Kalaallit Nunaanni Inatsisartut

Oqaluuserisassani immikkoortoq B		[ Ataatsimiinnerit ] [ Tilbage ] [ Op ] [ Næste ]
Siullermeerneqarnera	Aappassaanneerneqarnera		Pingajussaaneerneqarnera

Ulloq ataatsimiiffiusoq siulleq,  marlunngorneq 11. februar 2003, nal. 09:10

 

 

Oqaluuserisassani immikkoortoq B

 

 

Ullormut oqaluuserisassanut nassuiaat.

(Inuusuttut Inatsisartuisa Siulittaasoqarfiat)

 

 

Ataatsimiinnermik aqutsisoq: Jonathan Motzfeldt, Inatsisartut Siulittaasuat, Siumut.

 

 

Jonathan Motzfeldt, Inatisartut Siulittaasuat, Siumut.

Taava tikipparput ullormut oqaluuserisassanut nassuiaat. Tassa immikkortoq B. Tassani oqaatigissavarput naluneqanngitsutut ataatsimiinneq manna ulluni tulliuttuni sisamani ingerlasussaasoq, katillugillu siunnersuutit 37-t oqaluuserineqarnissaannut piffissaq annikitsuusoq.

 

Pilersaarutilli malillugit inimi maani siunnersuutinik suliarinnermut oqallinnermullu 13 ½ tiimit missaat atorneqartussaammata, sivisunerulaarsinnaavoq. Inimi maani siunnesuutit tamakkerlugit pitsaasumik suliarineqarnissaat ilutsittumik, aamma taamaattariaqarmat, ataatsimiititaliani sulineq pitsaasuullunilu aamma sukumiisuusariaqarmat.

 

Aqagunnguaannartoq pingasunngornermi aalajangiiffigisassatut siunnersuutit tamarmik inuusuttut Inatsisartuisa ataatsimiinneranni siullermeerlugit oqaluuserineqassapput. Siullermeerlugit oqaluuserinnittoqaliinnartoq ataatsimiititalianit saqqummiukkumaneqarsinnaasut piareersarneqarsinnaajumallugit ullormut oqaluuserisassat naammatsillugit oqaluuserineqareerpata siunnersuutit ataasiakkaarlugit oqaluttarfimminngaanngiit naatsumik taagorneqassapput, tamatumalu peqatigisaanik siunnersuutit ataatsimiititalianut suliarineqartussanngorlugit innersuunneqassapput.

Aalajangiiffigisassatut siunnersuutit pingasunngornermi saqqummiunneqartut oqaluuserineqareerpata sisamanngornermi Inatsisinut Tunngaviusumut tunngasunik apeqqutit arlallit ammasumik oqaluuserineqartussatut siunnersuutigineqartut aamma  oqaluuserineqassapput.

 

Ulloq taannattaaq aalajangiiffigisassatut siunnersuutit aappassaaneerlugit oqaluuserineqarnissaannut piffissaliisoqassaaq, taamaaliluni inuusuttut Inatsisartuisa inaarutaasumik akuersissutigisassatut aalajangigassaannik Naalakkersuisut, tassa maani ilanngussisinnaaniassammata.

 

Tallimanngorpallu Naalakkersuisut inaarutaasumik aalajangigaannut siunnersuutit saqqummiutissavaat, tamannalu inuusuttut Inatsisartuisa tallimanngornermi ullaap tungaatigut oqaluuserissallugu.

 

Neriuppunga inuusuttut Inatsisartuisa ullormut oqaluuserisassatut siunnersuut akuersissutigissagaat. Tamanna akuersissutigineqarpoq. Qujanaq.