Oqaluuserisassani immikkoortoq 35 |
|
||
| Siullermeerneqarnera | Aappassaanneerneqarnera | Pingajussaaneerneqarnera | |
Ullut ataatsimiiffiusut pingajuat,
sisamanngorneq 13. februar 2003, nal. 16:40
Oqaluuserisassani immikkoortoq 35
Oqallisissiatut apeqquteqaammik
siunnersuut: Inuiaqatigiinnut tunngasut suut pingaaruteqartut siunissami
Tunngaviusumik Inatsimmi ilaatinneqassappat, aammattaaq qa noq periarfissaqarpa
aalajangersimasunik oqaasertaliinissaq ileqquusunut pingaarnernut
tunngatillugu, soorliu assersuutigalugit:
1) Inuit ikioqatigiinnerussapput
pisortallu ikiuisarnerat eqeersimaarnerusoq ingerlanneqassaaq.
2) Inuiaqatigiinni
suna sulissutiginerussavarput (Akisussaassuseqarneq)?
3) Nunatsinni nunami
oqartussaanerpaaq qanoq taaguuteqassava? ("Angakkoq"?)
4) Nunatsinni illersornissaq
(sakkutooqarneq) qanoq aaqqissuunneqarniarpa?
5) Inuiaqatigiinnut
paasissutissat qanoq siaruarterneqarniarpat?
Assersuut: Taamaallaat qarasaasiamik
pigisaqartut paasissutissanik SUNNGU-miit aallersinnaassappat?
(Inuusuttut
Inatsisartuini ilaasortat Sofie Olsen aamma Philipus Maqe, Knud Rasmussenip
Højskolia, Sisimiut)
Ataatsimiinermik aqutsisoq: Per Rosing-Petersen, Inatsisartut
Siulittaasoqarfianni ilaasortaq, Siumut.
Per Rosing-Petersen, Inatsisartut Siulittaasoqarfianni
ilaasortaq, Siumut.
Oqaluuserisassani tullinnguuppoq
immikkortoq 35, aamma taanna oqallisissiatut apeqquteqaammik siunensuutaavoq
taannalu oqallisissiatut ullumikkumut naggataajuvoq imannak qulequtalik:
Inuiaqatigiinnut tunngasut suut pingaaruteqartut siunissami Tunngaviusumik
Inatsimmi ilaatinneqassappat, aammattaaq qanoq periarfissaqarpa
aalajangersimasunik oqaasertaliinissaq ileqquusunut pingaarnernut
tun-ngatillugu, soorliu assersuutigalugit:
1) Inuit ikioqatigiinnerussapput
pisortallu ikiuisarnerat eqeersimaarnerusoq ingerlanneqassaaq.
2) Inuiaqatigiinni
suna sulissutiginerussavarput (Akisussaassuseqarneq)?
3) Nunatsinni
nunami oqartussaanerpaaq qanoq taaguuteqassava? ("Angakkoq"?)
4) Nunatsinni
illersornissaq (sakkutooqarneq) qanoq aaqqissuunneqarniarpa?
5) Inuiaqatigiinnut
paasissutissat qanoq siaruarterneqarniarpat?
Assersuut: Taamaallaat qarasaasiamik
pigisaqartut paasissutissanik SUNNGU-miit aallersinnaassappat? Taakua
siunnesuuteqartut sinnerlugit Philipus Maqe saqqummiissaaq.
Philipus Maqe, Knud Rasmussenip Højskolia,
Sisimiut.
Siunnersuummut tunngavilersuut:
Apeqqutit assigiinngitsut Nunatsinni
inuiaqatigiinnut pingaaruteqarput. Apeqqutit ilaat immaqa Nunatsinni pissutsit
immikkut ittut atuuttut tunngavigalugit, aammalu siunissami naalagaaffeqati-giinnermut
pissusiulerumaartussat tunngavigalugit akineqarsinnaagaluarput.
Apeqqutinut taakkununnga
tunngatillugu oqallinneq tunngavigalugu, neriuppugut akissutissa-viusinnaasut
qanillattorumaarigut.
Per Rosing-Petersen, Inatsisartut Siulittaasoqarfianni ilaasortaq,
Siumut.
Philipus Maqemut qujanaq.
