Oqaluuserisassani immikkoortoq 10-1_ |
|
||
| Siullermeerneqarnera | Aappassaanneerneqarnera | Pingajussaaneerneqarnera | |
Ullut ataatsimiiffiusut aappaat,
pingasunngorneq 12. februar 2003, nal. 16:46
Ataatsimiinnermik aqutsisoq: Jonathan Motzfeldt, Inatsisartut
Siulittaasuat, Siumut.
Jonathan Motzfeldt, Inatsisartut Siulittaasuat, Siumut.
Tulliullugu tikipparput immikkoortoq
10, kigutileritinnermut nakorsaatinullu akiliuteqartitsisale rnissaq
anguniarlugu Naalakkersuisut suliniuteqaqqullugit peqquneqarnissaannik
Inuusuttut Inatsisartuinut aalajangiiffigisassatut siunnersuut.
Siunnersuuteqartuupput Juliane
Henningsen aamma Ib Uldum, Ib Uldum saqqummiussissaaq, takassa.
Ib Uldum, Avannaani Ilinniartuungorniarfik,
Aasiaat.
Siunnersuummut tunngavilersuut:
Kalaallit Nunaanni
peqqinnissaqarfimmut aningaasartuutit ukiuni kingullermi
amerliartupiloorsimapput, ullumikkullu pisortat missingersuutaasa
ilarparujussuinik tigusisarlutik.
Tamanna tunngavigalugu
siunnersuutigaarput kigutileritinnermut nakorsaatinullu akiliuteqartitsisarneq
atulersinneqassasaoq.
Nammineq akiliuteqartitsisalerneq
peqqinnissaqarfiup ingerlanneqarneranut iluaqutaasumik sunniuteqartussaavoq.
Namminerli
akiliuteqartitsisalernerup inuiaqatigiit aningaasaqarnerannut iluaqutaasutut
sunniutai isertitanit peqqinnissaqarfiup nammineq akiliuteqartitsinikkut
isertittaligassaanit annertunerunissaa naatsorsuutigineqarpoq.
Naluneqanngilluinnarpormi nammineq akiliuteqartarneq pissusilersornermut
sunniuteqartartoq. Nammineq akiliuteqartarnerup imminut paarineq
siuarsartarpaa. Kigutileritinnerup akeqarneranik eqqarsaatiginnininerup
assersuutigalugu kigutissartarnikkut, kukkaajaatinik atuinikkut, kigutit akuttunngitsumik
misissortinneqartarnerisigut il.il. kigutinik paarsilluarneruneq
nassatarisarpaa.
Taamaalilluni nammineq
akiliuteqartarnerup pinaveersaartitsinermik sulineq tapsersortarlugulu
peqqissutsimik siuarsaaqataasarpoq. Tamatuma immini peqqinnissaqarfimmi
sipaaruteqar neq nassataraa, tamatumunngalu peqatigitillugu peqqinnissaqarfiup
kiffartuussinerinik atuineq annikillisitseqataaffigalugu, taamaalillunilu
katsorsaanernut arlalinnut piffissaq utaqqiffiusartoq sivikillisassallugu.
Taamaattumik nammineq akiliuteqartitsisalernikkut
pitsaqqutit ersarilluinnartuupput.
Jonathan Motzfeldt, Inatsisartut Siulittaasuat, Siumut.
Naalakkersuisut sinnerlugit
akissuteqassaaq Arnatsiaq Larsen.
Arnatsiaq Larsen, Naalakkersuisunut ilaasortaq, Inuit
Ataqatigiit, Nuuk.
Manna tikillugu aalajangersimasumik
tungaviusimasoq tassaavoq Kalaallit Nunaanni peqqinnissaqarfimmit
kiffartuunneqarnissamut periarfissat malittarisassatut pingaarnerpaatut
akeqassanngitsut. Taamaaliornikkut siunertaasimavoq kikkut tamarmik,
ataasiakkaat aningaasaqarnermikkut atugaat apeqqutaatinnagit, pitsaasumik
peqqissuseqarnissaat qulakkeerneqassasoq.
Tunngaviusumik taassuminnga
saneqqutsineq, siunnersuuteqartut oqaatigisaattut, Nunatta Karsiata
suliassaqarfinni aalajangersimasuni toqqaannartumik toqqaannanngikkaluamillu
sipaaru‑teqarneranik kinguneqarsinnaavoq. Taaneqartoq kingulleq
eqqarsaatigalugu nappaatinik pinaveersaartitsisumik pissusilersortarnikkut.
Eqqumaffigisariaqarporli atuisut
akiliuteqartinneqartarnerisa aqutsinikkut allaffissornermi nammagassat atuisut
akiliuteqartinneqartalernerisigut toqqaannartumik aningaasaqarnikkut
iluanaarutinik annikillisaasussat nassatarisussaagaat.
