Oqaluuserisassani immikkoortoq 12-2 |
|
||
| Siullermeerneqarnera | Aappassaanneerneqarnera | Pingajussaaneerneqarnera | |
Ullut ataatsimiiffiusut pingajuat,
sisamanngorneq 13. februar 2003, nal. 18:09
Ataatsimiinnermik aqutsisoq: Per Rosing-Petersen, Inatsisartut
Siulittaasoqarfianni ilaasortaq, Siumut.
Per Rosing-Petersen, Inatsisartut Siulittaasoqarfianni
ilaasortaq, Siumut.
Tullinnguuppoq immikkoortoq aqqaneq-aappaat,
annertunerusumik ilinniartitsinernut ilinniagaqarnersiutit aningaasanik amerlanerusunik,
ilinniakkamik naammassinninnerup kingorna Kalaallit Nunaanni sulinikkut
isumakkeerneqarsinnaasunik taarsigassarsisinnaalernikkut ikilineqarnissaat
sulissutigeqqullugu Naalakkersuisut peqquneqarnissaannik
aalajangiiffigisassatut Inuusuttut Inatsisartuinut siunnersuut.
Tassani saqqummiussissooq Carl-Emil Fencker,
takanna.
Carl-Emil Fencker, Aningaasaqarnermut Ataatsimiititaliami
ilaasortaq.
Qujanaq. Siunnersuut Inuusuttut Inatsisartuisa Aningaasaqarnermut
Ataatsimiititaliaani suliarineqarnermi makkunannga inuttaqarpoq:
Aka Debes, Carl-Emil Fencker, Sofie Olsen, Hans
Lars Mathiassen, Finn Lennert.
Inuusuttut Inatsisartuisa Aningaasaqarnermut
Ataatsimiititaliaata siunnersuutip siullermeernerata kingorna siunnersuut
misissuataarsimavaat, ataatsimiititaliallu atsaatsimiikkami sulinermini
Naalakkersuisunik isumasioqateqarsimavoq.
Naalakkersuisut siunnersuut soqutigilluinnarpaat,
tassa ajornartorsiut qitiulluinnartoq Kalaallit Nunaanni pineqarmat, tassalu
ilinniarsimasunik sulisussaaleqineq.
Ataatsimiititaliaq isumaqarpoq
pingaaruteqarluinnartoq suliniutigissallugu kalaallit amerlanerusut nunani
allani ilinniareerlutik angerlartarnissaannik kaammatorneqarnissaat,
ataatsimiitliarli avissimapput siunnersuummut tunngatillugu, tassalu ullumikkut
ilinniagaqarsimasut akiitsoqalersinneqalernissaat, soorlu
siunnersuutigineqartutuut ataatsimiititaliaq tunngaviusumik isumaqarpoq
periarfissaqassasoq ilinniarsinnaasoqarnissaa 100.000-ilikkaanik akiitsoqalinngikkaluarluni.
Paarlattuanillu aamma ataatsimiititaliaq
isumaqarpoq inuit Kalaallit Nunaanni ilinniareersimallutik sulerusuttut
akissarsisinneqartariaqartut. Ataatsimiititaliaq taamaattumik Naalakkersuisunut
inassutigissavaa sakkortunerpaamik eqqarsaatigeqqullugu kalaallit nunani allani
ilinniagaqarsimasut uternissaannut kaammattuuteqaqqullugit, Kalaallit Nunaanni
avataaniiginnaqqunagit.
Tamanna anguneqarsinnaavoq soorlu Naalakkersuisut
sulissutigippassuk taarsigassarsinissamik ullumikkut periarfissaareersut
avataatigut pilersitsisoqarluni, taavalu aamma akiitsut ilaat, soorlu
sivikinnerpaamik ukiuni arfineq.marluusuni ukiuni pingasuni Kalaallit Nunaanni
ilinniagaqareerluni sulinikkut isumakkeerneqarsinnaasut.
Paarlattuanik aamma Naalakkersuisut maluginiarsimasariaqarpaat
taamaattunummi aaqqissuussinernut illuatungilerneqartariaqarmat, soorlu
ilinniagaqartut ilinniakkaminnik naatsorsuutigineqanngitsumik
kipisitsisariaqalersut, soorlu naatunermi annertuallaamik akiitsoqalernissamik
eqqorneqannginnissaat. Taamaattorli taanna pingaaruteqaluinnarpoq. Soorlu
suliffissaaleqinermi tunngatillugu naammassillugu ilinniarsimasoq
ilinniagaqalersimanermi akiitsumi ilai isumakkeertissinnagai inuup
uppernarsarsinnaguniuk Kalaallit Nunaanni ikingorna suliffissaqarsinnaannginnini.
Naggataatigut aamma ataatsimiititaliap
pisariaqartutuut isumaqarfigaa Naalakkersuisut sulissutigissagaat
annertunerusumik ilinniagaqarnissamik piumasaqaateqartoqalernissaa, tassa
pisortat aningaasaataannik atornerluinissaq pinaveersaartinniarlugu, taavalu
taanna tunngavigalugu inuit ataatsimiititaliap isumaqatigiissup siunnersuutip
itigartinneqarnissaa inassutigaa.
Per Rosing-Petersen, Inatsisartut Siulittaasoqarfianni
ilaasortaq, Siumut.
Allamik oqaaseqartoqarumasoqarnerluni?
Taamaattoqanngilaq.
Taamaasilluta taasissutigineqassooq immikkoortoq
aqqaneq-aappaat, tassanilu taassissutigissavarput isumaliutissiissut
toqqammavigalugu itigartitsissutigineqarnissaa.
Kikkut itigartitsissutigineqarnissaanut
isumaqataappat?
26.
Kikkut akerliuppat?
1.
Kikkut taaseqatanngillat?
1.
Taammasilluni siunnersuut
itigartitsissutigineqarpoq.