartut Siulittaasoqarfianni
ilaasortaq, Siumut.
Taava tikipparput immikkoortoq 8,
Inuusuttut Inatsisartuini aalajangiiffigisassatut siunnersuut: Naalakkersuisut
pisussaatinneqarput suliffissaaleqisut sanaartornermi ilinniarnissaminnik
neqeroorfigineqarnissaat sulissutigissagallugu, taamaalilluta iluarsaaqqinneq
ingammik ineqarfiit kollegiallu eqqarsaatigalugit aallartinneqarniassagatsigu.
Tassanilu isumaliutissiissusiornermi
saqqummiissooq Qaavigaq Kristensen, takanna.
Ullut ataatsimiiffiusut pingajuat,
sisamanngorneq 13. februar 2003, nal. 18:23
Oqaluuserisassani imikkoortoq 8
Inuusuttut Inatsisartuini aalajangiiffigisassatut siunnersuut:
Naalakkersuisut pisussaatinneqarput suliffissaaleqisut sanaartornermi
ilinniarnissaminnik neqeroorfigineqarnissaat sulissutigissagallugu,
taamaalilluta iluarsaaqqinneq ingammik ineqarfiit kollegiallu eqqarsaatigalugit
aallartinneqarniassagatsigu.
(Inuusutut Inatsisartuini ilaasortat Juliane Hemmingsen aamma Ib Idum,
Avannaani Ilinniarnertuunngorniarfik, Aasiaat)
(Aappassaaneernera)
Ataatsimiinnermik aqutsisoq: Per Rosing-Petersen, Inatsisartut
Siulittaasoqarfiani ilaasortaq, Siumut.
Qaavigaq Kristensen, Peqqinnissamut, Isumaginninnermut Suliffeqarnermullu
Ataatsimiititaliaq.
Qujanaq. Inuusuttut Parlamentiata
Peqqinnissamut, Isumaginninnermut Suliffeqarnermullu Ataatsimiititaliaata
isumaliutissiissutaa Inuusuttut Inatsisartuini aalajangiiffigisassatut
siunnersuut, tassalu Naalakkersuisut pisussaatinneqarput pisussaatinneqarput
suliffissaaleqisut sanaartornermi ilinniarnissaminnik neqeroorfigineqarnissaat
sulissutigissagallugu, taamaalilluta iluarsaaqqinneq ingammik ineqarfiit
kollegiallu eqqarsaatigalugit aallartinneqarniassammat, aalangiiffigisassatut
siunnersuutip aappassaaneerneqalernerani saqqummiunneqartoq.
Inuusuttut Inatsisartuisa
Peqqinnissamut, Isumaginninnermut Suliffeqarnermullu Ataatsimiititaliaa
suliarinninnermini makkunannga inuttaqarpoq:
Aggu Løvstrøm, Karen Steenholdt, Johanne
Olsen Kreutzmann, Qaavigaq Kristensen, Ânâ-Grethe Mathiassen aamma Juliane
Henningsen.
Inuusuttut Inatsisartuisa
Peqqinnissamut, Isumaginninnermut Suliffeqarnermullu Ataatsimiititaliaata
siullermeerneqarnerata kingorna aalajangiiffigisassatut siunnersuut
misissuataarsimavaa imaattumillu oqaaseqaateqarniarluni.
Siunnersuutip imaa:
Inuusuttut ataatsimiititaliaanni
ilaasortat Juliane Henningsen aamma Ib Uldum siunnersuutigaat Naalakkersuisut
peqquneqassasut suliffissaaleqisut sanaartornermi ilinniarnissaminnik
neqeroorfigineqarnissaat sulissutigeqqullugu, taamaalilluni ingammik ineqarfiit
kollegiallu eqqarsaatigalugit aaqqissuussineq aallartinniassammat.
Ataatsimiititaliap isumaqatigiissup
oqaatigissavaa ataatsimiititliap siunnersuuteqartoq isumaqatigaa, tassalu
suliffissaaleqisut sanaartornermi illuliornerullu tungaatigut ilinniartinneqartariaqartut, kisiannili
ersissutigineqarpoq siunnersuutip akuersissutigineqarnerani taamatut
isikkoqarluni taamaallaat angutit suliffissaaleqisut kisimik sammineqassasut.
Taamaattumik kissaatigineqarpoq
angutinut arnanullu suliffissaaleqinermut tunngatillugu suliniutinik
aallartitsisoqassasoq. Taamaattumik ataatsimiititaliaq kissaatigivaa
siunnersuut makkunannga annertusillugu Naalakkersuisunit sulissutigineqassasoq,
tassalu suliffissaaleqinermik ajornartorsiut ataatsimoortillugu isigineqassasoq
aamma ilinniarnernik pikkorissarnernillu neqeroorutit allaasariaqartut
suliffeqarfinni allani, taamaasilluni tassami suliffissaaleqisut
ajornartorsiutaat qaangerneqarsinnaanngimmata suliffeqarfimmi ataatsinnarmi
soqutigisaqarfimmi suliffissaaleqisoq soqutiginnitsinneqassappat.
