Kalaallit Nunaanni Inatsisartut

Oqaluuserisassani immikkoortoq 17-1		[ Ataatsimiinnerit ] [ Tilbage ] [ Op ] [ Næste ]
Siullermeerneqarnera	Aappassaanneerneqarnera		Pingajussaaneerneqarnera

Ullut ataatsimiiffiusut aappaat, pingasunngorneq 12. februar 2003, nal. 16:58

 

 

Oqaluuserisassani immikkoortoq 17

 

 

Ulluunerani paaqqinniffiit iluisa aaqqissuunneqarnerannut malittarisassat Danmarkimi malittarisassat assingi akuereqqullugit Naalakkersuisut peqquneqarnissaannik Inuusuttut Inatsisartuinut aalajangiiffigisassatut siunnersuut.

(Inuusuttut Inatsisartuinut ilaasortaq Ânâ-Grethe Mathiassen, Perorsaanermik Ilinniarfik)

(Siullermeerneqarnera)

 

 

Ataatsimiinnermik aqutsisoq: Jonathan Motzfeldt, Inatsisartut Siulittaasuat, Siumut.

 

 

Jonathan Motzfeldt, Inatsisartut Siulittaasuat.

Tulliuppoq immikkoortoq 17, ulluunerani paaqqinniffiit iluisa aaqqissuunneqarnerannut malittarisassat Danmarkimi malittarisassat assingi akuereqqullugit Naalakkersuisut peqquneqarnissaannik Inuusut tut Inatsisartuinut aalajangiiffigisassatut siunnersuut.

 

Tassani siunnersuuteqarput Ânâ-Grethe Mathiassen.

 

Ânâ-Grethe Mathiassen, Perorsaanermik Ilinniarfik, Ilulissat.

Tunngavilersuut:

Perorsaanermik ilinniagaqartut 20-t ilinniarnerminnik ingerlatsinerminni paasisimavaat ullunnerani paaqqinniffiit malittarisassat Danmarkimi atuuttut malillugit aaqqissuunneqarneq ajortut. Sanaartornermut Malittarisassani 1995-imeersuni kap. 4.4.2, imm. 2 malillugu atuuppoq: Meeqqanik paarsinermi ulluunerani paaqqinniffinni aamma ulloq unnuarlu paaqqinniffinni init atorneqartut meeraaqqerivimmi meeqqamut ataatsimut naatsorsuullugu minnerpaamik 3m²-inik meeqqerivinnilu meeqqamut ataatsimut naatsorsuullugu minnerpaamik 2m²-inik natermi inissaqartitso‑qassaaq.

 

Malittarisassat malinneqannginnerat pillugu nassuiaat tassaavoq init isersimaartarfiusut sananeqarnerini aaqqissuunneqarnerinilu pequtit ilanngaatigineqarneq ajornerat.

 

Tamatuma nassataraa ulluunerani paaqqinniffiit amerlavaanik meeraateqartarnerat, tamatumalu nassataralugu pissutsit kingunerisaannik pitsaanngitsumik silaannarissarneqartarneratigut meeqqat sulisullu napparsimalernissaminnut qaninnerulernerat.

 

Tamakku saniatigut meeqqat illup iluani pinnguarnissamut ingerlatanillu assigiinngitsunik ingerlaqarnissamut periarfissaat killilerneqarput. Aammattaaq silami meeqqat pinguartarfiini pinngu‑arfissat ilanngullugit naatsorsuunneqartarsimanngillat. Tassani meeraaqqerivinni meeqqamut ataatsimut naatsorsuullugu 15 m²-it meeqqerivinnilu meeqqamut ataatsimut naatsorsuullugu 12 m²-it naatsorsuutigineqartariaqarput.

 

Jonathan Motzfeldt, Inatsisartut Siulittaasuat, Demokraatit, Nuuk.

Naalakkersuisunit akissuteqassaaq Marie Fleischer.

 

Marie Fleischer, Naalakkersuisunut ilaasortaq, Demokraatit, Nuuk.

Qujanaq. Sanaartornermi malittarisassat 1982-imeersut nutarteqarnissaat pisariaqartoq Naalakkersuisut isumaqatigilluinnarpaat, suliarlumi aamma aallartinneqarsimavoq.

 

Ineqarnermut, Attaveqarnermut Pilersuinermullu Pisortaqarfiup oqaatigaa upernaap ingerlanerani sanaartornermi malittarisassat nutaat naqiterneqarnissaminnut piariissasut. Siunnersuut illuatungiusunut attuumassuteqarfigineqartunut tusaniaatigineqarsimavoq, ilaatigullu allaffissornermi aqutsinikkut malittarisassanik imaqarnermi saniatigut siuliminit 1982-imeersunit allaassutigalugu illut iluisa aaqqissuunneqarnerat pillugu malittarisassanik erseqqinnerusunik imaqarluni.

 

Siunnersuummi kapitali 4.4.2, imm. 2-mi atuarneqarsinnaavoq: Ulluunerani paaqqinniffinni aamma ulloq unnuarlu paaqqinniffinni meeqqanik paarsiffiusartuni meeraaqqerivinni meeqqa‑mut ataatsimut naatsorsuullugu natermi 3m²-inik annertussusilimmik meeqqerivinnilu meeqqamut ataatsimut naatsorsuullugu natermi 2m²-inik annertussusilimmik inissaqartitsisoqassaaq. Taamaalillutik ulluunerani paaqqinniffiit iluisa aaqqissuunneqarneri pillugit malittarisassat piffissaq sivikitsunnguaq qaangiuppat Danmarkimi malittarisassatut atuuttutut oqaasertaqalissapput.

