Oqaluuserisassani immikkoortoq 11-2 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ullut ataatsimiiffiusut pingajuat,
sisamanngorneq 13. februar 2003, nal. 18:35
Ataatsimiinnermik aqutsisoq: Inatsisartut Siulittaasoqarfianni
ilaasortaq Per Rosing-Petersen, Siumut.
Per Rosing-Petersen, Inatsisartut Siulittaasoqarfianni
ilaasortaq, Siumut.
Tulleraalu immikkoortoq aqqanngat, Kalaallit
Nunaanni innuttaasut isertitat amerliartortillugit procentinik amerlanerusunik
akileraartinneqartalinnginnissaat Tunngaviusumik Inatsisikkut qulakkeerniarlugu
suliniuteqaqqullugit Naalakkersuisut peqquneqarnissaannik Inuusuttut
Inatsisartuinut aalajangiiffigisassatut siunnersuut.
Tassani isumaliutissiissusiorsimapput
Aningaasaqanermut Ataatsimiititaliaq, tassanilu saqqummiissoq Hans Lars
Mathiassen, takanna.
Hans Lars Mathiassen, Aningaasaqarnermut Atatsimiititaliaq.
Inuusuttut Inatsisartuisa Aningaasaqarnermut
Ataatsimiitititaliaata isumaliutissiissutaa.
Inuusuttut Inatsisartuisa Ataatsimiinnermi 2003-mi
siullermeerinerup kingorna Inuusuttut Inatsisartuisa ataatsimiititaliaata
Kalaallit Nunaanni innuttaasut isertitat amerliartortillugit procentinik
amerlanerusunik akileraartinneqartalinnginnissaat tunngaviusumik inatsisikkut
qulakkeerniarlugu suliniuteqaqqullugit Naalakkersuisut peqquneqarnissaannik Inuusuttut
Inatsisartuisa aalajangiiffigisassaattut siunnersuut misissorpaa.
Isertitat amerliartortillugit procentinik
amerlanerusunik akileraartitsisarnermut atatillugu ajornar‑torsiutit
siunnersuuteqartumit tikkuaavigineqartut ataatsimiititaliap soqutiginaateqartutut
isigai. Isertitat amerliartortillugit procentinik amerlanerusunik
akileraartitsisarnermik atulersitsinerup nunatsinni akileraartarnermik
aaqqissuussinermut annertuumik kinguneqarnissaa qularutissaanngilaq.
Ataatsimiititaliarli aamma pissutissaqarsorivoq
erseqqissassallugu isertitat amerliartortillugit procentinik amerlanerusunik
akileraartitsisarnissamik atulersitsisoqassappat, tamanna sioqqullugu
ajornartorsiutitut tikkuarneqartut ilarpassui
misissoqqissaarneqaqqaartariaqartut. Isertitat amerliar tortillugit procentinik
amerlanerusunik akileraartitsarnikkut akileraartartut sulinermikkut
isertitaqarnerussutimik qaffasinnerusumik procentilerlugit
akileraarutigisalernissaat pissutigalugu sulinerusalernissamut
kajumissuseqarnerisa annikillinissaanik siunnersuuteqartup oqaatigisai
ataatsimiititaliamit tamakkiisumik taperserneqarput. Ataatsimiititaliarlu
isumaqarpoq, tapiissutinik qaffasissumik akissarsiallinnut tunniunneqarneq
ajortunik, assersuutigalugu isertitakinnernut ineqarnermut tapiissuteqartarnikkut
isertitakinnerusullu meeqqerivinniitsitsineranni tapiissuteqartarnikkut
isertitaqqortunerit isersinngitsuusaamik annertunerusunik
akiliuteqartitsinneqartarnerat atuutereersoq.
Ataatsimiititaliaq aamma isumaqarpoq qaffasissumik
ilinniagallit nunatsinnut suliartornissamik
kajumissuseqartarnissaat aalajangiusimaannarumallugu isertitat
amerliartortillugit procentinik amerlanerusunik akileraartitseriaatsimik
atulersitsinissaq sioqqullugu tamanna sukumiisumik
isumaliutigineqaqqaartariaqartoq.
Taamaalilluni ataatsimiititaliap isertitat
amerliartortillugit procentinik amerlanerusunik aki leraartitseriaatsimik
atulersitsinissaq tunngaviatigut akerleraa, isumaqarlunili innuttaasut
isertitat amerliartortillugit procentinik amerlanerusunik akileraartinneqartalinnginnissaannik
tunngaviusumik inatsisikkut qulakkeerinninneq ilaatigut ilanngaataasartut
qaffannerisigut saneqqunneqarsinnaasoq, ilaatigullu pissutsit imaalersinnaasut
isertitat amerliartortillugit procentinik amerlanerusunik akileraartitseriaatsimik
atulersitsinikkut isertitarineqarsinnaasut Naalakkersuisunit
pinngitsoorneqarsinnaajunnaarlutik aammalu siunissami
Naalakkersuisunngorumaartut aningaasaqarnikkut killilersuutinik taamaattunik
pituttorneqartariaqanngitsut.
Tamanna
tunngavigalugu ataatsimiititaliap isumaqatigiittup siunnersuutip
itigartitsissutigineqarnissaa inassutigaa.
Taama oqaaseqarluni Inuusuttut
Inatsisartuisa Aningaasaqarnermut Ataatsimiititaliaata siunnersuut
aappassaaniigassanngortippaa.
Per Rosing-Petersen, Inatsisartut Siulittaasoqarfianni
ilaasortaq, Siumut.
Hans Lars Matyhiassenimut qujanaq. Allanik
oqaaseqartoqarumanerluni, naamik, taamaasillunilu tassissutigissavarput,
tassalu isumaliutissiissut toqqammavigalugu itigartitsissutigineqarnissaa
innersuussutigineqarpoq.
Kikkut itigartitsisoqarnissaanik
isumaqataappat?
18-it.
Kikkut akerliuppat?
4.
Kikkullu taaseqataanngillat?
6.
Taamaasilluni siunnersuut
itigartitsissutigineqarpoq.