Aappassaattut Naalakkersuisut
sulissutigisariaqarpaat sapinngisamik piaartumik annertuumillu
suliniuteqaqqullugit, kinaluunniit suliffissaaleqinermik eqquneqapallakkaanngat,
tassami ataatsimiititaliq isumaqarmat suliffissaaleqisoq sukkasuumik inuttut
nammineq inissinneqarsinnaasariaqartoq, aammalu sammineqartariaqartoq
suliffissaaleqisup ilqutariinni atassuteqarnera aamma, tassanilu
suliniuteqartariaqartoq pisariaqartitsisoqassappat.
Pingajuattut
aaqqissuussineqartariaqartoq nunamut tamarmut periarfissanik atuuttitsisunik
taamaasilluni kikkut tamarmik periarfissinneqarlutik, apeqqutaatinnagu sumi
najugaqarneq.
Naalakkersuisut ingerlaavartumik misissortariaqarpaat
ilinniartitsinissamut pikkorissartitsinissamillu unami pisariaqartinneqartut
suuneranik, taamaalullu pisariaqartitsinermut tunngasumik
neqerooruteqartoqarsinnaanniassammat.
Ilanngullugu
misissorneqartariaqarpoq pikkorissarnerit assigiinngitsut qanoq
sunniuteqarsimanersut suliffeqarnerup pisariaqartitaannut naammaassinissaannut.
Pingajussaattut Naalakkersuisut
peqquneqassapput annertuumik misissueqqissaarnernik misissuinernillu
misissuissasoq suliffissaaleqisunik ikiorsiissutit assigiinngitsut pillugit,
taamaasilluni qulaajarneqarniassammat aaqqissuussinerit assigiinngitsuni
putuusinnaasut.
Inuusuttut Inatsisartuini
Peqqinnissamut, Isumaginninnermut Suliffeqarnermullu Ataatsimiititaliaata
isumaqatigiissup inassutigaa siunnersuut akuersissutigineqassasoq, taakkunannga
qulaani taaneqartunik ilassutissanik annertusineqarsimariarpat.
Taamatut oqaaseqarluni Inuusuttut
Inatsisartuini Peqqinnissamut, Isumaginninnermut Suliffeqarnermullu
Ataatsimiititaliaat matumuuna aalajangiiffigisassatut siunnersuut
aappassniigassanngorlugu saqqummiuppaat.
Per Rosing-Petersen, Inatsisartut Siulittaasoqarfianni
ilaasortaq, Siumut.
Allanik oqaaseqartoqarumanerluni?
Taamaattoqanngilaq.
Taavalu taasisitsissuugut, tassalu
taasissutigitinneqassapput Peqqinnissamut, Isumaginninnermut Suliffeqarnermullu
Ataatsimiititaliap innersuussutigivaa akuersissutigineqassasoq,
allannguutissatut ukua immikkut tallimat taasat akuersissutigineqarsinnaappata;
qallunaatuuanilu ukuupput:
Siulleq: Suliffissaaleqinermut
ajornartorsiut ataatsimoorlugu isigineqassasoq, taavalu aamma allaanerusumik
suliffeqarfinni ilinniaqqinnissamut pikkorissarnissamut
neqerooruteqartariaqartoq.
Aappaattut: Naalakkersuisut
sapinngisamik piaarnerpaamik annertuumillu suliniuteqassasut suliffissaaleqisoq
suliffissaleqilerniaraangat, tassami isumaqarami sapinngisamik inuttut
nappartinneqaqqittussaasoq, taavalu aamma suliffissaaleqisup ilaqutariinneranut
tungasortai sammineqartassasut.
Pingajuattut:
Aaqqissuussineqartariaqarpoq periarfissanik tamarmut nunamut ataatsimoortumut
sammisunik.
Sisamaattut: Naalakkersuisut
ingerlaavartumik misissortariaqarpaat ilinniartitsinissamut pikkorissarnissamut
pisariaqartinneqartut suunersut, taavalu aamma misissuinerit taamakkua
takutittariaqarpaat pikkorissarnerit assigiinngitsut qanoq
sunniuteqarsimanersut pisariaqartitsinermut naammassinninnissamut.
Tallimaattullu: Naalakkersuisut
peqquneqassasut sukumiissumik misissueqqissaarnernik misissuinernillu
aallartitseqqulugit, suliffissaaleqisummi assigiinngitsunik pisartagaannut
tunngatillugu, taavalu paasillugu tamakku aaqqissuussinernut assigiinngitsunut
putuusinnaanersut.
Kikkut tassunga isumaqataappat?
19-it.
Kikkut akerliuppat?
Akerliusoqanngilaq.
Kikkut taaseqataanngillat?
9-at.
Taamaasilluni siunnersuut taakkua allannguutit ilanngullugit akuersissutigineqarpoq.