Kalaallit Nunaanni Inatsisartut

Oqaluuserisassani immikkoortoq 39		[ Ataatsimiinnerit ] [ Tilbage ] [ Op ]
Siullermeerneqarnera	Aappassaanneerneqarnera		Pingajussaaneerneqarnera

Ullut ataatsimiiffiusut sisamaat, tallimanngorneq 14. marts 2003 nal. 10:54

 

 

Oqaluuserisassani immikkoortoq 39

 

 

Inaarutaasumik siunnersuutip tunniunneqarneranut atatillugu Inuusuttut Inatsisartuisa sinniisussaannik toqqaaneq.

(Inuusuttut Inatsisartuisa Siulittaasoqarfiat)

 

 

Ataatsimiinnermik aqutsisoq: Jonathan Motzfeldt, Inatsisartut Siulittaasuat, Siumut.

 

 

Jonathan Motzfeldt, Inatsisartut Siulittaasuat, Siumut.

Massakkut ullormut oqluuserisassani immikkoortoq 39-mut ingerlaqqissaagut - Inaarutaasumik siunnersuutip tunniunneqarneranut atatillugu Inuusuttut Inatsisartuisa sinniisussaannik toqqaaneq. Tamannalu pissaaq unnummut Hans Egedep Illuani, ullumilu ataatsimiissutit akuersissutigineqarnikut Naalakkersuisunut tunniunneqartussat aammalu Naalakkersuisut Siulittaasuannut ingerlateqqinneqartussat persuarsiortumik tunniunneqassapput, taassumalu kingorna nerersuaqatigiissaagut, tassanilu siunnersuuteqassaasi kina Inuusuttut Inatsisartuinit inaarutaasumik siunnersuutip tunniunneqarneranut atatillugu tunniussisuussanersoq. Siunnersuutiussaqartoqarpa?

Aggu Løvstrøm, takanna.

 

Aggu Løvstrøm, Isumaginninnermi Siunnersortinngorniat Ilinniarfiat, Nuuk.

Eqqortuusoraara Inuusuttut Inatsisartuini inuusunnerpaaq inaarutaasumik siunnersuummik tunniussisuussasoq.

 

Jonathan Motzfeldt, Inatsisartut Siulittaasuat, Siumut.

Aggu Løvstrømip siunnersuutigaa Tukumminnguaq Nykjær Olsen tunniussisuussasoq.

 

Allanit allanik siunnersuuteqartoqarumanerluni?

Taamaanngilaq, taamaasilluni Tukumminnguaq Nykjær Olsen inaarutaasumik siunnersuutinik Inuusuttut Inatsisartuinit siunnersuutigineqarpoq.

 

Siunnersuummut isumaqataasut qinnuigissavakka nikueqqullugit.

 

28.

 

Siunnersuummut akerliusut qinnuigissavakka nikueqqullugit.

 

0.

 

Taaseqataanngitsoqarpa?                       

 

1.

 

Taamaasilluni Tukumminnguaq Nykjær Olsen Inuusuttut Inatsisartuisa inaarutaasumik siunnersuutaannik tunniussisussatut siunnersuutigineqarnera akuersissutigineqarpoq.

 

Taamaasilluta oqaluuserisassani immikkoortut tamakkerpavut nalunaarutigissallugulu Inuusuttut Inatsisartuisa ataatsimiinnerat naammassiqo

 

Neriuppunga, ataatsimeereernissi kingorna oqallinnersi piumassuseqarnersilu ingerlatiinnassagisi, akornissinnilu ataatsimiinnerup ingerlasimanera eqqartorlusiuk.

 

Ilanngullugu oqaatigissavara inuusuttunut taamatut aaqqissuineq pitsaasuummat – kalaalit inuusuttut taamaasillutik oqaluuserisassanik siunnersuusiornerisigut isummaminillu saqqummiussuinermikkut isummatik taamaasillutik ersersikkaat. Tamannalu aamma annertuumik ilinniarfiusimavoq torersumillu naammassineqarluni.

 

Sulisuvut allattoqarfippullu aamma qujassuteqarfigerusuppakka, suliassamik annertuumik ulapaarfimmi kivitsisimammata. Tamanna assorsuaq nuannaarutigaarput peqataasullu tamaasa maaniittut qutsaveqarfigerusuppakka. Aamma nuannerpoq Kalaallit Nunaanni nutaarsiassaqartitsiviit, Sermitsiaq Atugagdliutillu eqeersimaarluarlutillu peqataalluarlutik Inuusuttut Inatsisartuinut malinnaalluarsimammata nutaarsiassanillu ingerlatitseqqittarsimammata. Tusagassaqartitsiviit qutsavigaagut, ataatsimiittarfiup avataaniittut taamaasillutik ataatsimiinnermut malinnaatinneqarsinnaasimammata.

 

Naggataatigut oqaatigerusuppara Inuusuttut Inatsisartuisa inaarutaasumik siunnersuusiaata Tunngaviusumik Inatsisip eqqartorneqarneranut siunissamilu suliarineqarnissaani qissimigaarneqartarumaartoq, tassungalu tunngassuteqartut ingerlateqqitat ataqqineqarlutillu eqqarsaatigilluarneqassapput.

 

Naggataarutaasumik oqaaseqarusuppunga; arnaagutta angutaaguttaluunniit, inuusuttuugutta utoqqaaguttaluunniit pinngitsoqarata akissussaaqataaffeqarpugut, tamattalu isummatsinnik annississalluta sassarternissatsinnut periarfissaqarpugut.

 

Taamatut naalakkersorneqarani isummanik saqqummiussisinnaaneq tamatta illersortariaqarparput, aamma ukiorpassuarni taamak iliorpugut,  aammalu takusinnaavara inuusuttut aamma ilissi siunissami taamak isiornissassinnut piumassuseqarluartusi. Ulloq suli naanngilaq, unnussiuaarluarnissassinnillu kissaappassi.

 

Nal. 11:30 maani naggasiissaagut.

 

Ataatsimiinneq tamaannga killeqarpoq.