Naalakkersuisut sinnerlugit akissuteqassaaq Arnatsisaq Larsen.
Arnatsiaq Larsen, Naalakkersuisunut ilaasortaq, Inuit
Ataqatigiit, Nuuk.
Tassa Inatsisit Tunngaviusuni
aalajangersakkat nassataajusumik oqallisigivagut tassalu siunensuutigineqartoq
uani nunatta illersorneqara, inuttat paasissutissanik pissarsisinnaanerannik
ajornartorsiutit pingaarutillik saqqummippaat, taavalu alla tassunga
tunngatillugu aamma soqutiginaateqartigisoq tassani oqallinnermi taamaallaat
inuit piginnaatitaaffii pineqanngillat. Uani aamma inuit pisussaatitaaffii
pineqarput, tassa uatsinnut aamma inuiaqatigiinnut ilaaffigisatsinnut
akisussaaffeqartugut.
Naalakkersuisut akissuteaqanngillaq
tassung ajornartorsiummut isummertumik, Naalakkersuiullu taarsiullugu
Inuusuttut Inatsisartuini ilaasortaq soqutigalugit tusarnaassavaat taavalu
aamma Naalakkersuisuni ilaasortat oqallinnermi peqataanissaminut
pituttorneqarsimanngillat, nammineerlutillu oqaatsiitit isummatillu
saqqummiussinnaallugit.
Siunnersuummi oqallinnermilu isummat
eqqarsaatillu saqqiummutut Naalakkersuisuni oqallisigineqssapput taavalu
inaarutaasumik dokumentimut ilanngunniarneqassallutik, tassani Kalaallit
Nunaanni Tunngaviusumik Inatsimmi aalajangersagassatut siunnersuutinik imalik.
Neriuppugut
oqallilluartoqarumaartoq.
Per Rosing-Petersen, Inatsisartut Siulittaasoqarfianni
ilaasortaq, Siumut.
Arnatsiaq Larsenimut qujavugut,
allanik oqaaseqartoqarumasoqarnerlu – Qârqutsiánguaq Sadorana.
Qârqutsiánguaq Sadorana, Avanersuup Atuarfia, Qaanaaq.
Oqallisissiaq pikkunartoq.
Siullermik akisussaaffigaarput
susassareqatigiinnerput atorluartariaqa rparput.
Kalaallit Nunaanni inuusugut ikioqatigiinneq anginerusumik
atortariaqalerpaput.
Namminersulerutta qullersaqarfiit
ilai assersuutigalugu Nalagaaffeqartarput, Danmarkimi soorlu Droninngeqarpoq,
taava maan namminersulerutta naalagaaffik qanoq ateqassava imaluunniit
Naalakkersuisuni imaluunniit Kalaallit Nunaanni aqutsisoq imaluunniit
assersuutigalugu immaqa angakkoq imaluunniit Kalaallit Nunaanni Naalagaq.
Sakkuttunut ilinniarfittaarnissamut
Kalaallit Nunatsinni periarfissaq suli mikivallaarpoq, sakkutuunngoniarlunili
aalajangersimasoq ammasumik periarfissinneqartariaqarpoq soorlu nunanut allanut
ilinniariartortariaqassappat.
Nunaqarfiit eqqarsaatigalugit
computerinik makku Sunngumi internetikkut illoqarfinni anginerusuni
illoqarfinniluunniit arlaani takusarpaat Sunnguminngananiit ilinniarfik sumut
attuumassuteqarnersoq, taava makku atorsinnaagaluarpagut TV-kkut ilaatigut
TV-kanalilerlugit imaluunniit marlunngorlugit,t aava Sunngumiit paasissutissat
TV-kkut saqqummillugit imaluunniit radiukkut. Radio aamma atorsinnaavarput.
Taamatut aaqqiisoqarsinnavoq isumaga malillugu, aaqqiisoqarsinnaavoq TV-kkut
paasissutissat radiukkullu paasissutissat nunaqarfiit eqqarsaatialguit. TV-mi kanalit marlunngorlugit, taamatullu
aamma radiokanalit marlunngorlugit. Qujanaq.
Per Rosing-Petersen, Inatsisartut Siulittaasoqarfianni
ilaasortaq, Siumut.
