Oqaluuserisassani immikkoortoq 13-2 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ullut ataatsimiiffiusut pingajuat,
sisamanngorneq 13. februar 2003, nal. 18:15
Ataatsimiinnermik aqutsisoq: Per Rosing-Petersen, Inatsisartut
Siulittaasoqarfianni ilaasortaq, Siumut.
Per Rosing-Petersen, Inatsisartut Siulittaasoqarfianni
ilaasortaq, Siumut.
Tullianut ingerlaqqipputugut, immikkoortoq 13-iat,
ilinniagaqartut ilinniartut ineqarfiini ineqarnermut akiliuteqartarunnaarnissaat,
ilinnia‑gaqartullu tamanna aqqutigalugu aningaasaqarnikkut ineqarnermut
akiliutinut sipaarutigineqartut amerlaqataannik pissaqarnerulernissaat
anguniarlugu suliniuteqaqqullugit Naalakkersuisut peqquneqarnissannik
Inuusuttut Inatsisartuinut aalajangiiffigsassatut siunnersuut.
Isumaliutissiissummik saqqummiussissaaq
Finn Lennert.
Finn Lennert, Aningaasaqarnermut Ataatsimiititaliaq.
Qujanaq. Immikkoortoq 13 pillugu Inuusuttut Inatsisartuisa
Aningaasaqarnermut Ataatsimiititaliaata isumaliutissiissutaa
aalajangiiffigisassatut siunnersuutip aappassaaneerneqarnerani
saqqummiunneqartoq.
Inuusuttut Inatsisartuisa Ataatsimiititaliaat
suliarinninnermini ukuninnga inuttaqarpoq:
Aka Debes, Carl-Emil Fencker, Sofie Olsen, Hans
Lars Mathiassen, Finn Lennert.
Inuusuttut Inatsisartuisa Ataatsimiititaliaasa
2003-mi siullermeerinerup kingorna Inuusuttut Inatsisartuisa
ataatsimiititaliaata siunnersuut siuliani taaneqartoq misissorpaa.
Ilinniagaqartut aningaasaqarnikkut
ilungersunartunik atugaqarnerat ataatsimiititaliap assut eqqumaffigaa
ilinniartullu ineqarfiini ineqarnermut akiliutinut tunngasoq
soqutiginaateqartutut isigalugu, minnerunngitsumik kisimiillutik pilersuisut
ullumikkut ilungersunartumik inissisimanerat eqqarsaatigalugu, tassami taakku
meeqqaminnik pilersuiitigalutik ilinniarnerminnik aallussillutillu
ilinniagaqarnersiutiminnik annikeqisunik ineqarnerminnut assigisaannullu
akiliuteqartariaqartarput.
Ataatsimiititaliap aamma maluginiarpaa ilinniartut
angajoqqaaminni, namminerisatut inissiami assigisaaniluunniit najugaqartut
ineqarnermut tunngasumik siunnersuummi ilaatinneqanngitsut.
Ataatsimiititaliattaaq maluginiarpaa ilinniartut illoqarfigisaminniinngitsoq
ilinniarnissamik toqqaasut pinngitsooratik inissaqartinneqartussaatitaasut,
taamaattumillu aarleqqutigineqarsin‑naalluni siunnersuutip
akuersissutigineqarneratigut ilinniartut amerleriarujussuarnissaat.
Ataatsimiititaliap Naalakkersuisunut inassutigaa
ilinniartut kisimiillutik pilersuisuusut atugarisaasa, ilaatigut immaqa
meeqqamut ataatsimut naatsorsuullugu ilinniagaqarnersiutit immikkut
qaffanneqarnerisigut, oqilisaassiffigineqarnissaannik Naalakkersuisut
sulissutiginnissasut.
Tamanna tunngavigalugu ataatsimiititaliami amerlanerussuteqartut,
tassaasut Inuusuttut Inatsisartuini ilaasortat Carl-Emil Fenckerip, Sofie
Olsenip, Hans Lars Mathiassenip aamma Finn Lennertip siunnersuutip
itigartitsissutigineqarnissaa inassutigaat.