Eqqumaffigisariaqarportaaq atuisut
akiliuteqartinneqartalernerisigut isertitakitsut katsorsarneqarsinnaanngitsunillu
nappaateqartut sakkortuumik eqqorneqartussaanerat. Taamaattorli inunnut
taakkununnga nammagassiissutigineqartut atuisut akiliuteqarqtinneqarneranni
ataatsimoortumik qummut killiisaqartitsinikkut killilersimaarneqarsinnaapput,
kisianni taamaaliornerup aqutsinik‑kut allaffissornermi nammagassat allat
aamma nassatarisussaavai. Isertitakittunut oqilisaassissutitut
aaqqissuussinikkut ilinniagaqarneq sulinerlu aqqutigalugit isertitat
annertusineqarnissaasa pilerinassuseqarnera annikillisittarpaa, soorlu isertitaqassuseq
malillugu akileraartitsisarnermi taamaattoq.
Kiisalu eqqumaffigineqartariaqarpoq
peqqissutsimut tunngasuni atuisut akiliuteqartarnerannik eqqussinerup
nassatarisinnnaammagu inuuttaasut ilaasa aningaasaqarnikkut pissakinnerusut
nakorsianngitsoortalernerat, kigutinimmik akuttunngitsumik
misissortittarunnaarnerat il.il. Tamanna minnerunngitsumik meeqqat utoqqaallu
eqqarsaatigalugit ernumassutissaqalersitsisinnaavoq.
Tunngaviusumillu apeqqut taanna
pillugu oqallinnerup ingerlanissaa Naalakkersuisut qila‑naaraat,
Inuusuttullu Inatsisartuisa isumaat soqutigalugit tusarnaarniarlugit.
Jonathan Motzfeldt, Inatsisartut Siulittaasuat, Siumut.
Poul Olsen tulliulluni
oqaaseqassaaq.
Poul Olsen, Naalakkersuisunut ilaasortaq,
Siumup Inuusuttai, Sisimiut.
Qujanaq. Oqallisissiaq taanna
soqutiginarpoq, paasilluarusunnarporli sumorpiaq tikkuusisuunersoq, kikkorpiaat
pineqarnersut, makkumi nakorsaatinik pisariaqartitsijuartut, amimikkut
nappaatillit alallu aningaasarpassuarnik atuisussanngortussat, qanoq ikiorneqassappat
taakkua.
Taanna aamma siunnersuuteqartut
taakkua, suli tikingilarput siunnersuutigisimasaat aningaasaqassuseq
naapertorlugu akileraartarnerup inerteqqutigineqalernissaa progressiv
beskatningimik taaneqartartoq inerteqqutigineqalernissaanut tunngatillugu
taanna eqqarsaatigalugu aamma pingitsoorani tapiissuteqartoqartalissappat
aningaasarsiakkaanerusut akiliinerusalissapput nakorsaatinik,
aningaasarsiakinnerusullu tapiiffigineqartalissallutik nakorsaatinik.
Tassuuna ippinnartoqartilaarparqa
siunnersuuteqarsimasut siunnersuutip tulliani akerlerluinnaanik
siunnersuuteqarmata. Taanna paasillualaarusuppara sumorpiaq tunngaveqarnersoq.
Qujanaq.
Jonathan Motzfeldt, Inatsisartut Siulittaasuat, Siumut.
Siunnersuuteqartut arlaata tamanna
itisilersinnaanerlugu, apeqqutigineqartoq, imaluunniit, Juliane Henningsen.
Juliane Henningsen, Avannaani
Ilinniarnertuunngorniarfik, Aasiaat.
Qujanaq.
Eqqaasitsissutiginiaannarluguuna atuarfitsinninngaanniit aggerpugut,
taamaattumik siunnersuutigineqartut ilarsui tuaviortumik suliagaamik
taamaattumik uagut illersorsinnaanissaat killeqartorujussuuvoq taakkua
siunnersuutit. Ajuusaarutigaara taakkua siunnersuutit imminnut
akerlilerstuusimmata, kisianni siunnersuuteqartoq maaniikkaluaruni, soorunalimi
ilimagisinnaalluarpara nassuiarnerusinnaasagaluarai, kisianni isumamikkut
nammineq taakkua siunertaqarput, taanna nangartarsinnaanngilara, kisianni
erseqqissaatigiinnassavara uagut atuaqatitta siunnersuutai maanga nassarlugit
oqariartuutaalu apuullugit.
Jonathan Motzfeldt, Inatsisartut Siulittaasuat, Siumut.
Tassami oqaatigissavara aamma
Naalakkersuisut akissutaani takuneqarsinnaavoq apeqqut ammaffigineqarpoq
oqaluuserineqarnissaa, taamaattumik aappassaaneerneqartinnagu Peqqinnissamut
Ataatsimiititaliami apeqqutit taakkua oqaluuserineqarnissaat maannakkut
innersuussutigineqarpoq, taamaalilluni suliassaq tassani ingerlaqqissaaq,
taavalu uterfigeqqinneqarumaarluni aappassaaneernissaani.