Qârqutsiánguaq Sadoranamu qujavugut,
tullinnguuppoq Sofie Olsen,
Sofie Olsen, Knud Rasmussenip Højskolia, Sisimiut
Ullutsinni inuit immitsinnuinnaq isumaginiarneq pingaartilesimavarput, inoqatit ikiortariallit qanoq ikiorsinnaaneri nalornisalersimavarput. Siulitta ikioqatigiilluni nukittuunngortitsisarneq atugaraat. Ullutsinni susassareqatigiinneq utertinneqasappat tamanna ilinniartitsissutigineqartariaqarpoq. Iliniartitsineq Atuarfitsialaap siunertaanut tamanut aqqusaagassanngorlugu fagitut klasseni aalajangersimasunik pilersittariaqarpoq.
Inuit ikiortariaqavissut pisortanit isumatuumik ikiorserneqartassapput. Inuit suliffeerukkallartut pilersuinermiluunniit inuiaqatigiit aningaasaateqarfianiit sulinermik illuatungiliinermik imaluunniit suliffeqalernermi uterterangassanik ikiorserneqartarsinnaapput.
Takorloorparput Nunatsinni sakkutuujusarneq inukinnerput pissutigalugu pinngitsaaliissutaalluni inuusuttutunut aggersassanngimmat, allamik naleqquttumik nunatsinni tunniussaqartariarluta. Imaassinnaavoq inuusuttut tamarmik 20-liinissamik tungaanut piffimmiit piffimmut nikerartumik aalajangersarneqartumillu inuiaqatigiinnut naleqquttussamik, soorlu ukiup affaa annikitsumik aningasatigut pissarsiutaasussami suliaqartitaassasugut soorlu børnehavini, meeqqarivinni inunnilu sullissiviit allallu suliffimmik najoqqutaralugu pisariaqartitsisullu naapertorlugu aaqqissuutaasmik.
Nunatta radio ”Kalaalimik” aapperneqartariaqarpoq, taanna inuiaqatigiinnut pingaarutilinnik paasissutissiisarfiussaaq, taamatuttaarlu KNR-TV kalaallisuinnaq ingerlasumik kanalilerneqassaaq. Aamma paasissutissiisussamik internetimut attaveqarneq ukiuni tulliuttuni avaqqunneqarsinnaanani piffinni tamani inoqarfinni tamani pisortat minnerpaaffiliillutik aalajangigaannik kommunit pilersitsissapput, innuttaasut pisariaqartitsinertik naapertorlugu alakkartersinnaasaannik.
Ilinniarfiit, atuarfiit pinngitsooratik aamma periarfissaartinneqartarnissaat aamma piumasaqaataassaaq. Qujanaq.
Per Rosing-Petersen, Inatsisartut Siulittaasoqarfianni ilaasortaq, Siumut.
Sofie Olsenimut qujananaq. Allamik oqaaseqartoqarumasoqarnerluni – Johanne Olsen Kreutzmann, takanna.
Johanne Olsen Kreutzmann, Ilisimatusarfik, Nuuk.
Oqallisissiami ilanngullugu oqaatigaivarsi
qartussaasuninngaanniit sullissineq pitsaanerusoq suli
anguneqarsinnaasariaqassanersoq siunissatsinni naalagaaffeeranngornissatsinni
immaqaluunniit naalagaaffinngornissatsinni. Kisianni aamma
takorloortariaqarparput assersuutigiinnarlugu inunnik isumaginninneq
naalagaaffiup isumagissanngikkaa oqaatigisinnaavarput, taamaalillu inuit imminut
isumaginerput nammineerluta akisusaaffigisussanngorlugu imaluunniit allatut
qaaissuuttussanngorlugu, toqaaannartumik naalagaaffimmut
suliaritinngikkaluarlugu. Assersuutigisinnaavarput taanna.
Imaluunniiit
susassaqarfinnut allanut massakkut Namminersornerlutik Oqartussat
aqutaanni, taakku arlaat inuiaqatigiit namminneerlutik aqutussanngorlugu
aaqqissuussinnaavaat, imaanngilaq naalagaaffeqariaaseq ataasiinnaasoq.
Naalagaaffeqariaatsit assigiinngitsorpassuupput naalagaaffiullu akisussaaffi
inissitsiterneqarsinnaapput assigiinngitsorpassuarnut.