Ataatsimiititaliami ikinnerussuteqartup, tassaasup
Inuusuttut Inatsisartuini ilaasortap Aka Debesip, siunnersuummut tunngatillugu
oqaatigaa minnerunngitsumik pilersuisut kisimiittut aningaasanik
pissaqarnerulersinnaaqqullugit iliuuseqartoqartariaqarnera pingaartuusoq,
taamaaliornikkut taakku akornanni taamaatiinnartartut amerlavallaartut
ikilisinneqarsinnaaqqullugit, tamannalu tunngavigalugu siunnersuutip
akuersissutigineqarnissaa inassutigalugu.
Taama oqaaseqarluni Inuusuttut Inatsisartuisa
Aningaasaqarnermut Ataatsimiititaliaata siunnersuut aappassaaniigassanngortippaa.
Qujanaq.
Per Rosing-Petersen, Inatsisartut Siulittaasoqarfianni
ilaasortaq, Siumut.
Finn Lennertumut qujanaq. Allamik
oqaaseqartoqarumasoqarnerluni, Aka Debes, takanna.
Aka Debes, Kujataani Ilinniarnertuunngorniarfik, Qaqortoq.
Tassa uani eqqarsaatigeqqussavara
ilinniartut amerligaluttuinnartut meeraqartut pineqarmata, taavalu taakku
akornanni atuarunnaartartut amerlasoorpaalussuupput, taavalu isumaqarlunga
pingaarpaasoq taamannak ilinniagaqarneq naammassineqarsinnaangitsoq taamannak
aningaasaqarluni, taavalu angajoqqaat kisimiittut illoqarfinnut takornartanut
ilinniariartortut taamannak periarfissaqanngillat atuareernerup kingorna
sulinissaminnut imaluunniit allanik assigiinngitsunik akissaqanngillat, taavalu
uppernarsaatissarpassuaqarpoq soorlu angajoqqaat allanik
qinersisariaqalertariaqarsiamsut ilinniarnerminnik unitsitsissallutik
imaluunniit piffissap iluani qitornatik qimattariaqartarlugit.
Tassa isumaqarpunga amerlasuut
eqqarsaatigisinnaagaat imaluunniit ilisimagaat tassa asanerpaaq qimakkusunnagu,
tassa meeraasinnaavoq. Taamaammat angajoqqaarpassuaqarpoq meeqqaminnik
maqaasinnilertartunik, tamatumalu kingorna ilinniakkaminnik
taamaatitsiinnartartut imaluunniit taamaattumik isumaqarpunga taakkununnga
annertuumik iluaqutaasagaluartoq ilinniarfimmiiginnartinnissaannut.
Per Rosing-Petersen, Inatsisartut Siulittaasoqarfianni
ilaasortaq, Siumut.
Allamik oqaaseqartoqarusunnerluni. Birgitte Fly, takanna.
Birgitte Fly, Sanaartonermik Ilinniarfik,
Sisimiut.
Qujanaq. Paasitikkusuppara ilinniartut
illoqarfinni najugallit ilinniartullu kollegiani najugallit
immikkoortinneqassanngimmata aamma isumaqarpunga ilinniartut aningaasanik
taamatut neqeroorfigineqassanngitsut. Qujanaq.
Per Rosing-Petersen, Inatsisartut Siulittaasoqarfianni
ilaasortaq, Siumut.
Birgitte Flymut qujanaq. Allamik
oqaaseqartorumanerluni. Taamaattoqanngilaq.
Taamaasilluta
taasissutigineqannginerani ikinnerussuteqartut, tassaassut Inuusuttut
Inatsisartuini ilaasortaq Aka Debesip ikinnerussuteqarluni siunnersuummut
akuersissutigineqaqqunissa eqqaasitsissutgeriarlugu, taasissutigissavarput
amerlanerussuteqartut innersuussutaat, tassalu siunnersuummut
itigartitsinissaq.
Kikkut itigartitsinissamut
isumaqataappat?
18-it.
Kikkut akerliuppat?
4.
Kikkut taaseqataanngillat?
6.
Taamaasilluni
siunnersuut itigartitsissutigineqarpoq.