 

Siunnersuuteqartup malugeqqullugu oqaatigaa Danmarkimi malittarisassat malinneqartuaannartanngitsut, tassami init isersimaartarfiusut sananeqarnerini aaqqissuunneqarnerinilu pequtit initussusiat ilanngaatigineqarneq ajormat. Malittarisassat atuuttut malinneqarnissaat sanatitsisisup isumagisassarimmagu uagut Naalakkersuisut tamatumunnga imaaliallaannaq akuliussinnaanngilagut.

 

Inatsisartullu maj 2002-mi ulluunerani paaqqinniffiit, angerlarsimaffinni ulluunerani paarsisarneq il.il. pillugit peqqussut akueraat, tassanilu takuneqarsinnaavoq ilaatigut paaqqinniffiup aaqqissuunneqarnera ingerlanneqarnerallu pillugit tunaartarisassanik Naalakkersuisut aalajangersaassasut. Tunaartarisassani taakkunani meeqqat ataasiakkaat inerartornerisa eqqarsaatigineqarnissaat soorunalimi ilanngutissavarput, taamaalillutik meeqqat atuarfitsialammut pitsaanerpaamik piareersarneqarsinnaaqqullugit.

 

Sanaartornermut malittarisassat nutaat suliarineqalereersimammata siunnersuut itigartinneqassaasoq Naalakkersuisut matumuuna inassuteqaatigaat.

 

Jonathan Motzfeldt, Inatsisartut Siulittaasuat, Siumut.

Siunnersuuteqartup pissusissamisut apeqqutigaa Siulittaasumut oqaaserineqarsimasunik issuaasinnaanerluni, aamma taamaappoq, oqallinnermi saqqummiussinermi oqallinnermilu oqaaserineqarsimasut allagaasimasulluunniit issuassagaaanni, taava Siulittaasup akuersinissaa qinnutigisariaqarpoq, tassa oqaluttarfimmi tassani oqaaserineqartussat tamarmik taamatut ilusilersugaapput.

 

Apeqqutigissavara siunnersuuteqartoq ilanngussassaqarnersoq aatsaannguaq oqaaserineqartunut. Ânâ-Grethe Mathiassen.

 

Ânâ-Grethe Mathiassen, Perorsaanermik Ilinniarfik, Ilulissat.

Una eqqaaneqarmat sanaartortitsisoq pisussaasoq isumagisussaallugu qanoq meeqqeriviup ilusilersorneqarnissaa, taannartaa ilassuteqartilaarusuppara.

 

Namminersornerullutik Oqartussat affaa meeqqeriviit akilertarpaa, aamma akuerisussaavaa ilusilersorneqarnera meeqqeriviup qanoq angitiginera sanaartunnginnerani. Taamaammat aamma erseqqissumik tassani allaqqasoqartariaqarpoq inatsisini. Taanna tammaasaratsigu misissuigaanngatta.

 

Jonathan Motzfeldt, Inatsisartut Siulittaasuat, Siumut.

Tulliulluni oqaaseqassaaq Poul Olsen.

 

Poul Olsen, Naalakkersuisunut ilaasortaq, Siumup Inuusuttai, Sisimiut.

Naatsunnguamiguna erseqqissaaviginiarlugu meeqqeriviliortiternermut tunngasut kommunip Namminersornerullutillu Oqartussat avitseqatigiittarnerannut tunngasut eqqaasatit, taanna pingitsaaliissutaannginnami, imaakkami Namminersornerullutik Oqartussat annerpaamik 50 procentiussaaq, imaassinnaagami aamma Namminersornerullutik Oqartussat 40 procentiinnarmik tapiissut imaluunniit massakkut Sisimiuni sanaartorneqartoq meeqqerivik kommunip nammineerluni tamaat akilerpaa. Taamatut ittoqarsinnaammat taanna ilisimatitsissutitut saqqummiutilaarpara.

 

Jonathan Motzfeldt, Inatsisartut Siulittaasuat, Siumut.

Allamik oqaasissaqartoqarpa, taamaanngilaq.

 

Taamaalilluni maannakkut apeqqummi tassani imm. 17-imi oqaaserineqartut najoqqutaralugit Naalakkersuisut aamma akissutaat tunngavigalugu Suliffissaqartitsiniarnermi Ataatsimiititaliami apeqqut taanna uterfigineqassaaq, taavalu aappassaaneerneqartinnagu isummerfigineqarnissaannut tunngavissiortoqassalluni.

 

Taamaalilluta ullumikkut oqaluuserisassagut naammassivagut nalunaaqquta arferngup-qeqqata qaangilaarnerani, taavalu taamaalilluni ataatsimiinneq naammassivoq.

 

Aqagumut ataatsimiinneq maani inimi aallarteqqissaaq nalunaaqutaq ataatsinut taavalu aamma naammassinissaata tungaannut aamma ingerlanneqassalluni.