Massakkut uaagut inuk qitiutittorujussuuarput uani
naalakkersueriaatsip iluani, Qallunaat Nunaata naalagaaffeqariaasia
taamaatuungami inuit pisorujussuugamikkit. Kisianni Itali assersuutigiugtsigu
Italiami naalagaaffiup ima ungasitsigipput inuinnarnut sullissinerat inuit
namminneerlutik annertunerpaamik akisussaaffigalug peqqissuunissartit
assersuutigalugu, ilinniaritaanissartik sunissartik. Inunnut tunngasortai
naalagaaffiup akulerufigeqqajaanngilai. Taamaattumik aamma pingaaruteqarpoq
qisuariaqqinnissatsinnut imaluunniit allangoriaqqinnissatsinnik inuiaqatigiit
aaqissuussaanissatsinnik.
Annertunerusumik inuiaqatigiit
ilisimalertariaqaleripput periarfissat allat. Nunani allani qanoq
aaqqissuussisoqartarnersoq, naalagaaffilioriaaseqartoqartarnersoq,
innuttaqartoqariaaseqartar-
nersoq, innuttaqartoqariaaseqartoqartarnersoq
qanoq-ittunik, innuttat qanoq akiussusaaffilersorneqartarnersut. Una
ataasiinnaavissuarmik isikkoqartutut ingerlaartuarnerput taannaannaanngilaq.
Naalagaaffinngussagutta qularnanngilaq allarpaassuit
misissoqqaarsimasariaqarigut ilisimasariaqarigullu inuttut amerlanerpaat
paasisimasariaqaraat qanoq allatut aaqqissuisoqarsinnaanersoq.
Imaanngikkaluarpoq naalagaaffeqatigiinnermut tunngasut, kisianni naalagaaffiup
nammineerluni qanoq aaqqissuusseriaasiannut tunngasut.
Una aamma eqqaasat nunatsinni nunai
oqartussaanerpaat angakkumik taaguuteqarsinnaassanersoq, toqqqaannartumik uanga
isumaqatiginngilara. Angakkoq tassaaneq ajorpoq oqatussaassueqarnerpaat inuiaqatigiinni.
Immaqa oqaluttuallaqqissorsuit taama isumaqarsinnagaluarput angakkunngooq
imaapput, imaapput imaapput. Kisianni angakkoruna inuiaqatigiinni allatulli
nunaqqataasutut oqartussaassuseqarnerunani kisianni atorfeqartoq angakkutut.
Naligiissumik annertuumik inooqatigiinneq
pisarsimavoq angaakoqarallarnerup nalaanni, imaanneq ajorput angakkoq
oqartussaanerpaasoq. Imaattarsimavoq oqartussaanerpaaq tassaassappat
tassaasimassagaluarpoq arnaq, qanga itsaq pissutsinut assersuussiniarutta
kalaallit arnap isumagisassarisarsimavai illumi nerisassaqartuaannarnissa,
piniartup atisaasa pitsaajuaannarnissai piniartoq uumajuaannassappat,
ilaqutariinni arnap silatusaarnermigut pikkorinnermigut ileqqaarsimasussaq.
Tassaasoorlu taanna arnaq piniartortaminut atisalersuilluarnermigut,
meerartamigut perorsaalluarnermigut, nammineerluni nerisassanik
ileqqaarluarnermigut, inuiaqatigiinni, illoqatigiinni, ilaqutariinni
annatstsisussaq, imaanngitsoq angakkoq toqqaannartuunngikkaluartumik.
Immaqa ningiortamik taasalerumaarparput
angutaagaliarpalluunniit. Qujanaq.
Per Rosing-Petersen, Inatsisartut Siulittaasoqarfianni
ilaasortaq, Siumut.
Johanne Olsen Kreutzmannimut qujanaq,
tullinnguuppoq Birgitte Fly, takanna.
Birgitte Fly,
Sanaartornermut Ilinniarfik, Sisimiut.
Qujanaq. Ilumoorpoq
isumaqatiginarlunilu Qârqutsiánguaq Daoranap eqqaasaanut Sunngu pillugu. Sunngu
pappiaranngorlugu nassiunneqassaarnikuuvoq. Ilumoorpoq Kalaallit Nunaanni,
ingammik nunaqarfinni paasissutissiinermi atortussiakkut
ineriartorneqartariaqartoq, ilaatigut inuiattut ingerlariaqqinnissatsinnut
atorfissaqartikkatsigit. Qujanaq.
