Oqaluuserisassani immikkoortoq 10-2 |
|
||
| Siullermeerneqarnera | Aappassaanneerneqarnera | Pingajussaaneerneqarnera | |
Ullut ataatsimiiffiusut pingajuat,
sisamanngorneq 13. februar 2003, nal. 18:33
Ataatsimiinnermik aqutsisoq: Inatsisartut Siulittaasoqarfianni
ilaasortaq Per Rosing-Petersen, Siumut.
Per Rosing-Petersen, Inatsisartut Siulittaasoqarfianni
ilaasortaq, Siumut.
Tullianut ingerlaqqippugut, immikkoortoq qulinga,
kigutileritinnermut nakorsaatinullu akiliuteqartitsisalernissaq anguniarlugu
Naalakkersuisut suliniuteqaqqullugit peqquneqarnissaannik Inuusuttut
Inatsisartuinut aalajangiiffigisassatut siunnersuut.
Tassungalu tunngatillugu
isumaliutissiissusiortoqarnikuuvoq, Peqqinnissamut, Isumaginninnermut
Suliffqarnermullu Ataatsimiititaliaq, tassanilu saqqummiissaaq Aggu Løvstrøm,
takanna.
Aggo Løvstrøm, Peqqinnissamut, Isumaginninnermut
Suliffqarnermullu Ataatsimiititaliaq.
Aalajangiiffigisassatut siunnersuutip
aappassaaneerneqarnerani saqqummiunneqartoq Inuusuttut Inatsisartuisa
Peqqinnissamut, Isumaginninnermut Suliffeqarnermullu Ataatsimiititali‑aat
suliarinninnermini ukuninnga inuttaqarpoq:
Aggo Løvstrøm, Karen Steenholdt, Johanne Olsen
Kreutzmann, Qaavigaq Kristensen, Ânâ-Grethe Mathi assen, Juliane Henningsen
Aggo Løvstrømilu.
Inuusuttut Inatsisartuisa Peqqinnissamut,
Isumaginninnermut Suliffeqarnermullu Ataatsimiititali‑aata
aalajangiiffigisassatut siunnersuutip Inuusuttut Inatsisartuisa
Ataatsimiinneranni 2003-mi siullermeerlugu oqaluuserineqarnerata kingorna
misissuataarpaa, imatullu oqaaseqarfigissallugu.
Siunnersuutip imarisai:
Peqqinnissaqarfiup amerliartuinnartunik
aningaasartuuteqartarnera, pisortat missingersuusiarisartagaanni annertuumik
atuiffiusartoq tunngavigalugu atuisut akiliisalernissaannik
aaqqissuussisoqarnissaa siunnersuutigineqarpoq. Taamaaliornikkuttaaq imminut
paarinissaq siuarsarneqarsinnaaqqullugu, innuttaasullu ataasiakkaat
pitsaaliuinissamut kajumissuseqalersinnaaqqullugit. Taamaaliornikkut
peqqinnissarfimmi aningaasanik sipaagaqartoqarsinnaalissaaq,
suliaritikkumallutillu utaqqisut ikilisinneqassallutik.
Ataatsimiititaliap oqaatigiumasai:
Peqqinnissaqarfiup sullississutigisartagaasa
atuisunit akilerneqartalernissaannik atulersitsinikkut isertitakinnerit
eqqugaanissaat ataatsimiititaliap aarleqqutigaa, aammami ullumikkut
akileraartarneq aqqutigalugu akiliisoqartareermat. Pisortat qaqugukkut inuup
ataatsip peqqissusianut akisussaassanersut oqallisigalugu
aallartinneqartariaqarpoq. Aammattaaq katsorsaariaatsinik allanik atuinissamut
periarfissat oqallisigalugit aallartinneqartariaqarpoq kiisalu taakku qanoq
pisortat ingerlatsinerannut ilaatinneqarsinnaanersut ilanngullugu.
Inuit imminut paarisussaanertik
pitsaaliuinissartillu qanoq isumagisussaanerlugu ilisimalerpassuk atuisut
akiliisussaanerannik aaqqissuussineq aatsaat atugaalersinnaavoq.
Inuusuttut
Inatsisartuisa Peqqinnissamut, Isumaginninnermut Suliffeqarnermullu Ataatsimiititaliaata
isumaqatigiittup inassutigaa siunnersuut ilusiligaanermisut ilusilik
itigartitsissutigineqassasoq.
Taama oqaaseqarluni Inuusuttut
Inatsisartuisa Peqqinnissamut, Isumaginninnermut Suliffeqarnermullu
Ataatsimiititaliaata aalajangiiffigisassatut siunnersuut
aappassaanigassanngortippaa.
Per Rosing-Petersen, Inatsisartut Siulittaasoqarfianni
ilaasortaq, Siumut.
Aggo Løvstrømimut qujanaq. Allanik
oqaaseqartoqarumasoqarnerluni, naamik, taava taasissutigissavarput.
Isumaliutissiissut toqqammavigalugu
itigartitsissutigineqarnissaa siunnersuutigineqarpoq.
Qassit tassunga isumaqataappat?
24.
Qassit akerliuppat?
Akerliusoqanngilaq.
Qassit taaseqataanngilla?
4.
Taamaasillui siunnersuut
itigartitsissutigineqarpoq.