Per Rosing-Petersen, Inatsisartut Siulittaasoqarfianni
ilaasortaq, Siumut.
Berigitt Flymut qujanaq. Tullinnguuppoq Sofie
Olsvig, takanna.
Sofie Olsvig, Prinsesse Margrethip Atuarfia, Upernavik.
Minnerunngitumik avannaani atuaqqinnissq
eqqarsaatigalugu periarfissat annikippaarneri tunngavigalugit Qârqutsiánguup
oqaasia isumaqatigaara, TV-kkut ersersinneqarsinnaagaluaruni atuarfiu sinnaasut
suut paasineqarsinnaagaluarput.
Per Rosing-Petersen, Inatsisartut Siulittaasoqarfianni
ilaasortaq, Siumut.
Sofie Olsvigimut qujanaq, tulliuppoq Philipus
Mage, takanna.
Philipus Mage, Knud Rasmussenip Højkolia, Sisimiut.
Qujanaq. Unaanna pimmagu nunatta naalagassaa
angakkoq, taanna eqqaammagu, imaanngitsoq taama ateqartussaq, kisianni
taagutissaa qanoq ateqassava, nunarpummi nunat allat, imaakkami naalagaaffiit
præsidenteqarput, dronningeqarput, kunngeqarput, taava nunarput uagut
namminersuleruni qanoq ateqassava, taannaanna pigipput, imaanngitsoq
ateqartussaq angakkoq, taassuminngaannaruna. Qujanaq.
Per Rosing-Petersen, Inatsisartut Siulittaasoqarfianni
ilaasortaq, Siumut.
Philipus Maqemut qujanaq, allamik
oqaaseqartoqarumanerluni. Naja Stefani, takanna.
Naja Stefani, Naalakkersuisunut ilaasortaq, Atassutip
Inuusuttai, Sisimiut.
Qujanaq. Ikioqatigiittoqalernerunissaanik
ujartuineq uanga oqaaseqarfigilaarusuppara, peqaatigiiffippassuaqarmat,
nammineq soqutigisaq aallaavigalugu orninneqarsinnaasut suulluunniit, timersoqatigiiffiusinnaapput,
partiinut tunngassuteqarsinnaapput allalluunniit soqutigisaqaqatigiinnermut
tunngassutillit peqatigiiffippassuit.
Isumaqarpunga inuiaqatigiit taakku
atorluarnerusinnaasariaqaraat, imak atorluarnerusariaqaraat ikioqatigiinnerulernissamut
nammineq soqutigisaq najoqqutaralugu ingerlaqqinnissamut. Taamaalilluni immaqa
inuiaqatigiit tamakkununnga akuunnerulernerminnut ikuoqatigiinnerulerneq
pilersinneqarsinnaasoq.
Taavalu Sunngumut tunngasoq.
Illoqarfiit naluara Atuakkanik atorniartarfeqarnersut, kisianni tassunga
ujartuiffigineqarsinnaapput allerfigineqarsinnaallutillu Sunngu
pissarsiariniaraanni. Qujanaq.
Per Rosing-Petersen, Inatsisartut Siulittaasoqarfianni
ilaasortaq, Siumut.
Naja Stefanimut qujanaq. Allamik oqaaseqartoqarumanerluni.
Birgitte Fly, takanna.
Birgitte Fly,
Sanaartornermut Ilinniarfik, Sisimiut.
Qujanaq. Namminersulivinnissaq
eqqartortillugu siulersuisussaq eqqartortillugu kalaallit ima piniernikkut
inooriaaseqarput, angutit nungullutik piniartuupput, taakkuli piginnaasaat
assigiinngeqaat, ilaat puisinniallammaat, ilai arfanniallaqqisut, ilai
nannuniallaqqisut, ilai timmiarniallaqqissut. Taakkua piniartut
puisinniallaqqissut puisinniarnermi aquttuutinneqartarput ilisimasortaasarput. Uagut aamma demokratiskiusumik
inissisimalluta aamma taamaappugut. Naalagaaffinngorniaraluarutta
imaassimasinnaagaluarami imaassimasinnaannginnerpa præsidenteqarutta
tulluarnerussava. Qujanaq.
Per Rosing-Petersen, Inatsisartut Siulittaasoqarfianni
ilaasortaq, Siumut.
Brigitte Flymyt qujanaq. Allamik, Poul Olsen,
takanna.
Poul Olsen, Naalakkersuisunut ilaasortaq, Siumup Inuusuttai,
Sisimiut.
Qujanaq. Najamuku eqqaasai peqatigiiffippassuit
eqqarsaatigalugit aamma peqatigiiffilerisut eqqarsaatigisariaqarparput tamatta.
Soqutigisagut aallaavigut ataasiugaluartut tamatta immikkut sulinerput taanna
atorsaatigeqqajaajuaannarparput peqatigiinni sullissinitsinni. Soorlu
peqatigiiffiit inuusuttunut tunngassuteqartut tamarmik immikkoorlutik
sullisipput. Nukiit pitsaasumik atussagutsigit
pitsaasumillu inerneqartoqassappat, peqatigiiffiit soqutigisaminnik
soqutigisaqaqatigiillutik ingerlatsisinnaanerat taanna siunissami
anguniartariaqarpoq pingaarutilik. Taamaalilluta sullitagut pitsaanerusumik,
pilertornerusumik patajaanerusumillu sullissinnaaqqullugit, taamaalilluta
ikioqatigiilluta ingerlaqtsisinnaalissaagut. Qujanaq.
Per Rosing-Petersen, Inatsisartut Siulittaasoqarfianni
ilaasortaq, Siumut.
Poul Olsen qujanaq. Tullinnguuppoq Arnatsiaq
Larsen aappassaaniilersoq. Eqqaasitsissutigilaasavara una oqallisissiaq
naammassippat taaseqattaarnerit aallartittussaammata maani iniminngitsut
ataatsimiitarfiliaqqullugit.
Arnatsiaq Larsen, Naalakkersuisunut ilaasortaq, Inuit Ataqatigiit,
Nuuk.
Nunatsinni nunami oqartussaanerpaamik qanoq
taaguuteqassanersoq immaqa ujarlertoqarsinnaavoq, immaqa kalaallimik
ataqqinartumik immaqa inoorlaaminngaanniit meeqqamik aallartikkuni imaluunnit
kalaallimik utoqqarmik ataqqinartumik. Qujanaq.
Per Rosing-Petersen, Inatsisartut Siulittaasoqarfianni
ilaasortaq, Siumut.
Qujanaq, tullinnguuppoq Tupaarnaq Binzer, takanna.
Tupaarnaq Binzer, Qeqqani Ilinniarnertuunngorniarfik, Nuuk.
Qujanaq. Oqarniaannarlungaana oqartussaanerpaaq
qanoq taaguuteqassanersoq taanna eqqartornissaa annikippallaarpoq, massakkut
taamatut pingaaruteqartigisoq eqqartussagutsigut pingaarutilimmik taava nunap
namminersulivinnissaa anguniarneqassanersoq eqqartoqqaartariaqarparput.
Per Rosing-Petersen, Inatsisartut Siulittaasoqarfianni
ilaasortaq, Siumut.
Qujanaq, tullinnguuppoq Ânâ-Grethe Mathiassen,
takanna.
Ânâ-Grethe Mathiassen, Perorsaanermik Ilinniarfik, Ilulissat.
Qujanaq. Uanga uunga nr. 2-mut isumaqarpunga
inuiaqatigiit suna sulissutiginerussavarput tunngaviliisagutta tassani
pingaartittariaqarparput amerlasuunik ilinniarsimasunik peqarnissarput,
ilinniartitaaneq pingaartitariuassagipput taavalu taakku akisussaaffimmik
tigusisuussussaammata annertuumik nunarput iluamik aqunneqassappat
namminersulissagutta.
Per Rosing-Petersen, Inatsisartut Siulittaasoqarfianni
ilaasortaq, Siumut.
Ânâ-Grethe Mathiassenimut qujanaq. Allamik
oqaaseqartoqarumasoqarunanngilaq, taamaappoq, taava immikkortoq 35
taamaasillugu naammassivarput, taava aatsaannguaq oqarnittuut taaseqattaarnerit
aallartittussapput, tassa aappassaaneerinninnerit.